Luka 18 - Apam Foforɔ

Temmufoɔ a ɔntene he ho mfantoho

¹ Afei ɔtoaa so maa bɛ mfantoho bi de kyerɛɛ sɛnea ohia sɛ bɛbɔ mpaeɛ daa a bɛmpa aba.

² Ɔkaa sɛ, “Na temmufoɔ bi ya kuro bi mu a onsuro Nyankopɔn na ommu nipa biaa,

³ na na kunafoɔ bi ya saa kuro he mu a ɔtaa kɔ ne nkyɛne kɔka sɛ, ‘Hwɛ sɛ wobebu atɛntenenee me ne me nkurobɔfoɔ ntam.’

⁴ Ɔtwentwɛnee ne nane ase kakra, nso akyire yi ɔkaa no ne tim sɛ, ‘Ewom sɛ mensuro Nyankopɔn na memmu nnipa deɛ,

⁵ nso, sɛnea kunafoɔ yi kɔ so ha me nti, mɛhwɛ na mabu atɛntenenee, na wamma ammɛdwane me ho bio.’ ”

⁶ Afei Awurade kaa sɛ, “Hontie nea temmufoɔ a ɔntene he mpo kaeɛ!

⁷ Nɔkwasɛm di, ewom sɛ Nyankopɔn ma ne bo dwo kyɛre ma ho deɛ, nso ommu atɛntenenee mma bɛ a wayi bɛ a besu frɛ no awia ne anadwo he anaa? Nti, ɔbɛtwentwɛne ne nane ase bɛ ho anaa?

⁸ Meeka akyerɛ ho sɛ, obebu atɛntenenee ama bɛ ntɛm so. Nso sɛ Nipa Ba he ba a, obehu gyidie ankasa asaase so anaa?”

Farisini ne togyeni he

⁹ Na ɔde mfantoho yi nso maa binom a bɛgye bɛ ho di sɛ bɛyɛ ateneneefoɔ na bemmu bɛ a bɛaka he koraa he sɛ,

¹⁰ “Nnipa mmienu kɔɔ asɔre fie kɔbɔɔ mpaeɛ, na baako yɛ Farisini, na nea ɔka ne ho he yɛ togyeni.

¹¹ Farisini he sɔre gyinaeɛ, na ofirii aseɛ bɔɔ mpaeɛ ne tim sɛ, ‘Nyankopɔn, meda wo ase sɛ mente sɛ nnipa a aka he, apoobɔfoɔ, bɛ a bɛntene, awaresɛefoɔ, anaa togyeni yei mpo.

¹² Medi mmuada mprenu nnawɔtwe, meyi nea menya nyinaa so ntotosoɔ du du.’

¹³ Na togyeni he a ogyina fã nohoa he ampɛ sɛ ɔma n’ani so hwɛ soro mpo, na mmom ɔde ne nsa guu ne koko so kaa sɛ, ‘Nyankopɔn, hu me debɔneyɛni mmɔbɔ.’

¹⁴ Meka kyerɛ ho sɛ, togyeni he de bembuo sane kɔɔ ne fie sene Farisini he, efiri sɛ, biaa a ɔma ne ho so he bɛbɛbrɛ no ase, na nea ɔbrɛ ne ho ase he bɛbɛma no so.”

Yesu hyira mmɔfra

¹⁵ Afei nkurofoɔ firii aseɛ de bɛ mma nkokoa brɛɛ no sɛ ɔmfa ne nsa nka bɛ; na n’asuafoɔ he huiɛ he bɛkaa bɛ anim.

¹⁶ Nso, Yesu frɛɛ mmɔfra he baa ne nkyɛne kaa sɛ, “Homma mmɔfra he mmra me nkyɛne, na honsi bɛ kwane, efiri sɛ bɛ a bɛte saa ne Nyankopɔn ahennie he yɛ bɛ dea.

¹⁷ Nɔkorem, meeka akyerɛ ho sɛ, biaa a onnye Nyankopɔn ahennie sɛ abɔfra kumaa he, kwane biaa so ɔnkɔ mu koraa.”

Daa nkwa

¹⁸ Na tumfoɔ bi bisaa no sɛ, “Kyerɛkyerɛfoɔ pa, ɛɛne ne meyɔ a menya daa nkwa?”

¹⁹ Yesu bisaa no sɛ, “Mmɛ nti ne wofrɛ me papa? Biaa nyɛ papa gye baako pɛ, ɔno ne Nyankopɔn.

²⁰ Wonim mmara he, ‘Nsɛe awareɛ, Nni awu, Mmɔ korɔno, Nni adansekunumu, di w’agya ne wo na ni.’ ”

²¹ Afei ɔkaa sɛ, “Maadi yeinom nyinaa so firi me mmɔfrase.”

²² Yesu tee yei he, ɔka kyerɛɛ no sɛ, “Nso aka wo adeɛ baako: kɔtɔno nea wowɔ nyinaa na kyekyɛ ma ahiafoɔ, na wobenya agyapadeɛ soro; na bra bedi m’akyi.”

²³ Berɛ a temmufoɔ he tee yei he, ne werɛ hoo paa, efiri sɛ, na ɔyɛ defoɔ ankasa.

Ahonyadeɛ mu asiane

²⁴ Yesu hwɛɛ no kaa sɛ, “Sɛ hoahu dene a ɔyɛ ma asikafoɔ ne adefoɔ sɛ bɛbɛkɔ Nyankopɔn ahennie mu!

²⁵ Nɔkwasɛm ne sɛ, ɔmmerɛ ma yoma sɛ ɔbɛfa paneɛ tokuro mu kyɛne sɛ defoɔ bɛkɔ Nyankopɔn ahennie mu.”

²⁶ Bɛ a bɛtee yei he kaa sɛ, “Hedeɛ hwane ne betumi anya nkwa?”

²⁷ Ɔkaa sɛ, “Nea ontumi nyɛ hɔ nnipa fam he betumi ayɛ hɔ Nyankopɔn fam.”

Ahopakyie so akatua

²⁸ Na Petro kaa sɛ, “Hwɛ! Yɛagya yɛ nnoɔma nyinaa hɔ abedi w’akyi.”

²⁹ Ɔka kyerɛɛ bɛ sɛ, “Nɔkorem meeka akyerɛ ho sɛ, biaa nni hɔ a wagya fie anaa yerɛ anaa anuanom anaa awofoɔ anaa mma, Nyankopɔn ahennie nti,

³⁰ a onnya ho mmɔho pii saa berɛ yi, ne daa nkwa, wiase a ɔɔba he mu.”

Yesu wuo ne ne wusɔreɛ ho nkɔmhyɛ a ɔtɔ so mmeɛnsa

³¹ Afei ɔde dummienu he kɔɔ nkyɛne kɔka kyerɛɛ bɛ sɛ, “Hwɛ! Yɛɛkɔ Yerusalem, na nnoɔma a adiyifoɔ he atwerɛ afa Nipa ba he ho nyinaa bɛba mu.

³² Na bebeyi no ahyɛ amanamane mufoɔ nsa, na bɛagoro ne ho, na bɛabɔ no adapaa, na bɛatete ntasuo agu ne so,

³³ na bɛhwe no wie a, bebeku no, na da a ɔtɔ so mmeɛnsa he obenyane.”

³⁴ Nso, bɛante nnoɔma yi mu biaa ase; na nsɛm yi ahinta bɛ, na bɛante nea ɔkaeɛ he ase.

Yesu maa nifirani bi huu adeɛ

³⁵ Na berɛ a ɔɔbɛne Yeriko he, na nifirani bi te kwankyɛne ɔɔsrɛsrɛ adeɛ.

³⁶ Esiane sɛ ɔtee sɛ nnipakuo bi ootwam nti, ofirii aseɛ bisabisaa nea yei kyerɛ.

³⁷ Bɛbɔɔ no amaneɛ sɛ, “Yesu, Nasareni he ne ootwam!”

³⁸ Afei ɔteaa mu sɛ, “Yesu, Dawid Ba, hu me mmɔbɔ!”

³⁹ Na bɛ a bedi kane he teateaa no sɛ ɔnyɛ komm, nso ɔkɔɔ so teateaa mu dendenndene sɛ, “Dawid Ba, hu me mmɔbɔ!”

⁴⁰ Afei Yesu gyinaeɛ na ɔhyɛɛ sɛ bɛmfa beema he mmra ne nkyɛne. Oduruu Yesu nkyɛne he, Yesu bisaa no sɛ,

⁴¹ “Ɛɛne ne wopɛ sɛ meyɔ ma wo?” Ɔkaa sɛ “Awurade, ma menhu adeɛ.”

⁴² Nti Yesu ka kyerɛɛ no sɛ, “Hu adeɛ; wo gyidie agye wo.”

⁴³ Na amonom hɔaa ohuu adeɛ, na ofirii aseɛ dii n’akyi a ɔɔhyɛ Nyankopɔn animuonyam. Na afei, berɛ a nkurofoɔ he nyinaa huu no he, beyii Nyankopɔn ayɛ.