Adiyisɛm 3 - Apam Foforɔ

Krataa a ɔtwerɛ kɔmaa Sardi asafo he

¹ “Twerɛ krataa kɔma Sardi asafo he mu bɔfoɔ sɛ: “Yei ne nsɛm a ofiri nea ɔwɔ Nyankopɔn ahonhom nson ne nsoromma nson he nkyɛne. “Menim wo nnwuma; wowɔ dini sɛ wote ase deɛ, nso woawu.

² Nti nyane na kanyane nea aka wo nkyɛne he na anwu koraa, na menhuu wo nnwuma sɛ ɔyɛ pɛ me Nyankopɔn anim.

³ Kae nea wonyaeɛ na woteeɛ he, di so na sakra w’adwene firi wo bɔne ho. Sɛ woanwɛne a, mɛba wo so te sɛ korɔmfoɔ, na wonhu dɔnhwere korɔ a mɛba wo nkyɛne.

⁴ “Nso ho mu kakraa bi a bɛya Sardi he mfaa wiase nkekaeɛ nkekaa bɛ ntaadeɛ mu. Na bɛ ne me bɛnante berɛ a bɛhyɛ ntaade fitaa, efiri sɛ, bɛfata sɛ bɛyɔ saa.

⁵ Na deɛ odi nkunim he bɛbɛhyɛ no ataade-fitaa, na mempopa ne dini mfiri nkwa nwoma he mu. Mɛbɔ ne dini ahyɛ no animuonyam m’Agya ne n’abɔfoɔ anim.

⁶ Nea ɔwɔ aso he ntie nea Honhom he ka kyerɛ asafo ahodoɔ he.

Krataa a ɔtwerɛ kɔmaa Filadelfia asafo he

⁷ “Twerɛ krataa kɔma Filadelfia asafo he mu bɔfoɔ he sɛ: Yei ne asɛm a ofiri nea ɔyɛ kronkron, a ɔyɛ nɔkwafoɔ a okita Dawid safoa a sɛ obie a, bi ntumi nto mu, na ɔto mu nso a, bi ntumi mmie, he nkyɛne.

⁸ “Menim wo nnwuma. Hwɛ, mede pono bi a mabie a bi ntumi ntom asi w’anim. Menim sɛ wowɔ tumi ketewa bi deɛ, nso woadi me nkyerɛkyerɛ he so na woampa me dini.

⁹ Hwɛ! Mɛma bɛ a befiri Satan hyiadane mu, a bedi torɔ ka sɛ bɛyɛ Yudafoɔ, nso bɛnyɛ bi he abɛkoto wo nane ase, na bɛ nyinaa ahu sɛ medɔ wo.

¹⁰ Esiane sɛ woadi m’ahyɛdeɛ so boasetɔ mu nti, sɛ haw a ɔɔba wiase nyinaa abɛsɔ asaase so nnipa nyinaa ahwɛ he ba a, mɛgye wo afiri mu.

¹¹ Ɔnkyɛre biaa mɛba. Sɔ nea wowɔ he mu dene, na bi annye wo nkunim abotire he.

¹² Nea obedi nkunim he, mɛma no ayɛ me Nyankopɔn asɔredane he fapem titire, na ommfiri mu bio da. Mɛtwerɛ me Nyankopɔn dini ne me Nyankopɔn kuro dini a ɔyɛ Yerusalem foforɔ a obefiri soro me Nyankopɔn nkyɛne aba he agu ne ho. Bio, mɛtwerɛ me dini foforɔ agu ne ho.

¹³ Nea ɔwɔ aso he ntie nea Honhom he ka kyerɛ asafo ahodoɔ he.

Krataa a ɔtwerɛ kɔmaa Laodikea asafo he

¹⁴ “Twerɛ krataa kɔma Laodikea asafo mu bɔfoɔ he sɛ: Yei ne asɛm a ofiri Amen a ɔyɛ danseni nɔkwafoɔ a ɔyɛ bibiaa a Nyankopɔn bɔeɛ he abɔseɛ nkyɛne.

¹⁵ “Menim wo nnwuma. Wo a wonyɛ nwunu, wo nso a wonyɛ hye. Sɛ woyɛ nwunu anaa hye a, nka ɔyɛ!

¹⁶ Nso esiane sɛ woyɛ botrobodwo na wonyɛ hye, wo so a wonyɛ nwunu nti, mɛfe wo afiri m’anum.

¹⁷ Woka sɛ, ‘Meyɛ defoɔ na maanya me ho, na mewɔ nea ohia me nyinaa.’ Nso wonnim hia a ahia wo ne mmɔbɔ a woyɛ. Woyɛ hiani. Woda adagya, na w’ani nso afira.

¹⁸ Nti metu wo fo sɛ tɔ sikakɔkɔɔ a bɛabere ho gya mu, firi me nkyɛne sɛnea ɔbɛma woayɛ defoɔ. Afei tɔ ntaadeɛ fitaa hyɛ fa kata w’adagya a ama w’anim agu ase he so. Afei tɔ aniduro sra w’ani so sɛnea wobehu adeɛ.

¹⁹ Mekɔ so twe bɛ a medɔ bɛ he nyinaa aso. Nti bɔ mmɔdene na sakra w’adwene.

²⁰ Hwɛ! Megyina pono he akyi ɔɔbɔ mu, sɛ bi te me nne na obie pono he a, mɛba mu na me ne no abedidi na ɔno nso ne me adidi.

²¹ Mɛma nkunimdifoɔ he atena m’ahennwa he so sɛnea madi nkunim nti mete m’Agya ahennwa so seesei he.

²² Ma nea ɔwɔ aso he ntie nea Honhom he ka kyerɛ asafo ahodoɔ he.”