Kolosefoɔ nwoma 1 - Apam Foforɔ

Aseda

¹ Paulo a ɔnam Nyankopɔn pɛ so yɛ Kristo Yesu somafoɔ ɔne yɛ nua Timoteo,

² twerɛ krataa yi de kɔma ahoteefoɔ ne anuanom a bɛyɛ Kristo mu agyidifoɔ a bɛya Kolose. Adom ne asomdwie a ofiri yɛ Agya Nyankopɔn hɔ nka ho.

Nkyea

³ Da biaa a yɛbɔ mpaeɛ ma ho he, yɛda Nyankopɔn a ɔyɛ yɛ Awurade Yesu Kristo Agya he ase;

⁴ efiri sɛ, yɛate ho gyidie a ɔya Kristo Yesu mu ho asɛm, ɔne dɔ a howɔ ma ahoteefoɔ he nyinaa,

⁵ ɔnam anidasoɔ a bɛahyehyɛ ama ho soro he nti. Saa anidasoɔ yi ne hoate ho asɛm dada, nɔkwasɛm a ɔyɛ asɛmpa

⁶ a aba ho nkyɛne na agye nhini ho mu he. Sɛnea ɔɔso aba na oonyini wiase nyinaa mu he, saa ne ɔɔso aba hoaa ho mu firi da a hoteeɛ na hotee Nyankopɔn adom he ase nɔkorɛ mu.

⁷ Hosuaa yei firii Epafra, yɛ nua dɔfoɔ a yɛ ne no yɛ Kristo mu nkoa he nkyɛne. Ɔyɛ nɔkorɛ somfo ma Kristo, a ogyina yɛ anane mu,

⁸ ɔno ne ama yɛ ahu ho dɔ a honam Honhom he so ada no adi he.

⁹ Saa nti, ofiri da a yɛteeɛ he, yennyaeɛ mpaebɔ ne nkotosrɛ sɛ Nyankopɔn pɛ ho nimdeɛ nhyɛ ho ma honhom mu nyansa ne nteaseɛ nyinaa mu,

¹⁰ na hoabɔ bra a ɔfata Awurade, a ɔsɔ n’ani koraa, berɛ a hooso aba nnwuma pa nyinaa mu, na ho akɔ so anya Nyankopɔn ho nimdeɛ pii nso.

¹¹ Na ahoɔdene a ofiri n’animuonyam tumi nyinaa mu mma honyɛ dene, na ama hoanya boasetɔ ne abodwokyɛre nnoɔma nyinaa mu, ya anigyeɛ mu,

¹² berɛ a hode aseda ɔɔma Agya a waama hoafata sɛ honya ahoteefoɔ a bɛya hann he mu agyapadeɛ mu kyɛfa.

¹³ Ɔno ne agye yɛ afiri sum tumi mu, na ɔde yɛ akotim ne dɔ Ba he ahennie mu,

¹⁴ ne mu ne yɛanya gyeɛ mapa ɔkyerɛ sɛ yɛanya bɔne fakyɛ nso.

¹⁵ Ɔno ne yɛ Nyankopɔn a benhu no he nsɛso ne abɔdeɛ nyinaa farebae;

¹⁶ efiri sɛ ɔnam ne so ne bɛbɔɔ nnoɔma nyinaa, deɛ ɔya soro ne deɛ ɔya asaase so, nnoɔma a yehu ne nnoɔma a yenhu, sɛ nhennwa oo, wuradie oo mpanyinnie oo, tumidie oo, bɛnam ne so ne bɔɔ ne nyinaa, na bɛbɔɔ ne nyinaa maa no.

¹⁷ Na ɔya hɔ ansa na nnoɔma nyinaa ɔɔba, na ne mu ne nnoɔma nyinaa atim.

¹⁸ Kristo yɛ ne nipadua he (meekyerɛ asafo he) ti; ɔno ne mfitiaseɛ, awufoɔ sɔreeɛ mu farebae, na ama no abɛyɛ adeɛ nyinaa mu kannifoɔ.

¹⁹ Efiri sɛ ɔsɔɔ Nyankopɔn ani sɛ Nyamesu nyinaa ntena Kristo mu,

²⁰ na Nyankopɔn nam Kristo so apata ɔno Nyankopɔn ne nnoɔma nyinaa ntam koraa. Ɔne sɛ, ɔnam Kristo asennua ho mogyaa so asiesie Nyankopɔn ne nnoɔma a ɔya asaase so ne soro nyinaa ntam; na ɔnam nkabom yi so ama asomdwie aba.

²¹ Na ho a kane he na hoyɛ atuatefoɔ ne atamfoɔ adwene fam ne nwuma bɔne mu he,

²² afei deɛ Kristo nam ne honam mu wuo so apata ho ne no ntam, na ama ɔde ho akɔ Nyankopɔn anim sɛ nnipa kronkron a dɛm ne asɛm biaa nni ho ho;

²³ nso gye sɛ hokɔ soaa tena gyidie he mu, na hogyina ho fapem he so pintinn a homma bɛntwe ho mfiri asɛmpa he anidasoɔ a hoteeɛ a bɛaka no wiase abɔdeɛ nyinaa mu, a me Paulo mayɛ ho somfoɔ he ho.

Somafoɔ he amanehunu

²⁴ Afei ho nti, m’ani gye m’ahohiahia mu, efiri sɛ, me honam mu amanehunu he da Kristo amanehunu he adi, ɔnam ne nipadua ne asafo he nti.

²⁵ Mabɛyɛ asafo he somfo sɛnea Nyankopɔn adwuma a ɔde ahyɛ me nsa ho fam he teɛ, sɛ memma nnipa nhu Nyankopɔn asɛm he yie,

²⁶ ahintasɛm a mmeresantene ne awoɔntoatoasoɔ mu ohintaeɛ, ne bɛayi no adi akyerɛ yɛ a yɛyɛ n’ahoteefoɔ yi.

²⁷ Bɛne Nyankopɔn ayi bɛ sɛ benhu sɛnea n’ahintasɛm yi animuonyam kɛseɛ he bɛda adi amanamane mufoɔ mu, ɔno ne Kristo a ɔya ho mu a ɔyɛ animuonyam anidasoɔ he.

²⁸ Ɔno ne yɛpae mu ka n’asɛm, na yɛbɔ kɔkɔ de nyansa kyerɛkyerɛ biaa, na yɛde ankorankorɛ biaa akɔ Nyankopɔn anim sɛ nipa a wawie pɛyɛ Kristo mu.

²⁹ Yei nti ne mepre de m’ahoɔdene nyinaa yɔ adwuma sɛnea n’ahoɔdene kanyane me he.