Luka 23 - Apam Foforɔ

Bɛde Yesu begyinaa Pilato anim

¹ Nti nnipadɔm he nyinaa sɔreeɛ, na bɛde Yesu kɔmaa Pilato.

² Afei befirii aseɛ bɔɔ no soboɔ sɛ, “Yɛakye beema yi sɛ ɔɔsɛe yɛ mane, na ɔbra sɛ bentua toɔ mma Kaesare na ɔka sɛ ɔno ne hene Kristo he.”

³ Afei Pilato bisaa no sɛ, “Wone Yudafoɔ hene he ampa?” Na obuaa no sɛ, “W’ankasa ne wooka.”

⁴ Afei Pilato ka kyerɛɛ asɔfoɔ mpanyimfoɔ he ne nnipakuo he sɛ, “Menhu bɔne biaa beema yi ho.”

⁵ Nso bɛkaa no dendenndene sɛ, “Ɔkyerɛkyerɛ Yudea nyinaa de hwanyane mane he mu, ofirii aseɛ mpo firii Galilea ne ɔde abeduru ha yi.”

⁶ Berɛ a Pilato teeɛ he, obisaa sɛ beema he yɛ Galileani anaa?

Bɛde Yesu kɔmaa Herode

⁷ Na ohuu sɛ Yesu hyɛ Herode tumi ase he, ɔma bɛde no kɔmaa Herode a nna he mu na n’ankasa ya Yerusalem he.

⁸ Berɛ a Herode huu Yesu he n’ani gyee yie, efiri sɛ na ofiri mmerɛ tentene apɛ sɛ ohu no esiane ne ho asɛm a waate nti, na na ɔpɛ sɛ ɔyɔ nsɛnkyerɛnne bi ma ohu.

⁹ Afei ofirii aseɛ bisaa no nsɛm bebree; nso Yesu ammua no.

¹⁰ Na asɔfoɔ mpanyimfoɔ he ne atwerɛfoɔ he kɔɔ so sɔre gyinaeɛ de abufuɔ bɔɔ no soboɔ aniberɛ so.

¹¹ Afei Herode ne n’asraafoɔ he bɔɔ no adapaa, goroo ne ho, na bɛhyɛɛ no ahentaadeɛ bi de no kɔmaa Pilato bio.

¹² Afei Herode ne Pilato bɛyɛɛ nnamfoɔ saa da heaa; kane he, na nka bɛyɛ atamfoɔ.

Pilato di maa Yesu

¹³ Afei Pilato frɛɛ asɔfoɔ mpanyimfoɔ he, mane sodifoɔ he ne ne manfoɔ he hyiaa mu

¹⁴ na ɔka kyerɛɛ bɛ sɛ, “Hode nipa yi braa me sɛ bi a ɔma nkurofoɔ te atua, na hwɛ, mehwehwɛɛ n’asɛm mu ho anim ha yiaa, nso manhu nnyinasoɔ biaa a hode bɔɔ no soboɔ.

¹⁵ Nɔkwasɛm ne sɛ, Herode nso anhu bi, na ɔsane de no braa yɛ; na hwɛ, ɔnyɔɔ bibiaa a ɔsɛ sɛ beku no.

¹⁶ Nti mɛtwe n’aso na magyaa no.”

¹⁷ [Nso ɔsɛ Pilato sɛ daa, afahyɛ he mu, ogyaa deduani baako ma bɛ.]

¹⁸ Na nnipadɔm he nyinaa teaam kaa sɛ, “Fa yei kɔ, na gyaa Baraba ma yɛ!”

¹⁹ (Saa nipa yi, ɔnam sakasaka bi a ɔkɔyɔɔ no kuro mu hɔ ne awudie bi a odiiɛ nti ne bɛde no kɔtoo afiase.)

Pilato buaa Yesu kumfɔ

²⁰ Pilato maa ne nne so ne nnipadɔm he kasaa bio, efiri sɛ na ɔpɛ sɛ ogyaa Yesu.

²¹ Na befirii aseɛ teateam sɛ. “Bɔ no asennua mu! Bɔ no asennua mu!”

²² Ɔka kyerɛɛ bɛ ne mprɛnsa so sɛ. “Abɛ bɔne ne nipa yi ayɔ? Menhu bibiaa a ɔya ne ho a ɔsɛ sɛ owu. Nti mɛtwe n’aso na magyaa no.”

²³ Afei bɛde nne kɛseɛ kaa no dendenndene sɛ ɔmmɔ no asennua mu; na bɛ nne bunkamm ne deɛ so.

²⁴ Nti Pilato buu atɛne sɛnea bɛɛhwehwɛ he.

²⁵ Na ogyaa deɛ sakasaka ne awudie nti bɛde no kɔtoo afiase maa bɛ sɛnea bɛsrɛɛ no sɛ ɔnyɔ he; nso oyii Yesu maeɛ sɛdeɛ na bɛɛpɛ he.

Yerusalem mmaa

²⁶ Na bɛde no ɔɔkɔ he, bɛsɔɔ Simon, Kireneni bi a na ofiri akuraa bi ase ɔɔba kurom, na bɛde asennua he soaa no dii Yesu akyi.

²⁷ Na dɔm kɛseɛ bi a befiri mane he mu ne mmaa a beedi abooboo na beesu dii n’akyi.

²⁸ Yesu danee ne ho kyerɛɛ mmaa he kaa sɛ, “Yerusalem mmaa, honnsu mmma me; na mmom honsu mma ho ho ne ho mma!

²⁹ Na hwɛ, nna bi ɔɔba a nkurofoɔ bɛka sɛ, ‘Nhyira ne bonyini ne yafunu a ɔnwoo da ne nofoɔ a bɛnnom ano da!’

³⁰ Afei bebefiri aseɛ aka akyerɛ mmepɔ sɛ, ‘Hommegu yɛ so,’ ne nkokoɔ sɛ, ‘honkata yɛ so!’

³¹ Na sɛ bɛde yei ɔɔyɔ dua mono a, mmɛ ne bɛde bɛyɔ dua wuiɛ?”

³² Na bɛde nnebɔnyɛfoɔ mmienu bi nso aka ne ho a beekoku bɛ.

Golgota

³³ Berɛ a beduruu baabi a bɛfrɛ hɔ Golgota he, bɛbɔɔ Yesu ne nnebɔnyɛfoɔ he asennua mu, baako ya ne nifa, ne baako nso ya ne benkum.

³⁴ Na Yesu kaa sɛ, “Agya fa kyɛ bɛ efiri sɛ bennim nea bɛɛyɔ.” Bio nso, bɛtwee ntonto kyɛɛ ne ntaadeɛ faeɛ.

³⁵ Na nkurofoɔ he gyina hɔ ɔɔhwɛ. Na atumfoɔ he dii ne ho agorɔ kaa sɛ, “Ɔgyee binom; sɛ yei ne Kristo a Nyankopɔn ayi no he a, ma onnye ne ho ɛ!”

Yesu ho agodie

³⁶ Asraafoɔ he mpo dii ne ho agorɔ, na bɛbaa ne nkyɛne de nsa kekakeka maa no

³⁷ kaa sɛ, “Sɛ wone Yudafoɔ hene he a, gye wo ho!”

³⁸ Bɛde ntwerɛeɛ bi nso bɔɔ n’atifi sɛ, “Yei ne Yudafoɔ hene he.”

Wudini a ɔsakraa n’adwene he

³⁹ Na nnebɔnyɛfoɔ a bɛasɛne bɛ he mu baako firii aseɛ kasa tiaa Yesu sɛ, “Wone Kristo he, anaa ɔnyɛ wo a? Gye wo ho, na gye yɛ nso.”

⁴⁰ Na nea ɔka ho he buaa no kaa n’anim sɛ, “Nti wonsuro Nyankopɔn koraa berɛ a woya afobuo korɔ yiaa mu yi?

⁴¹ Yɛ deɛ, wuo fata yɛ, efiri sɛ nea yɛ yɔeɛ so akatua ne yɛ nsa aka yi, na yei deɛ, ɔnyɔɔ mfomsoɔ biaa.”

⁴² Na ɔtoaa so kaa sɛ, “Yesu, sɛ woba w’ahennie mu a, kae me.”

⁴³ Na Yesu ka kyerɛɛ no sɛ, “Nɔkorem meeka akyerɛ wo sɛ, nnɛ wobɛka me ho Paradise hɔ.”

Yesu wuo

⁴⁴ Na aabɔ bɛyɛ awia dummienu, afei sum baa asaase nyinaa so kosii awie nnɔnmmeɛnsa,

⁴⁵ na awia duruu sum; afei asɔredane he mu ntoma a otwa mfimfini he mu tee mmienu.

⁴⁶ Na Yesu de nne kɛseɛ teaam sɛ, “Agya, wo nsam ne mede me honhom hyɛ.” Ɔkaa yei he ogyaa mu.

Yesu wuo ho hu kaa nkurofokuo he

⁴⁷ Na sraani panyini he huu nea asi he, ɔhyɛɛ Nyankopɔn animuonyam sɛ, “Ampa, na nipa yi yɛ teneneeni.”

⁴⁸ Na berɛ a nnipakuo a bɛahyiam ɔɔhwɛ nea ɔɔkɔ so he nyinaa huu nea asi he, bɛde bɛ nsa bobɔɔ bɛ koko so firii hɔ kɔeɛ.

⁴⁹ Bio nso, na bɛ a benim no he nyinaa gyinagyina akyiri. Na mmaa a bedii n’akyi firii Galilea he nso gyinagyina hɔ ɔɔhwɛ yeinom.

Yesu sie

⁵⁰ Na hwɛ, na beema bi ya hɔ a bɛfrɛ no Yosef a ɔyɛ badwani na ɔyɛ nipa pa na ɔtene nso.

⁵¹ Ɔno deɛ, wampene bɛ agyina ne bɛ nneyɔeɛ he so. Ofiri Yudafoɔ kuro Arimatea mu, na ɔnoaa nso ɔɔtwɛne Nyankopɔn ahennie he.

⁵² Saa beema yi kɔɔ Pilato nkyɛne kɔsrɛɛ no Yesu amu he.

⁵³ Na okoyii amu he kyekyeree no nwera mu, na ɔde kɔtoo da a bɛatwa no boɔ mu a bensie nipa biaa mu da mu.

⁵⁴ Na da he yɛ ahoboaboa da ma homeda a na ɔɔba he.

⁵⁵ Na mmaa he nso a bɛne no firi Galilea baeɛ he dii akyire kɔhwɛɛ da he ne sɛdeɛ bɛde n’amu he too hɔ faeɛ.

⁵⁶ Na bɛsane besiesiee nnuro ne ngo hwamhwam. Na homeda he, bɛhomeeɛ sɛnea mmara he teɛ he.