Filemon 1 - Apam Foforɔ

Nkyea

¹ Paulo, Kristo Yesu deduani, ne yɛ nua Timoteo, twerɛ krataa yi de kɔma yɛ dɔfoɔ ne yɛ yɔnko dwumayɔni Filemon,

² ne yɛ nuabaa Afia, ne Arkipus a ɔyɛ yɛ yɔnko sraani, ne asafo a ohyia wo fie he:

³ Adom ne asomdwie a ofiri yɛ Agya Nyankopɔn ne Awurade Yesu Kristo nka ho.

Filemon dɔ ne ne gyidie

⁴ Berɛ biaa a mɛkae wo me mpaebɔ mu he, meda me Nyankopɔn ase daa,

⁵ efiri sɛ, mete wo dɔ a wode dɔ ahoteefoɔ he nyinaa ne wo gyidie a wo wɔ no Awurade Yesu mu he.

⁶ Na mebɔ mpaeɛ sɛ wo gyidie mu ayɔnkofa he bɛma nnoɔma pa a ɔsɛ sɛ yɛyɔ no Kristo mu nyinaa ho nimdeɛ a mu dɔ ada adi.

⁷ Nɔkwasɛm di, me nua, ɔnam wo dɔ so ama manya anigye ne awerɛkyekyerɛ, efiri sɛ, woama ahoteefoɔ he, bɛ akoma atɔ bɛ yam.

Paulo di maa Onesimo

⁸ Yei nti, owom sɛ mewɔ akokoɔduro Kristo mu sɛ metumi ahyɛ wo ama woayɔ nea ɔsɛ sɛ woyɔ deɛ,

⁹ nso dɔ nti, me Paulo ankasa a meyɛ asafopanyini, na seeseiaa mesane yɛ Kristo Yesu deduani he, srɛ wo—

¹⁰ ama m’abɔfra Onesimo a mabɛyɛ n’agya m’afiase mpokyerɛ yi mu.

¹¹ (Mmerɛ bi a atwam he na ne so nni mfasoɔ ma wo, nso seesei deɛ, nɔkorɛ di, ne so aba mfasoɔ ama wo ɔne me).

¹² Meesoma no ama no asane aba wo nkyɛne bio, ɔyɛ nipa a ɔda m’akoma so paa.

¹³ Na nka mepɛ sɛ ɔtena me nkyɛne, sɛdeɛ ɔbɛyɛ a nka obesi w’anane mu asom me saa berɛ yi a ɔnam asɛmpa he nti, meya mpokyerɛ mu.

¹⁴ Nso mempɛ sɛ mefiri wo akyi yɔ bibiaa na anyɛ sɛ wo papayɔ he firi hyɛ mu, na mmom afiri woankasa wo pɛ mu.

¹⁵ Ebia yei nti ne ɔtwee ne ho firii wo nkyɛne mmerɛ kakra yi, na ɔnam so ama wanya no bio afebɔɔ.

¹⁶ Wonya no sɛ akoa bio na mmom deɛ ɔsene saa; sɛ ɔmmɛyɛ nua dɔfo, titire ya me fam, nso ɔbɛyɔ ne ɔboro so saa ama wo honam fam, na afei Awurade mu nso.

¹⁷ Nti sɛ wobu me sɛ wo yɔnko dwumayɔni deɛ a, gye no fɛ so sɛdeɛ nka wobɛgye me he.

¹⁸ Sɛ waafom wo kwane bi so a, anaa sɛ ɔde wo ka bi a, bu gu me so, na me ankasa metua.

¹⁹ Meaa Paulo ne mede me nsa ɔɔtwerɛ saa krataa yi sɛ metua ka biaa. Onhia mpo sɛ mɛkae wo sɛ wode me ka, mpo wo nipadua ho ka.

²⁰ Oo me nua, ampa, ma menya mfasoɔ mfiri wo hɔ Awurade mu! Ma m’akoma ntɔ me yam Kristo mu.

²¹ Meetwerɛ saa krataa yi abra wo yi, mewɔ ahotɔsoɔ sɛ wobetie, na menim sɛ wobɛyɔ akyɛne nea meesrɛ wo yi mpo.

²² Na yei akyi he siesie ahɔhodane ma me, efiri sɛ mewɔ anidasoɔ sɛ ho mpaebɔ nti ho nsa bɛka me bio.

Nkradie ne nhyira

²³ Me yɔnko deduani Kristo mu, Epafra,

²⁴ ɔne Marko, Aristarkus, Demas ne Luka a bɛyɛ me yɔnko adwumayɔfoɔ kyea wo.

²⁵ Awurade Yesu Kristo adom nka ho honhom ho.