Galatifoɔ 6 - Apam Foforɔ

Hommoaboa ho ho ho ho

¹ Anuanom, sɛ hohu sɛ bi afom a, ho a hoyɛ honhom mufoɔ he mfa akoma a ɔdwo mfa saa nipa he nsi yie. Honhwɛ ho ho yie sɛ ho nso bɛnnsɔ ho nhwɛ.

² Hommoaboa ho ho ho ho mma biaa ntumi nsoa ne nnesoa, na honam saa kwane he so awie Kristo mmara he so di.

³ Na sɛ bɛ a benni mu bu bɛ ho sɛ bedi mu a, bɛdaada bɛ ho.

⁴ Ɔsɛ sɛ biaa sɔ n’ankasa n’adwuma hwɛ. Na adwuma a biaa ayɔ he ne ɔde bɛhoahoa ne ho, na ɔnyɛ deɛ bi foforɔ ayɔ,

⁵ efiri sɛ ɔsɛ sɛ biaa soa n’ankasa ne nnesoa.

⁶ Ɔsɛ sɛ bɛ a bɛakyerɛkyerɛ bɛ asɛm he, bɛ ne bɛ akyerɛkyerɛfoɔ he kyɛ nnepa nyinaa.

⁷ Honnnaadaa ho ho, Nyankopɔn bensi no atwetwe, efiri sɛ, nea hobedua heaa ne hobɛtwa.

⁸ Sɛ hodua ma honam a, hobefiri honam mu atwa porɔeɛ; nso sɛ hodua no Honhom mu a, honam Honhom he so betwa daa nkwa.

⁹ Nti hommma yɛmmerɛ papayɔ mu, na sɛ yɛampa aba a, yɛbɛtwa so aba ne berɛ mu.

¹⁰ Ne saa nti, akwannya biaa a yebenya he, homma yɛnyɔ nnipa nyinaa papa, ne titire bɛ a bɛka agyidifoɔ abusua ho he.

Afutuo a otwatoɔ ne nhyira

¹¹ Hoahu ntwerɛeɛ akɛseɛ a meaa mede me nsa atwerɛ yi!

¹² Ɔyɛ bɛ a bɛpɛ sɛ bɛ anim bɛba nyam honam mu he ne bɛhyɛ ho sɛ hontwa twetia, sɛnea ɔbɛyɛ a bɛnntaa bɛ Kristo asennua he ho.

¹³ Twetiatwafoɔ he mpo nni mmara he so, nso bɛpɛ sɛ hotwa twetia na bɛagyina so ahoahoa bɛ ho.

¹⁴ Menhoahoa me ho bibiaa ho ka yɛ Awurade Yesu Kristo asennua a ɔnam so abɔ wiase asennua mu ama me, na me nso bɛabɔ me asennua mu ama wiase.

¹⁵ Ɔnyɛ twetia a bɛatwa bi, anaa twetia a bentwa bi ne hia, na mmom sɛ bi bɛyɛ abɔdeɛ foforɔ ne hia!

¹⁶ Na bɛ a bɛbɛfa saa nhyehyɛeɛ yi so he, asomdwie, ne mmɔborɔhunu, mmra bɛ ne Nyankopɔn mane Israel so.

¹⁷ Ofiri nnɛ ɔɔkɔ yi, mma biaa nhyɛ me brɛ; efiri sɛ mewɔ Yesu ahyɛnsodeɛ me nipadua mu.

¹⁸ Anuanom, yɛ Awurade Yesu Kristo adom nka ho honhom. Amen.