Luka 15 - Apam Foforɔ

Dwane a wayera ho mfantoho

¹ Na togyefoɔ ne nnebɔnyɛfoɔ nyinaa twi bɛnee Yesu sɛ beebetie no.

² Nti Farisifoɔ ne atwerɛfoɔ he nyinaa nwiinwii kaa sɛ, “Nipa yi gye nnebɔnyɛfoɔ na ɔne bɛ didi.”

³ Nti ɔyɔɔ mfantoho bi kyerɛɛ bɛ sɛ:

⁴ “Ho mu hwane ne wɔ nwane ha, na mu baako yera a, onnya aduɔkron nkron he serɛ so nkɔhwehwɛ nea wayera he nkosi sɛ obehu no?

⁵ Na berɛ a wahu no he, ɔde no bɔ ne kɔno ho na odi ahurusie.

⁶ Na oduru fie a ɔfrɛfrɛ ne nnamfonom ne ne mpɔtamfoɔ boa ano ka kyerɛ bɛ sɛ, ‘Ho ne me nni ahurusie, efiri sɛ mahu me dwane a ɔyeraeɛ he.’

⁷ Nti meeka akyerɛ ho sɛ anigye pii bɛba soro debɔneyɛfoɔ baako a wasakra ho kyɛne ateneneefoɔ aduɔkron nkron a benhia adwensakra.

Dwetɛbena a ayera he ho mfantoho

⁸ “Anaa baa hwane ne wɔ dwetɛbena du na sɛ dwetɛbena baako yera a, ɔnsɔ kanea mpra ne fie na ɔnhwehwɛ no yie nkosi sɛ obehu?

⁹ Na sɛ ohu a, ɔfrɛfrɛ ne nnamfoɔ mmaa ne n’afipamfoɔ boa ano ka sɛ, ‘Ho ne me nni ahurusie, efiri sɛ mahu me dwetɛbena a ɔyeraeɛ he.’

¹⁰ Nti, meeka akyerɛ ho sɛ, Nyankopɔn abɔfoɔ anigye debɔneyɛni baako a wasakra ho.”

Agya a ɔdɔ ne ba ho mfantoho

¹¹ Afei ɔkaa sɛ, “Na beema bi wɔ mma mmienu.

¹² Na bɛ mu kumaa he ka kyerɛɛ ne papa sɛ, ‘Papa, fa w’agyapadeɛ he fã a ɔyɛ me deɛ ma me.’ Nti ɔkyɛɛ n’asetenadeɛ mu maa bɛ.

¹³ Na nna kakraa bi akyi he, ba kumaa he boaboaa nnoɔma he nyinaa ano na otuu kwane kɔɔ akyirikyiri mane bi so, na okobuu akohwibra de sɛee n’agyapadeɛ he nyinaa.

¹⁴ Berɛ a ɔhweree ne nyinaa he, kɔm kɛseɛ bi sii mane he mu baabiaa, na ne ho firii aseɛ kyere no.

¹⁵ Afei ɔde ne ho kɔdanee mane he muni baako, na ɔde no kɔɔ n’asaase so sɛ ɔnkɔhwɛ ne mprako.

¹⁶ Na ne kɔno dɔɔ sɛ ɔde aduane a mprako di he bi bɛhyɛ ne yafunu mã, nso biaa amma no hwee.

¹⁷ “Berɛ a n’ani baa ne ho so he, ɔkaa sɛ, ‘Me papa apaafoɔ he mu deɛ ɔya he ne nnya aduane mma ne mmu so a mete ha yi a kɔm ooku me yi!

¹⁸ Mɛsɔre akɔ me papa nkyɛne akɔka akyerɛ no sɛ, “Papa, maayɔ soro ne wo anim bɔne.

¹⁹ Memfata sɛ wofrɛ me wo ba bio. Yɛ me w’apaafoɔ he mu baako.” ’

²⁰ Nti ɔsɔre sii kwane so sɛ ɔɔkɔ ne papa nkyɛne. Berɛ a ɔda soaa ya akyirikyiri he, ne papa huu no, na ne yam hyehyee no maa ne ba he, na otuu mmirika kɔsɔɔ ne mu yɔɔ no atuu.

²¹ Afei ne ba he ka kyerɛɛ no sɛ, ‘Papa, maayɔ soro ne wo anim bɔne. Memfata sɛ wofrɛ me wo ba bio.

²² Na papa he ka kyerɛɛ ne nkoa he sɛ, ‘Honyɔ ntɛm, mfa ataadeɛ a odi mu mmra mmɛhyɛ no, na homfa petea nhyɛ ne nsa na homfa mpaboa nhyɛ no.

²³ Na homfa nantwie kumaa a wadɔre sradeɛ mmra mmeku no mma yenni na yɛnnye yɛ ani,

²⁴ efiri sɛ me ba yi wuiɛ na wasane aba nkwa mu; ɔyeraeɛ na maahu no.’ Na befirii aseɛ gyee bɛ ani.

²⁵ “Saa berɛ yi na ne ba panyini he ya mfuom; na ɔɔba a ɔbɛne fie he ɔtee sɛ nnwom ne asa ɔɔkɔ so.

²⁶ Nti ɔfrɛɛ nkoa he mu baako na obisaa no nea ɔɔkɔ so.

²⁷ Akoa he buaa no sɛ, ‘Wo nua kumaa he aba, na wo papa aku nantwie kumaa a wadɔre sradeɛ, efiri sɛ ne nsa aka no bio a ɔwɔ nkwa mu.’

²⁸ Na ne bo fuu paa, na wampɛ sɛ ɔkɔ fie. Afei ne papa pie bɛkorɔkrɔɔ no.

²⁹ Obuaa ne papa sɛ, ‘Maasom wo mfie bebree, na memmuu wo mmara so da, nso wommaa me abirekyie ba mpo sɛ me ne me nnamfonom mfa nnye yɛ ani da.

³⁰ Nso wo ba yi a ɔne nwamanfoɔ adi wo ahodeɛ baeɛaa pɛ, woaku nantwie ba a wadɔre sradeɛ ama no.’

³¹ Afei ɔka kyerɛɛ no sɛ, ‘Me ba, woya me nkyɛne berɛ nyinaa, na nea mewɔ nyinaa yɛ wo deɛ;

³² nso ɔsɛ sɛ yɛma yɛ ani gye na yedi ahurusie, efiri sɛ wo nua yi wuiɛ na waaba nkwa mu bio, ɔyeraeɛ na yɛahu no.’ ”