Luka 1 - Apam Foforɔ

Luka twerɛɛ Nwoma he maa Teofilo

¹ Esiane sɛ nnipa bebree afa ato bɛ ho so sɛ bɛbɛkyerɛ nsɛm a abam yɛ ntam he nnidisoɔ nnidisoɔ,

² sɛnea bɛ a befiri mfitiaseɛ de bɛ ani huiɛ na bɛyɛɛ asɛm he ho asomfoɔ he de abra yɛ he nti,

³ Nimuonyamfoɔ Teofilo, me nso maabɔ me tim pɔ sɛ nea meaa mahwehwɛ mu defedefe firi ahyɛaseɛ he, meetwerɛ no nnidisoɔ nnidisoɔ de ama wo,

⁴ na woahu nɔkorɛ a ɔfa nnoɔma a bɛakyerɛkyerɛ wo he ho.

Suboni Yohane awofoɔ

⁵ Yudea hene Herode berɛ so he, na sɔfo bi ya hɔ a bɛfrɛ no Sakaria a ofiri Abia asɔfokuo he mu, na ne yerɛ yɛ Aaron mma mmaa he mu baako a ne dini de Elisabet.

⁶ Na bɛ mmienu nyinaa tene Nyankopɔn anim di Awurade mmara ne n’atemmudeɛ ne n’atenenedeɛ nyinaa so pɛpɛɛpɛ a asɛm biaa nni bɛ ho.

⁷ Na benni ba, efiri sɛ, na Elisabet yɛ bonyini, na bɛ mmienu nyinaa nso anyinyini paa.

Suboni Yohane awoɔ ho nkɔmhyɛ

⁸ Berɛ a oduruu Sakaria asɔfokuo so sɛ bɛne bɛyɔ asɔfodwuma he, na Sakaria ɔɔyɔ n’asɔfodwuma Nyankopɔn anim he,

⁹ na sɛnea asɔfodwuma ho amanneɛ teɛ he, bɛtwee ntonto yii no sɛ ɔno ne nkɔ Awurade kronkronbea hɔ nkɔhye aduhwam.

¹⁰ Na berɛ a ɔɔhye aduhwam he, na nnipadɔm he nyinaa ya adihɔ ɔɔbɔ mpaeɛ.

¹¹ Awurade bɔfoɔ begyinaa aduhwam afɔrebokyia he nifa yii ne ho adi kyerɛɛ no.

¹² Berɛ a Sakaria huu no he, ne ho yeraa no na ɔbɔɔ hu.

¹³ Nso bɔfoɔ he ka kyerɛɛ no sɛ. “Nsuro, Sakaria, efiri sɛ bɛatie w’adesrɛ, na wo yerɛ Elisabet bɛwo babeema ama wo, na woato ne dini Yohane.

¹⁴ W’ani bɛgye na woadi ahurusie, na nnipa pii hobɛsɛpɛ bɛ, ɔnam n’awoɔ he nti;

¹⁵ efiri sɛ, ɔbɛyɛ kɛseɛ Awurade anim. Nso ɔnsɛ sɛ ɔnom bobesa ne nsãdene biaa, na Honhom Kronkron bɛhyɛ no mã firi ne maame yam;

¹⁶ na ɔbɛdane Israel mma pii asane aba Awurade bɛ Nyankopɔn nkyɛne.

¹⁷ Na ɔde Elia honhom ne tumi bedi Awurade anim na wadane agyanom akoma aba bɛ mma so asoɔdenfoɔ akɔ teneneefoɔ adwene ho, na wasiesie mane he ama Awurade.”

¹⁸ Afei Sakaria bisaa bɔfoɔ he sɛ. “Maabɔ akɔkora na me yerɛ nso mfie kɔ animu paa. Afei ɔbɛyɛ dɛ na nea wooka yi abam?”

¹⁹ Bɔfoɔ he buaa no sɛ, “Mene Gabriel, Nyankopɔn somfo a wasoma me sɛ me ne wo mmɛkasa na menka nnoɔma yi ho asɛmpa nkyerɛ wo.

²⁰ Hwɛ! Wobɛtɔre mum, wontumi nkasa kosi da a yeinom bɛba mu, efiri sɛ, woannye me nsɛm a ɔbɛba mu berɛ a bɛahyɛ mu he anni.”

²¹ Saa berɛ he nyinaa na nkurofoɔ he ɔɔtwɛne Sakaria, na ɔyɛɛ bɛ nwanwa sɛ wakyɛre kronkronbea hɔ saa.

²² Nso ɔbaeɛ he wantumi ne bɛ ankasa, na behuu sɛ wakohu bibi kronkronbea hɔ, na ɔde ni ti ne ne nsa yɔɔ nsɛnkyerɛnne kyerɛɛ bɛ efiri sɛ wantumi ankasa.

²³ Afei nna a Sakaria de ɔɔsom he baa awieeɛ he, ofirii hɔ kɔɔ ne fie.

²⁴ Nna yi akyi he, ne yerɛ Elisabet nyinsɛneeɛ; na ɔde ne ho siee abosome nnum, na ɔkaa sɛ:

²⁵ “Yei ne kwane a Awurade afa so ne me adi berɛ a wabɛhwɛ me sɛ oobeyi m’ahohora nnipa anim afiri hɔ he mu.”

Yesu awoɔ ho nkɔmhyɛ

²⁶ Na Elisabet anyinsɛne mu bosome a ɔtoɔ so nsia he, Nyankopɔn somaa bɔfoɔ Gabriel kɔɔ Galilea kuro a bɛfrɛ no Nasaret mu,

²⁷ babunu bi a bɛde no ama beema bi a bɛfrɛ no Yosef a ofiri Dawid fie asiwa he nkyɛne; na babunu he dini ne Maria.

²⁸ Ɔkɔɔ ne nkyɛne he, ɔkyea no kaa sɛ, “Asomdwie nka wo, wo a bɛadom wo, Awurade ka wo ho.”

²⁹ Na asɛm he maa Maria ho dwirii no yie, na ɔdwendwenee ho sɛ, “Mmɛ nkyea di?”

³⁰ Nti bɔfoɔ he ka kyerɛɛ no sɛ: “Nsuro Maria, na woanya Nyankopɔn anim adom;

³¹ na hwɛ, wobenyinsɛne na woawo babeema, na woato no dini Yesu.

³² Ɔno ne bɛyɛ kɛse, na bɛbɛfrɛ no Sorosoroni he Ba; na Awurade Nyankopɔn de n’agya Dawid ahennwa bɛma no,

³³ na obedi Yakob fie so hene afebɔɔ, na n’ahennie ɔmma awieeɛ da.”

³⁴ Maria bisaa bɔfoɔ he sɛ, “Ɔbɛyɛ dɛ na yei aba mu berɛ a me ne beema nnaa da?”

³⁵ Afei bɔfoɔ he buaa no sɛ, “Honhom Kronkron bɛba wo so, na Sorosoroni he tumi bɛkata wo so. Yei nti ne bɛbɛfrɛ nea wobɛwo no he Kronkron, Nyankopɔn Ba.

³⁶ Hwɛ! Wo busuani Elisabet nso anyinsɛne babeema ne mmerewaberɛ mu, na ɔno a bɛfrɛ no bonyini he anyinsɛne bosome nsia di;

³⁷ efiri sɛ, Nyankopɔn fam deɛ, bibiaa nni hɔ a ontumi mma mu.”

³⁸ Afei Maria kaa sɛ. “Hwɛ! Meyɛ Awurade afenaa! Ɔmmra mu sɛdeɛ waka he.” Na bɔfoɔ he firii ne nkyɛne kɔeɛ.

Maria kɔsraa Elisabet

³⁹ Afei Maria sɔree saa nna he mu de ahoɔhare kɔɔ Yuda kuro bi a ɔda bepɔ so mu,

⁴⁰ ɔkɔɔ Sakaria fie, na ɔkyeaa Elisabet.

⁴¹ Na Elisabet tee Maria nkyea heaa pɛ, akokoa a ɔhyɛ ne yafunu mu he huruiɛ; na Honhom Kronkron hyɛɛ Elisabet mã,

⁴² na ɔde nne kɛseɛ teaam sɛ, “Bɛahyira wo mmaa nyinaa mu, na bɛahyira wo yafunu mu aba!

⁴³ Mmɛ akwannya ne manya sɛ m’Awurade maame aba me nkyɛne yi?

⁴⁴ Hwɛ! Wo nkyea twaa m’asomaa pɛ ne akokoa a ɔya me yam he de anigyeɛ kɛseɛ huruiɛ.

⁴⁵ Na nhyira nso ne nea wagye adi, efiri sɛ nea ofiri Awurade hɔ a bɛabɛka akyerɛ no he biaa bɛyɛ hɔ.”

⁴⁶ Maria kaa sɛ. “Me kra kamfo Awurade,

⁴⁷ na m’Agyenkwa Nyankopɔn ho ne me honhom di ahurusie;

⁴⁸ Efiri sɛ waahwɛ n’afenaa hianiwaa. Nɔkorɛ, efiri nnɛ ɔɔkɔ yi, awoɔ ntoatoasoɔ nyinaa bɛfrɛ me nhyira;

⁴⁹ efiri sɛ Nea ɔwɔ tumi he ayɔ adeɛ kɛseɛ ama me, na ne dini ne Kronkron;

⁵⁰ efiri awoɔ ntoatoasoɔ so kosi awoɔ ntoatoasoɔ so he, ohu bɛ a besuro no he mmɔbɔ.

⁵¹ Ɔde ne basa ayɔ ahoɔdenneɛ, waabɔ bɛ a bedi ahantansɛm bɛ akomam apansam:

⁵² Waatu atumfoɔ afiri bɛ nhennwa so na waama mmɔborɔfoɔ so;

⁵³ waama nnepa amee bɛ a kɔm de bɛ na waama bɛ a bɛwɔ ahodeɛ de nsapan kɔ.

⁵⁴ Wabɛhwɛ n’akoa Israel, na wakaeɛ ne mmɔborɔhunu

⁵⁵ daa sɛnea ɔka kyerɛɛ yɛ agyanom, Abraham ne n’asefoɔ he.”

⁵⁶ Na Maria tenaa ne nkyɛne bɛyɛ abosome mmeɛnsa, na ɔsane kɔɔ ne fie.

Suboni Yohane awoɔ

⁵⁷ Na Elisabet awoɔ duruu so he, ɔwoo babeema.

⁵⁸ Na mpɔtamu hɔfoɔ ne n’abusuafoɔ tee sɛ Awurade mmɔborɔhunu adɔɔso ne so he, bɛ ne no dii ahurusie.

⁵⁹ Na da a ɔtɔ so nwɔtwe he, bɛbaa sɛ beebetwa abɔfra kumaa he twetia, na nka bɛde no ɔɔto ne papa Sakaria.

⁶⁰ Nso ne maame kaa sɛ, “Daabi! Bɛbɛfrɛ no Yohane.”

⁶¹ Afei bɛka kyerɛɛ no sɛ, “Biaa nni w’abusua mu a ne dini de saa.”

⁶² Nti bɛde nsɛnkyerɛnne bisaa ne papa sɛnea ɔpɛ sɛ bɛfrɛ no.

⁶³ Afei ɔgyee boɔ twerɛ-pono twerɛɛ so sɛ, “Ne dini ne Yohane.” Na ɔyɛɛ bɛ nyinaa nwanwa.

⁶⁴ Mpofirem hɔaa Sakaria ano bieeɛ na ne kɛtrɛma saneeɛ na ofirii aseɛ kasaeɛ, na ohyiraa Nyankopɔn.

⁶⁵ Hu kaa bɛ a bɛte mpɔtamu hɔ nyinaa; na befirii aseɛ kaa yeinom nyinaa ho asɛm Yudea nkuro a ɔdeda mmepɔ so he nyinaa mu,

⁶⁶ na bɛ a bɛteeɛ nyinaa de siee bɛ akoma mu, na bebisaa sɛ, “Ɛɛne koraa ne abɔfra kumaa yi bɛyɔ?” Nea nti a bɛkaa saa ne sɛ, na bennim sɛ Awurade nsa ya abɔfra he so ampa.

Sakaria nhyira dwom

⁶⁷ Na Honhom Kronkron hyɛɛ ne papa Sakaria ma, na ɔhyɛɛ nkɔm sɛ:

⁶⁸ “Nhyira nka Awurade, Israel Nyankopɔn, sɛ wama n’ani aba ne nkurofoɔ so na wagye bɛ.

⁶⁹ Waama nkwagyeɛ abɛne n’akoa Dawid fie ama yɛ,

⁷⁰ sɛnea ɔnam n’adiyifoɔ kronkron a bɛtenaa ase tete he anum asɛ so aka

⁷¹ sɛ ɔbɛgye yɛ afiri yɛ atamfoɔ ne bɛ a bɛmpɛ yɛ asɛm nyinaa nsam he;

⁷² waahu yɛ agyanom mmɔbɔ de akaeɛ n’apam kronkron he,

⁷³ ntam a ɔka kyerɛɛ yɛ agya Abraham

⁷⁴ sɛ onya gye yɛ firi atamfoɔ nsam a, ɔbɛma yɛ ho kwane de asom no a yensuro,

⁷⁵ ahoteɛ ne tenenee mu n’anim, yɛ nna nyinaa.

⁷⁶ Na wo abɔfra kumaa yi, bɛbɛfrɛ wo Sorosoroni he diyifoɔ, efiri sɛ wobedi Awurade anim akosiesie n’akwane,

⁷⁷ na waama ne nkurofoɔ anya nkwagyeɛ a ɔnam bɛ bɔne fakyɛ so ba he ho nimdeɛ,

⁷⁸ yɛ Nyankopɔn mmɔborɔhunu nti. Saa mmɔborɔhunu yi nti adekyeɛ hann firi soro bepie yɛ so,

⁷⁹ ama bɛ a bɛtete sum ne wuo sunsum ase he anya hann, na wagye yɛ taataa akɔ asomdwie kwane so.”

⁸⁰ Na abɔfra kumaa he nyini yɛɛ dene honhom mu, na ɔtenaa serɛ so kosii da a oyii ne ho adi kyerɛɛ Israel.