Mateo 1 - Apam Foforɔ

Yesu Kristo awoɔ ntoatoasoɔ

¹ Yesu Kristo Dawid ba he, Abraham ba he awoɔ ntoatoasoɔ.

² Abraham woo Isak, na Isak woo Yakob, na Yakob woo Yuda ne ne nuanom;

³ Yuda ne Tamar woo Peres ne Sera, na Peres woo Hesron, na Hesron woo Ram,

⁴ Ram woo Aminadab, na Aminadab woo Nahson, na Nahson woo Salmon,

⁵ na Salmon ne Rahab woo Boas, na Boas ne Rut woo Obed, na Obed woo Yisai,

⁶ na Yisai woo Hene Dawid. Na Dawid nso ne nea kane he na ɔyɛ Uria yerɛ he woo Salomo,

⁷ na Salomo woo Rehoboam, na Rehoboam woo Abia, na Abia woo Asa,

⁸ na Asa woo Yehosafat, na Yehosafat woo Yoram, na Yoram woo Usia,

⁹ na Usia woo Yotam, na Yotam woo Ahas, na Ahas woo Hesekia,

¹⁰ na Hesekia woo Manase, na Manase woo Amon, na Amon woo Yosia,

¹¹ na Yosia woo Yekonia ne ne nuanom, mmerɛ a Babilonfoɔ faa Yudafoɔ nommum kɔɔ Babel he.

¹² Na mmerɛ a Babilonfoɔ faa bɛ nommum kɔɔ Babel akyi he, Yekonia woo Sealtiel, na Sealtiel woo Serubabel,

¹³ na Serubabel woo Abihud, na Abihud woo Eliakim, na Eliakim woo Asor,

¹⁴ na Asor woo Sadok, na Sadok woo Akim, na Akim woo Elihud,

¹⁵ na Elihud woo Eleasa, na Eleasa woo Matan, na Matan woo Yakob,

¹⁶ na Yakob woo Yosef, Maria kunu he. Saa Maria yi ne woo Yesu a bɛfrɛ no Kristo he.

¹⁷ Nti ofiri Abraham so kosi Dawid so yɛ awoɔ ntoatoasoɔ dunnan; na ofiri Dawid so kosi mmerɛ a bɛfaa Yudafoɔ nommum kɔɔ Babel he so yɛ awoɔ ntoatoasoɔ dunnan; na ofiri berɛ a betu kɔtenaa Babel he kosi Kristo so nso yɛ awoɔ ntoatoasoɔ dunnan.

Yesu Kristo Awoɔ

¹⁸ Afei kwane a bɛfaa so woo Yesu Kristo di: Berɛ a bɛde ne maame Maria maa Yosef sɛ asiwa, na bennya ntenaa sɛ awarefoɔ he, behuu sɛ Maria afa afuro a ofiri Honhom Kronkron.

¹⁹ Ɔnam sɛ na Yosef a ɔyɛ n'asiwa yerɛ he yɛ nipa tenenee na ɔmpɛ sɛ obegu Maria anim ase badwam nti, ɔbɔɔ ne tim pɔ sɛ obegyae no kokoam.

²⁰ Nso berɛ a ɔyɔɔ sɛ obetu saa anammɔn he pɛ ne Nyankopɔn bɔfoɔ yii ne ho adi kyerɛɛ no daeɛso mu, kaa sɛ, “Yosef, Dawid ba, nsuro sɛ wobɛfa Maria a ɔyɛ w'asiwa-yerɛ he akɔ wo fie, efiri sɛ, abɔfra a ɔnyem no he firi Honhom Kronkron.

²¹ Ɔbɛwo ba beema, na to ne dini Yesu, efiri sɛ ɔno ne bɛgye ne nkurofoɔ afiri bɛ bɔne mu.”

²² Yei nyinaa siiɛ sɛdeɛ asɛm a Awurade nam diyifoɔ he so kaeɛ he bɛbam sɛ,

²³ “Hwɛ, babunu he bɛfa afuro na wawo ba beema, na bɛato ne dini sɛ Immanuel,” asekyerɛ ne sɛ, (Nyankopɔn ne yɛ ya hɔ).

²⁴ Berɛ a Yosef nyane firii ne nna mu he, ɔyɔɔ sɛdeɛ Awurade bɔfoɔ he hyɛɛ no sɛ ɔnyɔ he; na ɔfaa Maria baa ne nkyɛne sɛ ne yerɛ,

²⁵ nso wamfa ne ho anka no kosii sɛ ɔwoo ba beema; na ɔtoo ne dini Yesu.