Adiyisɛm 14 - Apam Foforɔ

Adwammaa he ne ne nkurɔfoɔ

¹ Afei mehwɛeɛ, na hwɛ, mehuu Adwamaa he sɛ ogyina Sion Bepɔ so. Na nnipa mpemha aduannan nnan ka ne ho a bɛatwerɛ ne dini ne n’agya dini bɛ moma so.

² Na metee nne bi firi soro te sɛ nsuworoeɛ a ano ɔdene, na ɔte sɛ apranaa nso. Nne a meteeɛ he te sɛ nnwom a sankubɔfoɔ bi ɔɔbɔ no ne sankuo so.

³ Na bɛtoo dwom foforɔ bi, ahennwa ne ateasefoɔ nnan ne mpanyimfoɔ he anim, na biaa antumi ansua dwom he, gye nnipa mpem ha aduannan nnan a bɛagye bɛ afiri asaase so he nko.

⁴ Yeinom ne nnipa a bɛamfa adwamammɔ angu bɛ ho fi, na bɛyɛ mmabunu. Baabiaa a Adwamaa he bɛkɔ he, na bedi n’akyi. Bɛagye bɛ nkwa afiri nnipa mu, na bɛne nnipa a bedi kane a bɛde bɛ ama Nyankopɔn ne Adwamaa he.

⁵ Na bɛante torɔsɛm biaa amfiri bɛ anum; na dɛm biaa nni bɛ ho.

Abɔfoɔ mmeɛnsa he

⁶ Afei mehuu bɔfoɔ foforɔ bi sɛ watu nam soro soro a ɔɔkɔka Asɛmpa a ontwam da he akyerɛ asaase so nnipa a amane ne mmusuakuo ne kasa ne nkurofoɔ nyinaa ka ho.

⁷ Ɔde nne kɛseɛ teaam sɛ, “Honsuro Nyankopɔn na honkamfo ne kɛseyɛ, efiri sɛ, berɛ he aduru sɛ obu adasamma atɛne. Honsom nea ɔbɔɔ soro, asaase, po ne nsuti he!”

⁸ Bɔfoɔ a ɔto so mmienu dii akyire kaa sɛ, “Wahwe ase! Babilon kɛseɛ ahwe ase, efiri sɛ waama amanamane nyinaa anom n’adwamammɔ nsa dendene he bi.”

⁹ Bɔfoɔ a ɔto so mmeɛnsa dii bɛ akyi teaam kaa sɛ, “Biaa a ɔsom aboa he ne ne sɛso honyini a na ɔma bɛhyɛ ne nsa ho anaa ne moma so agyinaeɛ

¹⁰ he ankasa bɛnom Nyankopɔn abufuo nsa korɔgyee a bɛahwie agu n’abufuo kuruwa mu he bi. Bɛ a bɛbɛyɔ saa he nyinaa, bɛbɛhyɛ no aniɔyeyaa gya ne sɔfe mu, abɔfoɔ ne Adwamaa he anim.

¹¹ Na gya he wusie a ɔhyɛ bɛ aniɔyeyaa he foro kɔ soro daa daa. Na bɛ a bɛsomm aboa he ne ne sɛso honyini he onnya home biaa, awia anaa anadwo.”

¹² Yei nti ne ɔsɛ sɛ Nyankopɔn nkurofoɔ ne bɛ a bedi Nyankopɔn mmara so na bɛgye Yesu di he nya boasetɔ he.

¹³ Afei metee nne bi firi soro a ɔkaa sɛ, “Twerɛ yei: Honhom he dɛ, Nhyira ne awufoɔ a bewu Awurade mu firi seesei ɔɔkɔ yi, ampa, bɛbɛhome afiri bɛ brɛ he mu; na bɛ nnwuma di bɛ akyi.”

¹⁴ Na mehwɛeɛ, na hwɛ, mununkum fitaa bi a na abɔdeɛ bi a na ɔte so he te sɛ nipa a sikakɔkɔɔ abotire bɔ ne ti na okita kantankrankyi nnamnnam bi di.

¹⁵ Na bɔfoɔ foforɔ bi firii asɔredane he mu pieeɛ, teaam kyerɛɛ nea ɔte mununkum he so he sɛ, “Fa wo kantankrankyi he twa, efiri sɛ, twaberɛ he aduru; asaase he aso aba a ɔsɛ sɛ betwa!”

¹⁶ Nti nea ɔte mununkum so he hwimm ne kantankrankyi asaase so ma otwaa asaase so nnɔbae.

¹⁷ Afei mehuu bɔfoɔ foforɔ bi a ofiri soro asɔredane mu apie a ɔno nso kita kantankrankyi nnamnnam bi.

¹⁸ Bɔfoɔ foforɔ bi a ɔno nso hwɛ gya so firi afɔrebokyia he mu pieeɛ. Ɔteaa bɔfoɔ a okita kantankrankyi nnamnnam he sɛ, “Fa wo kantankrankyi nnamnnam he twitwa asaase so bobe aba akuoakuo he, efiri sɛ, n’aba he abere.”

¹⁹ Nti bɔfoɔ he himm ne kantankrankyi he asaase so de twitwaa bobe aba he na ɔde koguu Nyankopɔn abufuo nsa-kyi-amena kɛseɛ he mu.

²⁰ Na betiatiaa nsa-kyi-amena he so kuro he akyi, na mogyaa firii nsa-kyi-amena he mu taa hɔ foro koduru bɛyɛ sɛ apɔnkɔ nnareka ho, na ɔtenee kɔɔ bɛyɛ nkwansini ha aduowɔtwe nnan.