Hebrifoɔ 3 - Apam Foforɔ

Kristo sene Mose

¹ Nti, me nuanom ahoteefoɔ a ho nso hoanya soro frɛ he, honhu sɛ Yesu ne yɛ yɛ gyidie he mu Somafoɔ ne Sɔfo panyini.

² Odii nɔkorɛ maa deɛ ɔfrɛɛ no he, sɛdeɛ Mose nso “dii nɔkorɛ Nyankopɔn fie nyinaa mu he.”

³ Nso Yesu wɔ animuonyam pii sene Mose, sɛdeɛ nipa a osi fie he wɔ anidie bebree sene fie he.

⁴ (Efiri sɛ, fie biaa, nipa ne si, na deɛ ɔyɔ ade nyinaa ne Nyankopɔn).

⁵ Na Mose deɛ, odii nɔkorɛ Nyankopɔn fie nyinaa so sɛ somfo, na odii adanseɛ faa nsɛm a Nyankopɔn bɛka no akyire he ho.

⁶ Nso Kristo deɛ, odii nɔkorɛ Nyankopɔn fie nyinaa so sɛ ba, na sɛ yɛsɔ nnamyɛ a yɛde kasa ne anidasoɔ a yɛde hoahoa yɛ ho he mu pintinn kosi awieeɛ a, ɔno ne ma yɛyɛ ne fiefoɔ.

Annyeannie ho kɔkɔbɔ

⁷ Nti sɛnea Honhom Kronkron ka he, “Nnɛ, sɛ hote ne nne a,

⁸ hommpirim ho akoma sɛ atuateɛ mmerɛ he, sɛ nsɔhwɛ mmerɛ he mu serɛ he so,

⁹ baabi a ho nananom sɔɔ mehwɛeɛ he, na behuu me nnwuma mfie aduannan.

¹⁰ Yei maa me bo fuu saa awoɔntoatoasoɔ he, na mekaa sɛ, ‘Bɛfom bɛ akomam daa, nso bɛ deɛ, na benhuu m’akwane.’

¹¹ Sɛdeɛ m’abufuo mu mekaa ntam sɛ ‘Bɛnnhyɛne me home mu da.’ ”

¹² Anuanom, honhwɛ yie, sɛdeɛ ɔbɛyɛ a bɔne ne annyeannie akoma ɔntwe ho mfiri teasefoɔ Nyankopɔn he nkyɛne.

¹³ Nso hontutu ho ho fo, da biaa a bɛ bɔ dini sɛ “Nnɛ,” na bɔne a ɔyɛ nnaadaa biaa amma ho mu na amma biaa ampirim n’akoma.

¹⁴ Nso gye sɛ yɛsɔ ahotɔsoɔ a yedii kane nyaeɛ he mu pintinn kosi awieeɛ, ansa na yɛanya kyɛfa Yesu mu ankasa.

¹⁵ Sɛdeɛ bɛkaa sɛ, “Nnɛ, sɛ hote ne nne a, hommpirim ho akoma sɛ berɛ a bɛhyɛɛ me abufuo he.”

¹⁶ Na hefoɔ ne bɛtee asɛm he nso bɛhyɛɛ no abufuo he? Ɔnyɛ bɛ a Mose dii bɛ anim de bɛfirii Misraim he nyinaa?

¹⁷ Bio nso, hefoɔ ne ne bofuu bɛ mfie aduannan he? Ɔnyɛ bɛ a bɛyɔɔ bɔne, na bɛ afunu totɔɔ serɛ he so he anaa?

¹⁸ Na ɔnyɛ asoɔdenfoɔ he ho ne ɔkaa ntam sɛ bɛnhyɛne n’ahomegyeɛ mu he?

¹⁹ Nti yɛahu sɛ annyeannie nti ne bɛantumi anhyɛne n’ahomegyeɛ mu.