Marko 10 - Apam Foforɔ

Awaregyaeɛ ho Nkyerɛkyerɛ

¹ Afei Yesu firii saa bea hɔ kɔɔ Yudea mpɔtamu hɔ Yordan akyi. Na nnipadɔm pii betwaa ne ho hyiaa bio; na sɛdeɛ na ɔtaa yɔ he, ɔkyerɛkyerɛeɛ.

² Farisifoɔ bi baeɛ, na bebisa de sɔɔ ne hwɛeɛ sɛ, “Mmara ma kwane sɛ beema bi gyae ne yerɛ?”

³ Obisaa bɛ sɛ, “Mmɛ ne Mose hyɛɛ ho?”

⁴ Bɛkaa sɛ, “Mose maa ho kwane sɛ betumi twerɛ awaregyaeɛ krataa de gyae baa he.”

⁵ Nso Yesu ka kyerɛɛ bɛ sɛ, “Ho akoma pirim nti ne ɔtwerɛɛ saa ahyɛdeɛ yi maa ho.

⁶ Na ofiri adebɔ mfitiaseɛ he, ‘Nyankopɔn yɔɔ beema ne baa.’

⁷ ‘Yei nti, beema begya n’agya ne ne na hɔ, na ɔne ne yerɛ aka abom,

⁸ na bɛ mmienu he ayɛ honam baako.’ Ɔba saa a bɛnna so nyɛ mmienu, na mmom bɛyɛ honam baako.

⁹ Nti nea Nyankopɔn aka abom he, mma nipa biaa ntetem.”

¹⁰ Afei bɛ ya fie he, asuafoɔ he bisaa yei ho asɛm bio.

¹¹ Ɔka kyerɛɛ bɛ sɛ, “Sɛ bi gyae ne yerɛ, na ɔware foforɔ a, na wasɛe awareɛ ɔnam baa he a ogyae no he nti;

¹² na sɛ baa he nso gyae ne kunu na ɔware foforɔ a wasɛe awareɛ.”

Yesu hyiraa Mmɔfra Nketewa

¹³ Na nnipa bebree de mmɔfra nketewa ɔɔbra no sɛ ɔde ne nsa bɛka bɛ; na asuafoɔ he kaa bɛ anim dendenndene.

¹⁴ Afei Yesu huiɛ he, n’ani annye ho, na ɔka kyerɛɛ bɛ sɛ, “Homma mmɔfra he mmara me nkyɛne; honnsi bɛ kwane; na bɛ a bɛte sei ne Nyankopɔn ahennie he yɛ bɛ dea.

¹⁵ Nɔkorɛ meeka akyerɛ ho, nea ɔnnye Nyankopɔn ahennie he sɛ abɔfra he nkɔ mu da.”

¹⁶ Na ɔmaa bɛ so kɔɔ soro de ne nsa guu bɛ so, na ohyiraa bɛ.

Defoɔ he

¹⁷ Na osiim sɛ ɔɔkɔ baabi he, beema bi de mmirika bebuu nkotodwe n’anim, na obisaa no sɛ, “Kyerɛkyerɛfoɔ pa, mmɛ ne menyɔ na manya daa nkwa?”

¹⁸ Yesu bisaa no sɛ, “Ɛɛne nti ne wofrɛ me papa? Biaa nyɛ papa, gye Nyankopɔn nkoaa.

¹⁹ Wonim ahyɛdeɛ he, ‘Nni awu; Nsɛe awareɛ; Mmɔ korɔno; Nni adansekunumu; Nsisi biaa; Di w’agya ne wo na ni.’ ”

²⁰ Ɔka kyerɛɛ no sɛ, “Kyerɛkyerɛfoɔ, mefiri me mmɔfra ase adi yei nyinaa so.”

²¹ Na Yesu hwɛɛ no he, ɔdɔɔ no, na ɔkaa sɛ, “Aaka wo adeɛ baako; kɔ, kɔtɔno nea wowɔ, na fa sika he ma ahiafoɔ, na wobenya agyapadeɛ soro; na afei bra bedi m’akyi.”

²² Ɔtee yei he, ne ho dwirii no, na ɔde awerɛhoɔ kɔeɛ, efiri sɛ, na ɔwɔ ahonyadeɛ pii.

²³ Na Yesu too n’ani hwɛɛ nnipa a na bɛya hɔ he, ɔka kyerɛɛ n’asuafoɔ he sɛ, “Hwɛ dene a ɔbɛyɛ ama adefoɔ sɛ bɛbɛkɔ Nyankopɔn ahennie he mu!”

²⁴ Na nsɛm yi haa asuafoɔ he adwene. Nso Yesu ka kyerɛɛ bɛ bio sɛ, “Mmɔfra, honhwɛ dene a ɔyɛ sɛ bi bɛkɔ Nyankopɔn ahennie he mu!

²⁵ Ɔmmerɛ ma yoma sɛ obewura paneɛ tokuro mu sene sɛ sikani bɛkɔ Nyankopɔn ahennie mu.”

²⁶ Asɛm yi yɛɛ bɛ nwanwa kɛse, na bɛkaa sɛ, “Sɛ saa ne ɔteɛ dea, hwane ne obetumi anya nkwa?”

²⁷ Yesu hwɛɛ bɛ, na ɔkaa sɛ, “Nnipa fam deɛ, ontumi nyɛ hɔ, na ɔnyɛ Nyankopɔn fam; na Nyankopɔn fam deɛ bibiaa betumi ayɛ hɔ.”

²⁸ Petro fitii aseɛ ka kyerɛɛ no sɛ, “Hwɛ, yɛagya bibiaa hɔ abedi w’akyi.”

²⁹ Yesu kaa sɛ, “Meeka akyerɛ ho nɔkorem, biaa nni hɔ a wagya fie anaa nua mmeema, anaa nua mmaa, anaa maame, anaa papa, anaa mma ne nsaase, ɔnam me ne asɛmpa he nti,

³⁰ na onya no mmɔho ha, saa wiase yi mu a, fie, nua mmeema, nua mmaa, nanom, ne mma, anaa nsaase, na taa nso ka ho, ne nna a ɔbɛba he mu daa nkwa.

³¹ Nso adikanfoɔ bebree bɛka akyi, na akyikafoɔ bedi kane.”

Yesu hyɛɛ ne Wuo ne ne Sɔreeɛ ho Nkɔm Mprɛnsa so

³² Na bɛnam kwantempɔno he so ɔɔkɔ Yerusalem, na Yesu adi bɛ anim kane; ɔyɛɛ bɛ nwanwa, na bɛ a bedi akyire he suroeɛ. Ɔde dummienu he kɔɔ nkyɛne bio, na ɔhyɛɛ aseɛ kaa nea ɔbɛto no,

³³ sɛ, “Honhwɛ, yɛɛkɔ Yerusalem, na bɛde Nipa Ba he bɛhyɛ asɔfoɔ mpanyimfoɔ ne atwerɛfoɔ he nsa, na bebebua no kumfɔ; na afei bɛde no ahyɛ Amanamane mufoɔ nsa;

³⁴ bebedi ne ho fɛw, na bɛato ntasuo agu ne so na bɛatwa no mmaa, na bɛaku no, na nnansa akyi wasɔre bio.”

Yakubu ne Yohane Adesrɛ

³⁵ Yakubu ne Yohane, Sebedeo mma he baa ne nkyɛne bɛka kyerɛɛ no sɛ, “Kyerɛkyerɛfoɔ, yɛpɛ sɛ nea yebebisa wo biaa woyɔ ma yɛ.”

³⁶ Ɔka kyerɛɛ bɛ sɛ, “Mmɛ ne hopɛ sɛ meyɔ ma ho?”

³⁷ Na bɛka kyerɛɛ no sɛ, “Ma yɛ mu baako ntena wo nifa, na baako ntena wo benkum w’animuonyam mu.”

³⁸ Nso Yesu ka kyerɛɛ bɛ sɛ, “Honnim nea hoobisa he. Hobetumi anom kuruwa a menom he, anaa hobetumi abɔ asu a bɛde bɔ me he?”

³⁹ Bebuaa sɛ, “Yebetumi.” Afei Yesu ka kyerɛɛ bɛ sɛ, “Kuruwa a menom he, hobɛnom; na asubɔ a bɛde bɔ me he, bɛde bɛbɔ ho;

⁴⁰ nso sɛ hobɛtena me nifa anaa me benkum deɛ, ɔnyɛ me ne mede ma, na ɔya bɛ a bɛasiesie ama bɛ deɛ.”

⁴¹ Na du he tee yei he, bɛ bo hyɛɛ aseɛ fuu Yakobo ne Yohane.

⁴² Nti Yesu frɛɛ bɛ ka kyerɛɛ bɛ sɛ, “Honim sɛ Amanamane mufoɔ he mu deɛ, bɛ a bebu bɛ sɛ bɛ sodifoɔ he hyɛ bɛ so, na bɛ akɛsefoɔ he yɛ bɛ so ka-a-nka-bi.

⁴³ Nso ɔsɛ sɛ ɔba saa ho mu; na biaa a ɔpɛ sɛ ɔyɔ kɛseɛ ho mu he, otwa sɛ ɔyɔ ho akoa,

⁴⁴ na nea ɔpɛ sɛ ɔdi kane ho mu biaa he, otwa sɛ ɔyɔ ho nyinaa ho akoa,

⁴⁵ na Nipa Ba he amma sɛ bɛnsom no, na mmom ɔbɛsomeeɛ, na ɔde ne nkwa ayɛ agyedeɛ ama nnipa bebree.”

Nifirani Bartimeo Ayaresa

⁴⁶ Bɛbaa Yeriko. Na ɔne n’asuafoɔ he ne nnipadɔm bi oofiri Yɛriko he, na Timeo ba Bartimeo, nifirani adesrɛfoɔ he te kwane nkyɛne.

⁴⁷ Na ɔtee sɛ ɔyɛ Yesu Nasareni he ne ootwam he, ɔhyɛɛ aseɛ teaam kaa sɛ, “Yesu, Dawid ba, hu me mmɔbɔ!”

⁴⁸ Nnipa bebree teateaa no sɛ ɔnyɔ komm; nso ɔteateaam kɛse sɛ, “Dawid Ba, hu me mmɔbɔ!”

⁴⁹ Yesu gyinaa hɔ dinn kaa sɛ, “Homfrɛ no mmra ha.” Na bɛka kyerɛɛ nifirani he sɛ, “Ma w’akoma ntɔ wo yam; sɔre, ɔɔfrɛ wo.”

⁵⁰ Nti ɔtoo n’ataadeɛ guiɛ, ohuru gyinaeɛ, na ɔkɔɔ Yesu nkyɛne.

⁵¹ Afei Yesu bisaa no sɛ, “Mmɛ ne wopɛ sɛ meyɔ ma wo?” Nifirani he ka kyerɛɛ no sɛ, “Me Kyerɛkyerɛfoɔ, ma menhu adeɛ bio.”

⁵² Yesu ka kyerɛɛ no sɛ, “Kɔ, wo gyidie asa wo yadeɛ.” Amonom hɔaa, ohuu adeɛ, na odii n’akyi kwane he so.