Marko 13 - Apam Foforɔ

Asɔrefie he sɛeɛ ho nkɔmhyɛ

¹ Na afei Yesu firii asɔredane he mu firiiɛ he, n’asuafoɔ he mu baako ka kyerɛɛ no sɛ, “Kyerɛkyerɛfoɔ, hwɛ aboɔ akɛseɛ ne adane nwanwasono yi!”

² Afei Yesu bisaa no sɛ, “Woahu adane nwanwasono yi? Boɔ baako mpo ɔnka boɔ foforɔ so ha; bebedwiri ne nyinaa agu fam.”

³ Berɛ a na ɔte Ngo Bepɔ so, faako a ɔne hyiadane he di animhwɛ he, Petro, Yakobo, Yohane ne Andreo bisaa no kokoam sɛ,

⁴ “Ka kyerɛ yɛ, mmɛ berɛ ne yei bɛyɔ hɔ, na mmɛ ne bɛyɛ nsɛnkyerɛnne sɛ saa nnoɔma yi nyinaa ɔɔbɛba mu?”

⁵ Na Yesu ka kyerɛɛ bɛ sɛ, “Honhwɛ yie na biaa amma hoanyera.

⁶ Nnipa bebree de me dini bɛba abɛka sɛ, ‘Mene no!’ Na bɛbɛma nnipa bebree amane afiri kwane he ho.

⁷ Sɛ hote ko ne akosɛm a, hommma ho akoma ntu; ɔsɛ sɛ ɔba saa, nso na awieeɛ he nnuruiɛ.

⁸ Na amane bɛsɔre atia amane, na ahennie asɔre atia ahennie; asaasewosoɔ bɛba mmeammea; kɔm bɛba. Yei yɛ awoko yeyaa mfitiaseɛ.

Yesu hyɛɛ Taa ho Nkɔm

⁹ “Ho deɛ, honhwɛ ho ho yie, efiri sɛ bebeyi ho ama abadwafoɔ; na bɛbɛhwe ho hyia adane mu; na me nti, hobegyina amradofoɔ ne ahemfo anim, de ayɛ adanseɛ ama bɛ.

¹⁰ Na otwa sɛ bɛpae mu ka asɛmpa he kyerɛ amane nyinaa kane.

¹¹ Sɛ bɛde ho kɔ sɛ beekodi ho asɛm ayi ho ama a, honnwennwene deɛ hobɛka ho; na deɛ bɛde bɛma ho saa berɛ he ɔnoaa ne honka, efiri sɛ, ɔnyɛ ho ne hokasa, na mmom ɔyɛ Honhom Kronkron ne bɛkasa afa ho mu.

¹² Na afei nua beyi nua ama na bɛaku no; na agya ayi ne ba ama, na mma bɛsɔre atia awofoɔ, na bɛama bɛaku awofoɔ he.

¹³ Na me dini nti nnipa nyinaa bɛtane ho. Nso nea obegyina akosi awieeɛ he ne benya nkwa.

Akyiwadeɛ a ɔbɔ Mane

¹⁴ “Nso berɛ a hobehu sɛ bɛde akyiwadeɛ a ɔma mane da mpan he asi baabi a ɔnsɛ sɛ osi he (ma nea ɔɔkenkane he nte aseɛ), hedeɛ ma bɛ a bɛya Yudea nwane nkɔ mmepɔ so;

¹⁵ Mmma nea ɔya dane atifi he nsi fam, saa ara nso ne ɔnsɛ sɛ osi kɔ fie hɔ kɔfa bibi firi hɔ;

¹⁶ nea ɔya afuom nsane nnkɔfa ataadeɛ ngusoɔ.

¹⁷ Na saa da he apemfoɔ ne bɛ a bɛma mmɔfra nofoɔ nnue!

¹⁸ Nti hommɔ mpaeɛ na amma awɔ berɛ.

¹⁹ Na nna he mu, amanehunu a ofiri Nyankopɔn adebɔ ahyɛaseɛ de besi nnɛ bi mmaa da, na bi nso ɔmma bio bɛba.

²⁰ Na sɛ Awurade antwa nna he so tia a, nipa biaa onya nkwa; nso bɛ a bɛapa bɛ he na bɛayi bɛ he nti, bɛatwa nna he so tia.

²¹ Na sɛ biaa ka kyerɛ ho da he sɛ, ‘Hwɛ! Kristo he di!’ Anaa ‘Hwɛ, Ɔya do a,’ honye nni,

²² Kristo atorɔfoɔ ne adiyifoɔ atorɔfoɔ bɛba na bɛayɔ nsɛnkyerɛnne ne anwanwadeɛ, na sɛ obetumi a, nka bɛde adaadaa bɛ a bɛayi bɛ he.

²³ Nso honyɛ krado; maadi kane aka ne nyinaa akyerɛ ho.

Nipa Ba he mmaeɛ

²⁴ Na nna he mu, amanehunu he akyi, Awia beduru sum, na bosome ɔnhyerɛn

²⁵ na nsoromma bɛtete afiri soro agu na soro tumi bɛwoso.

²⁶ Na afei bebehu Nipa Ba he sɛ osiane mununkum mu tumi ne animuonyam kɛseɛ mu.

²⁷ Afei ɔbɛsoma abɔfoɔ he, na bɛakɔboaboa bɛ a bɛayi bɛ afiri atifi kɔpem anaafoɔ, apieeɛ kɔpem atɔeɛ, ofiri asaase ano de kosi soro ano.

Borɔdoma dua ho adesua

²⁸ Honsua bibi mfiri borɔdoma dua he ho mfantoho he mu: Sɛ ne mmane he yɛ frɔmfrɔm na oyi n’ahahane he a, na hoahu sɛ pɛ berɛ abɛne.

²⁹ Saa ne sɛ ho nso hohu sɛ saa nnoɔma yinom oosisi a, hoahu sɛ waabɛne, na ɔya pono ano pɛɛ.

³⁰ Nɔkorɛ meeka akyerɛ ho sɛ, saa awoɔntoatoasoɔ yi ontwam, gye sɛ yei nyinaa sisi ansa.

³¹ Soro ne asaase betwam, nso me nsɛm deɛ ontwam da.

Hia a ohia sɛ yɛnwɛne

³² “Na ɔfa da he ne dɔnhwere he ho deɛ, biaa nnim, soro abɔfoɔ oo, Ba he oo, biaa nnim, gye Agya he nkoaa.

³³ Honhwɛ yie, homma ho ani nna hɔ; efiri sɛ, honnim da a saa berɛ he bɛba.

³⁴ Ɔte sɛ beema bi a ootu kwane, na oofiri fie he, ɔde ne nkoa sisii nnwuma ahodoɔ ano, na ɔhyɛɛ ponohwɛfoɔ sɛ ɔnwɛne.

³⁵ Nti homma ho ani nna hɔ, efiri sɛ honnim berɛ a fiewura he bɛba, sɛ ɔbɛba anwummerɛ oo, dasuom oo, dasuom akokɔbɔmmereɛ oo, anaa ahemakye oo, honnim.

³⁶ Saa nti sɛ hoamma ho ani anna hɔ a, ɔbɛba mpofirem abɛto ho sɛ hoadeda.

³⁷ Na deɛ meeka akyerɛ ho he, meeka akyerɛ biaa: Homma ho ani nna hɔ.”