Asomafoɔ 8 - Apam Foforɔ

Bɛtaa agyidifoɔ

¹ Saulo nso penee kuu a na beeku Stefano he so. Saa da he taa kɛseɛ bi baa asafo a ɔya Yerusalem he so; na bɛ nyinaa bɔ hwetee Yudea ne Samaria nyinaa.

² Na mmeema nyamesurofoɔ bi faa Stefano kosiee no, na besuu no pii.

³ Nso Saulo firii aseɛ tuu n’ani sii asafo he so. Owurawuraa afie mu kɔtwee mmaa ne mmeema de bɛ koguu afiase.

⁴ Na afei bɛ a bɛabɔ ahwete he kyinii asaase he so pae mu kaa asɛmpa he.

⁵ Filipo kɔɔ Samaria kuro he mu na ofirii aseɛ pae mu kaa Agyenkwa he ho asɛm kyerɛɛ bɛ.

⁶ Berɛ a nnipakuo he tieeɛ na behuu nsɛnkyerɛnne a Filipo ɔɔyɔ he, bɛde akoma korɔ tiee no.

⁷ Na nnipa pii wɔ ahonhom fi, na ahonhom fi he de nne kɛseɛ teateam firii bɛ mu firiiɛ. Afei nso, mmubuafoɔ ne mpakye pii nyaa ayaresa.

⁸ Nti anigyeɛ kɛseɛ baa saa kuro he mu.

⁹ Afei na beema bi ya kuro he mu a bɛfrɛ no Simon, a na oyi nkonyaa ma Samaria mane he ho dwirii bɛ, na ɔka sɛ ɔyɛ nipa kɛseɛ.

¹⁰ Na bɛ nyinaa, firi nkumaa so kosi akɛseɛ so tie no ka sɛ, “Yei ne Nyankopɔn Tumi a bɛfrɛ no Kɛseɛ.”

¹¹ Na bɛyɛɛ dinn tie no efiri sɛ na ɔnam nkonyaa so ama bɛ ho adwiri bɛ akyɛre.

¹² Na afei, berɛ a bɛgyee Filipo a na ɔɔka Nyankopɔn ahennie he ho asɛmpa ne Yesu Kristo dini he diiɛ he, ɔbɔɔ bɛ asu, mmaa ne mmeema nyinaa.

¹³ Mpo Simon nso gye diiɛ. Na bɛbɔɔ no asu wieeɛ he, na ɔtaa ne Filipo nante. Na nsɛnkyerɛnne ne ahoɔdenneɛ a ohuiɛ he yɛɛ no ahodwiri.

¹⁴ Na afei asomafoɔ a bɛya Yerusalem tee sɛ Samariafoɔ agye Nyankopɔn asɛm he, bɛsomaa Petro ne Yohane kɔɔ bɛ nkyɛne.

¹⁵ Bɛ mmienu he kɔbɔɔ mpaeɛ maa bɛ sɛ bɛ benya Honhom Kronkron he

¹⁶ efiri sɛ obesi saa bere he na Honhom he mmaa bɛ mu biaa so; na mmom asu kɛkɛ na na bɛabɔ no Awurade Yesu dini mu.

¹⁷ Na afei Petro ne Yohane de bɛ nsa guu bɛ so, na benyaa Honhom Kronkron he.

¹⁸ Berɛ a Simon huu sɛ asomafoɔ he nsa a bɛde guu binom so he maa Honhom baa bɛ so he, ɔyɔɔ sɛ ɔɔma bɛ sika.

¹⁹ Na ɔkaa sɛ, “Homma me nso saa tumi yi bi sɛ ɔbɛyɛ na nipa biaa a mede me nsa begu ne so he benya Honhom Kronkron he.”

²⁰ Nso Petro ka kyerɛɛ no sɛ, “Wo ne wo sika nyinaa nsɛe, efiri sɛ wodwene sɛ wobetumi de sika atɔ Nyankopɔn akyɛdeɛ!

²¹ Wonni agyapadeɛ anaa kyɛfa ya asɛm yi mu, efiri sɛ w’akoma ntene Nyankopɔn anim.

²² Sakra w’adwene ya saa bɔne a woayɔ yi ho, na srɛ Awurade sɛ, sɛ ɔbeyɛyie a ɔmfa bɔne a woasusu no w’akoma mu he nkyɛ wo.

²³ Na maahu sɛ woyɛ anibereɛ paa, na amumuyɔ ahyɛ wo so.

²⁴ Simon buaa sɛ, Honsrɛ Awurade mma me, sɛ na nea hoaka he mu biaa amma me so.”

²⁵ Afei Petro ne Yohane dii adanseɛ na bɛkaa Awurade asɛm wieeɛ he, bɛsane kɔɔ Yerusalem, na bɛkaa asɛm pa he Samaria Nkuraa pii ase.

²⁶ Afei Awurade bɔfoɔ bi ka kyerɛɛ Filipo sɛ, “Sɔre na kɔ anaafoɔ fam hɔ kwane a ofiri Yerusalem kɔ Gaza he.” (Yei yɛ serɛ so kwane).

²⁷ Nti ɔsɔre kɔeɛ. Na hwɛ, Etiopiani panyini bi a odi mu paa di. Na ɔyɛ Etiopiafoɔ hemaa Kandake Fotosanfoɔ. Na waaba Yerusalem akɔsom

²⁸ na ɔte ne teaseɛnam mu ɔɔsane akɔ a ɔɔkenkane diyifoɔ Yesaia nwoma he.

²⁹ Nti Honhom he ka kyerɛɛ Filipo sɛ, “Twe bɛne teaseɛnam yi.”

³⁰ Nti Filipo tuu mirika kɔɔ ho na ɔtee sɛ ɔɔkenkane diyifoɔ Yesaia nwoma he; na obisaa sɛ, “Wote nea wookane yi ase?”

³¹ Na obuaa sɛ, “Sɛ bi ankyerɛ me a; ɔbɛyɛ dɛ na mate aseɛ?” Na ɔtoo nsa frɛɛ Filipo sɛ ɔmmra teaseɛnam he mu mmɛtena ne nkyɛne.

³² Twerɛsɛm mu nsɛm a na ɔɔkane he di: “Bɛde no baeɛ sɛ dwane a beebeku no, na sɛnea dwammaa tɔ mum nea otwitwa ne ho nwi anim he, wammie n’ano.

³³ Berɛ a bɛbrɛɛ no ase he, bebuu no ntɛnkyea. Hwane ne ɔbɛkyerɛ n’abusua? Efiri sɛ bɛafa ne nkwa afiri asaase so kɔ.”

³⁴ Etiopiani panyini he bisaa Filipo sɛ, “Mepa wo kyɛw, hwane ne diyifoɔ yi ɔɔka ne ho asɛm yi? Ɔno ankasa anaa nipa foforɔ?”

³⁵ Na Filipo biee n’ano, na ogyinaa saa twerɛsɛm heaa so kaa Yesu ho asɛm kyerɛɛ no.

³⁶ Na bɛnam kwane so ɔɔkɔ he, beduruu nsuo bi ho. Na Etiopiani he kaa sɛ, “Hwɛ, nsuo di! Ɛɛne ne si me asubɔ ho kwane?” [

³⁷ Na Filipo kaa sɛ, “Sɛ wode w’akoma nyinaa gye di a adeɛ biaa nsi wo kwane.” Na Etiopiani he kaa sɛ, “Megye di sɛ Yesu Kristo yɛ Nyankopɔn Ba.”]

³⁸ Na Filipo maa teaseɛnam he gyinaeɛ, na Filipo ne Etiopiani panyini he, siane kɔɔ nsuo he mu, na Filipo bɔɔ no asu.

³⁹ Na berɛ a befiri nsuo he mu pieeɛ he, Awurade Honhom hwim Filipo kɔeɛ, na Etiopiani he anhu no bio, na ɔde anigyeɛ kɔɔ ne kwane.

⁴⁰ Na Filipo kopiee Asdod, na ɔkɔfaa asaase he so toaa so pae mu kaa asɛmpa he kyerɛɛ nkuro he nyinaa kosii sɛ oduruu Kaesarea.