Hebrifoɔ 6 - Apam Foforɔ

¹ Nti afei, homma yɛmfa Kristo ho mfitiasesɛm he nto nkyɛne, na yɛmpere nkɔ nkyerɛkyerɛ a ɔfata bɛ a bɛ anyini Kristo mu he, na yɛansane anto fapem a ɔfa yeinom ho bio: nnwuma funu ho adwensakra ne Nyankopɔn mu gyidie,

² nkyerɛkyerɛ a ɔfa asubɔ hodoɔ ho, nsa a bɛde gu nkurofoɔ so, awufoɔ sɔreeɛ, ne daa atemmuo ho.

³ Na sɛ Nyankopɔn ma kwane a, saa nnoɔma yi ne yɛbɛyɔ.

⁴ Na ontumi mma sɛ, bɛ a bɛahu hann he, na bɛaka soro ahennie akyɛdeɛ he ahwɛ, na bɛanya kyɛfa Honhom Kronkron mu,

⁵ na bɛaka Nyankopɔn asɛm he ho nnepa ahwɛ ne wiase a ɔɔba he mu tumi,

⁶ na afei bɛafiri (nɔkorɛ he) ho, esiane sɛ bɛ ankasa bɛbɔ Nyankopɔn Ba he asennua mu bio na bebu no animtia he, bɛbɛma bɛ nso bɛaba adwensakram bio.

⁷ Asaase a nsuo tɔ gu so daa, na ɔsõ aba ma bɛ a bɛyɔ so adwuma he, nya nhyira firi Nyankopɔn hɔ.

⁸ Na mmom sɛ ofifiri nkasɛe ne hwerɛmo a, onni mfasoɔ biaa na ɔbɛne nnome ho; n’awieeɛ ne sɛ bɛde bɛbɛhye no.

⁹ Adɔfonom, ɔyam sɛ yɛkasa saa kwane yi so deɛ, nso yɛwɔ awerɛhyɛmu sɛ ho fam deɛ nnoɔma pa bi ya hɔ ma ho, nnoɔma a ɔma nkwagyeɛ.

¹⁰ Nyankopɔn nyɛ deɛ ɔntene; na ommu n’ani ngu nwuma pa a ho yɔ ne dɔ a ɔno nti ho da no adi ya ahoteefoɔ som ho, na hogu so yɔ he ho.

¹¹ Na yɛpɛ sɛ ho mu biaa da mmɔdemmɔ korɔ he adi sɛdeɛ ɔbɛyɛ a hobenya anidasoɔ mu ahotɔsoɔ akosi awieeɛ,

¹² na hoannyɛ nyaa, na mmom hoasua bɛ a bɛnam gyidie ne aboterɛ so nyaa bɔhyɛ he.

Nyankopɔn bɔhyɛ a ɔyɛ nɔkorɛ

¹³ Mmerɛ a Nyankopɔn hyɛɛ Abraham bɔ he, esiane sɛ na bi nni hɔ a ɔsõ sene ɔno Nyankopɔn a ɔde no bɛka ntam nti, ɔno Nyankopɔn ankasa kaa ne ho ntam,

¹⁴ ɔkaa sɛ, “Nɔkorɛ di mehyira wo na mama wo ase atrɛ.”

¹⁵ Nti Abraham de ntoboaseɛ twene saa he, bɔhyɛ he baa mu maa no.

¹⁶ Ɔyɛ nɔkorɛ sɛ nipa biaa de deɛ ɔsõ kyɛne no ne ka ntam, na ntam hyɛ asɛm biaa mu dene na otwa akyingyegyeɛ biaa so.

¹⁷ Ɔno nti ne mmerɛ a Nyankopɔn yɔɔ n’adwene sɛ ɔbɛkyerɛ bɔhyɛ he ho diadeɛ he pefee ne botaeɛ a ɔnsesa he, ɔde ntam ne dii agyinamu,

¹⁸ sɛdeɛ ɔbɛyɛ a ɔnam nnoɔma mmienu a ɔnsesa so, sɛ Nyankopɔn ntumi nni torɔ, na yɛ a yɛadwane abɛtoa no he benya nkuranhyɛ a mu ɔdene na yɛasɔ anidasoɔ a ɔda yɛ anim he mu.

¹⁹ Yɛwɔ saa anidasoɔ a otim hɔ pintinn sɛ kra sɛkyɛ, anidasoɔ a ɔhyɛne mu de kosii ntwamutam he mu,

²⁰ baabi a yɛ nti Yesu adi kane ahyɛne hɔ na wayɛ sɔfopanyini ya daa Sɔfopanyini Melkisedek asɔfoyɛ kwane so.