Efesofoɔ 3 - Apam Foforɔ

Paulo adwuma ya Amanamane mufoɔ mu

¹ Yei nti ne me Paulo a meyɛ Kristo Yesu deduani ma ho amanamane mufoɔ,

² sɛnea hoate no nɔkorem dada, Nyankopɔn adom a ho nti ɔde maa me, som adwuma he

³ ɔne sɛnea ɔnam adiyie so yii ahintasɛm adi kyerɛɛ me, sɛnea m’adi kane atwerɛ no nsɛm tiaa bi mu he;

⁴ ɔno ne sɛ hokenkane a ɔbɛboa ho ama hoahu nteaseɛ a mewɔ no Kristo ho ahintasɛm mu.

⁵ Mmerɛ bi a atwa mu he woanyi saa ahintasɛm yi adi ankyerɛ nipa biaa, sɛnea nnɛ ɔnam Honhom he so abɛda no adi akyerɛ n’asomafoɔ ne adiyifoɔ kronkron he:

⁶ ɔne sɛ, Amanamane mufoɔ he abɛyɛ adedifoɔ te sɛ yɛ, nipadua korɔ heaa ho akwaa, na bɛnam asɛmpa he so anya bɔhyɛ he mu kyɛfa Kristo Yesu mu.

⁷ Mabɛyɛ saa asɛmpa yi ho somfoɔ sɛnea Nyankopɔn adom akyɛdeɛ teɛ, nea ɔde maa me sɛnea ne tumi yɔ adwuma he.

⁸ Ewom sɛ me ne ahoteefoɔ he nyinaa mu kumaa koraa, nso bɛde adom yi maa me sɛ memfa so nna asɛm a ɔyɛ Kristo ahonya mu a onni hwehwɛbea he adi nkyerɛ amanamane mufoɔ.

⁹ Na afei nso, waama nnipa nyinaa ahu nhyehyɛeɛ a bɛahyehyɛ a ɔfa ahintasɛm a bɛde asie tete mmerɛ nyinaa Nyankopɔn a ɔbɔɔ adeɛ nyinaa he mu;

¹⁰ sɛdeɛ ɔbɛyɛ a ɔnam asafo he so bɛda Nyankopɔn nyansa ahodoɔ bebree he adi akyerɛ mpanyinnie ne tumidie a bɛya soro,

¹¹ sɛnea Nyankopɔn timpɔ a wadi ho dwuma yɛ Awurade Kristo Yesu mu he teɛ.

¹² Ne mu na yɛnam gyidie so anya nnamyɛ ne akwanya, ahotɔsoɔ mu.

¹³ Yei nti mesrɛ ho sɛ hompa aba m’amanehunu a mehu ma ho he ho; ɔyɛ animuonyam ma ho.

Mpaeɛ a ɔbɔ maa akenkanfoɔ

¹⁴ Ne saa nti ne mebu nkotodwe Agya he anim,

¹⁵ nea befiri ne mu frɛ abusua biaa a ɔya soro ne asaase so he.

¹⁶ Mebɔ mpaeɛ sɛ, sɛnea n’ahonya animuonyam teɛ sɛ ɔbɛma ho mu nipadua a ahinta he ase atim tumi a ɔnam ne Honhom so he mu,

¹⁷ ɔne sɛ Kristo nam gyidie so bɛtena ho akoma mu, sɛdeɛ hoagye nhini na ho ase atim dɔ mu.

¹⁸ Mebɔ mpaeɛ sɛ hobenya tumi a ɔbɛma ho nteaseɛ, ho ne ahoteefoɔ he nyinaa, nea ɔtrɛ na ɔbae na ɔkrɔnn na mu dɔ,

¹⁹ na hoahu Kristo dɔ a ɔtra nimdeɛ nyinaa so, sɛnea ɔbɛyɛ a hobɛyɛ ma Nyankopɔn su nyinaa mu.

²⁰ Afei nea ɔwɔ tumi a ɔyɔ adwuma yɛ mu a ɔboro so kyɛne so sɛnea yebisa anaa yesusu he,

²¹ ɔno ne animuonyam nka no asafo he mu ne Kristo Yesu mu firi mmerɛsantene so kosi awoɔ ntoatoasoɔ nyinaa mu, daa daa. Amen.