Asomafoɔ 4 - Apam Foforɔ

¹ Afei berɛ a Petro ne Yohane ɔɔkasa akyerɛ nkurofoɔ he, asɔfoɔ mpanyimfoɔ ne asɔrefie hwɛfoɔ he ne Sadukifoɔ he baa bɛ so,

² na bɛ bo afu sɛ asuafoɔ he nam Yesu wusɔreɛ he ɔɔkyerɛkyerɛ nkurofoɔ he wusɔreɛ ho asɛm.

³ Nti bɛkyee bɛ kɔtoo afiase ma adeɛ kyeeɛ, efiri sɛ na adeɛ asa dada.

⁴ Na bɛ a bɛtee asɛm a Petro ne Yohane kaeɛ he mu bebree gye diiɛ, na bɛ dodoɔ bɛyɛ mpemnum.

⁵ Adeɛ kyeeɛ he, bɛ atumfoɔ ne mpanyimfoɔ ne atwerɛfoɔ he hyiaam Yerusalem,

⁶ a na sɔfo panyini Anas, ne Kaiafa, ne Yohane ne Aleksandro, ne bɛ mu pii a na bɛyɛ sɔfo panyini he abusuafoɔ nso ka ho.

⁷ Na bɛde Petro ne Yohane begyinaa bɛ mfimfini firi aseɛ bisabisaa bɛ sɛ: “Mmɛ tumi ne hode yɔɔ yei anaa hwane dini mu ne hoyɔɔ saa?”

⁸ Na Petro a Honhom Kronkron he ahyɛ no ma he kaa sɛ, “Mane atumfoɔ ne mpanyimfoɔ,

⁹ sɛ nnɛ hogyina papa a yɛayɔ ama yarefoɔ yi so ɔɔhwehwɛ yɛ nsɛm mu ahu nea ɔnam ne so ama beema yi ho atɔ no a,

¹⁰ hedeɛ ho ne nnipa a hoya Israel nyinaa nhu sɛ ɔnam Nasareni Yesu Kristo a hobɔɔ no asennua mu a Nyankopɔn nyane no firii awufoɔ mu he dini so ne saa beema yi nyaa ayaresa.

¹¹ Saa Yesu yi ne, boɔ a ho adansifoɔ poo no a wabɛyɛ tweaso ti boɔ he.

¹² Nkwagyeɛ nni bi foforɔ mu, efiri sɛ dini foforɔ biaa nni soro anaa asaase so a bɛde ama nnipa sɛ bɛmfa so nye yɛ nkwa ka Yesu dini ho.”

¹³ Na behuu sɛnea Petro ne Yohane kasa akokoɔduro so he, na behuu sɛ bɛyɛ nnipa a bensuaa nwoma na bɛyɛ mpapahwekwaa he, ɔyɛɛ bɛ nwanwa. Na behuu sɛ na bɛne Yesu ne nanteeɛ.

¹⁴ Na bɛhwɛɛ nipa a bɛasa no yareɛ he sɛ ogyina Petro ne Yohane nkyɛne he, bɛanya hwee anka antia bɛ.

¹⁵ Na bɛhyɛɛ bɛ sɛ bemfiri dwa he mu mfiri adi, na betuu agyina.

¹⁶ Na bɛkaa sɛ, “Ɛɛne ne yɛbɛyɔ nnipa yi? Na nsɛnkyerɛnne a ɔnam bɛ so aba he ada adi ya bɛ a bɛte Yerusalem nyinaa anim; na yentumi nnye ho akyinnye.

¹⁷ Na sɛ ɔbɛyɔ na ɔnkɔ so nterɛ nnipa he mu nti, homma yɛmmara bɛ sɛ bɛnnka dini yi ho asɛm nkyerɛ nipa biaa bio.”

¹⁸ Nti bɛfrɛɛ bɛ hyɛɛ bɛ sɛ bɛnnka asɛm na bɛnkyerɛkyerɛ Yesu dini mu baabiaa.

¹⁹ Nso Petro ne Yohane buaa bɛ sɛ, “Sɛ ɔtene Nyankopɔn anim sɛ yetie ho sene Nyankopɔn a, ho ankasa hommua.

²⁰ Na yɛ mmom deɛ, nea yɛate na yɛahu he, yentumi nnyae ho asɛm ka da.”

²¹ Na behunahunaa bɛ bio he, begyae bɛ esiane sɛ bɛannya bibiaa a bebegyina so atwe bɛ aso ɔnam nkurofoɔ he nti, efiri sɛ, na nkurofoɔ he nyinaa ɔɔhyɛ Nyankopɔn animuonyam ya nea asi he ho.

²² Na beema a bɛnam anwanwakwane so saa no yadeɛ he adi boro mfie aduannan.

Asafo he mpaebɔ

²³ Begyae bɛ he, bɛkɔɔ bɛ mfɛfoɔ nkyɛne kɔkaa nea sɔfopanyini ne mpanyimfoɔ he ka kyerɛɛ bɛ he kyerɛɛ bɛ.

²⁴ Bɛtee yei he bɛde akoma korɔ maa bɛ nne so bɔɔ mpaeɛ sɛ, “Nyame Tumfoɔ, wo ne wobɔɔ soro ne asaase, po ne mu nnoɔma nyinaa,

²⁵ na wonam Honhom Kronkron so faa yɛ nana Dawid a ɔyɛ w’akoa so kaa sɛ: ‘Ɛɛne nti ne Amanamane yɛ gyegyeegye na nkurofoɔ susu ade hunu?

²⁶ Asaase so ahemfo sɔre gyina, na atitire hyiaa faako sɔre tia Awurade ne ne Kristo he.’

²⁷ Na Herode ne Pontio Pilato ne amanamane mufoɔ ne Israelfoɔ ka boom tiaa w’akoa kronkron Yesu a woasra no

²⁸ sɛ ɔmmɛyɔ nea wo nsa ne wo agyina ahyɛ ato hɔ sɛ ɔbɛba he.

²⁹ Na afei, Awurade, hwɛ bɛ ahunahuna, na ma wo nkoa mfa akokoɔduro nyinaa nka w’asɛm,

³⁰ berɛ a wotene wo nsa sa yadeɛ, na wonam w’akoa kronkron Yesu dini so yɔ nsɛnkyerɛnne ne anwanwadeɛ yi.”

³¹ Berɛ a bewiee mpaebɔ he, baabi a behyiaam he wosoeɛ, na Honhom Kronkron bɛhyɛɛ bɛ nyinaa mama na bɛde akokoɔduro kaa Nyankopɔn asɛm he.

Asafo mu anuadɔ

³² Na afei bɛ a bɛgye diiɛ he mu bebree akoma ne bɛ kra yɛɛ baako, na bɛ mu biaa nka sɛ ne nnoɔma a ɔwɔ yɛ ɔno nkoaa ne dea, na mmom bɛ nnoɔma nyinaa yɛ kwasafodeɛ.

³³ Asomafoɔ he de tumi kɛseɛ dii adanseɛ faa Awurade Yesu wusɔreɛ he ho, na adom kɛseɛ baa bɛ nyinaa bɛ so.

³⁴ Bɛ mu biaa nni hɔ a na bibi hia no, efiri sɛ na bɛ a bɛwɔ nsaase anaa afie he nyinaa tɔno de nea benya he ba

³⁵ bɛhyɛ asomafoɔ he nsa ma bɛkyekyɛ ma biaa sɛnea n’ahiadeɛ teɛ.

³⁶ Nti Yosef a asomafoɔ he too ne dini Barnaba, a asekyerɛ ne Futufoɔ, Lewini a ofiri Kipro,

³⁷ a ɔwɔ asaase bi he, tɔno de sika he bɛhyɛɛ asomafoɔ he nsa.