Asomafoɔ 20 - Apam Foforɔ

Paulo kɔɔ Makedonia ne Hela

¹ Na afei basabasa he ano berɛ ase he, Paulo soma ma bɛkɔfrɛɛ asuafoɔ he, na ɔhyɛɛ bɛ nkurane gyaa bɛ kwane he, ogyaa bɛ hɔ kɔɔ Makedonia.

² Berɛ a ɔkɔfaa mpɔtamu hɔ na ɔhyɛɛ bɛ nkurane pii he, ɔbaa Hela,

³ bedii bosome mmeɛnsa. Na berɛ a ɔɔbɛkɔ Siria he Yudafoɔ he bɔɔ ne ho pɔ. Ne saa nti ɔyɛɛ n’adwene sɛ ɔbɛkɔ akɔfa Makedonia mmom ne akɔ.

⁴ Na bɛ a bɛka ne ho ne Beroiani Piro ba Sopater, Aristako ne Sekundo a bɛyɛ Tesalonikafoɔ, Derbeni Gaio, Timoteo, Asiafoɔ Tihiko ne Trofimo.

⁵ Yeinom dii yɛ anim kane kɔtwɛnee yɛ Troa.

⁶ Na Paanoo a Mmɔreka nnim Afahyɛ he akyi he, yɛtenaa hyɛne mu firii Filipi, na nnanum ntam he, yɛkɔtoo bɛ Troa. Na yedii nnanson hɔ.

Paulo ne Troas asɔremma dii nkra

⁷ Da a odi nnanwɔtwe kane he, berɛ a na yɛahyiam oobubu paanoo he, Paulo firi aseɛ sɛ ɔne bɛ ɔɔkasa, efiri sɛ na waayɛ n’adwene sɛ adeɛ kye a obefiri hɔ. Nti ɔtoaa so kasaeɛ a kosii anadwo dasuom.

⁸ Nti na nkanea pii ya abrosane so dane a na yɛahyia mu he mu.

⁹ Paulo gu so ɔɔkasa he, abranteɛ bi a bɛfrɛ no Eutiko a na ɔte mpomaa mu faa mu daa hatee, na berɛ he mu he ofirii abrosane a ɔtɔ so mmeɛnsa he so bɛhwee fam, na bɛmaa no so he, na waawu.

¹⁰ Nso Paulo siane kɔɔ fam kobutuu ne so, na ɔbamm no kaa sɛ, “Honhaehae, ne kra da so ya ne mu.”

¹¹ Afei Paulo foroo abrosane he, na ɔfaa paanoo diiɛ he, ɔtoa so ne bɛ dii nkɔmmɔ kɔpem ahemakye ansa na ɔɔkɔ.

¹² Na bɛde abeemaa he baeɛ a na wasane anya nkwa. Na bɛ werɛ kyekyere paa.

Paulo firii Troas kɔɔ Mileto

¹³ Afei yedii kane kɔtenaa hyɛne mu kɔɔ Aso, baabi a na yɛayɔ adwene sɛ yɛbɛfa Paulo he, efiri sɛ berɛ a ɔka kyerɛɛ yɛ sɛ yɛnyɔ saa he, ɔno ankasa yɔɔ adwene sɛ ɔbɛnante akɔ.

¹⁴ Na ohyiaa yɛ Aso he, yɛfaa no tenaa yɛ kodoɔ he mu de no kɔɔ Mitelene.

¹⁵ Na yɛkaa kodoɔ he firii hɔ, na adeɛ kyeeɛ he yeduruu bea bi a na ɔne Kio di animhwɛ, na da a odi hɔ he yeduruu Samo, na adeɛ kyee bio he yɛbaa Mileto,

¹⁶ efiri sɛ na Paulo asi gyinaeɛ sɛ onnyina Efeso, sɛnea ɔbɛyɛ a ɔnseɛ berɛ Asia mpɔtamu, efiri sɛ na ne ho pere no sɛ, nka obetumi, akoduru Yerusalem da a bedi Pentekoste afahyɛ he.

Paulo ne Efeso mpanyimfoɔ dii nkra

¹⁷ Na ɔya Mileto he ɔsoma nnipa kɔɔ Efeso kɔfrɛɛ asafo mu mpanyimfoɔ he.

¹⁸ Bɛbaeɛ he ɔka kyerɛɛ bɛ sɛ: “Ho ankasa honim sɛnea me ne ho tenaa berɛ nyinaa ofiri daa odi kane a mebaa Asia,

¹⁹ na mede ahobrɛaseɛ kɛseɛ ne nisuo pii, ne nsɔhwɛ a ɔtoo me ɔnam Yudafoɔ pɔ a bɛbɔeɛ so som Awurade.

²⁰ Na mamfa nea mfasoɔ ya so a ɔsɛ sɛ meka kyerɛ ho biaa, ne Nyankopɔn asɛm a ɔsɛ sɛ mekyerɛkyerɛ ho badwam ne afie afie he ankame ho.

²¹ Na mmom medii Nyankopɔn fam adwensakra ne yɛ Awurade Yesu Kristo mu gyidie ho adanseɛ kyerɛɛ Yudafoɔ ne Helafoɔ nyinaa.

²² Afei, hwɛ, ɔnam sɛ Honhom he hyɛ me nti meekɔ Yerusalem a mennim adeɛ a ɔbɛto me hɔ,

²³ ɔnoaa ne sɛ kuro biaa mu he Honhom Kronkron he di adanseɛ sɛ afiase da ne taa ɔɔtwɛne me.

²⁴ Nso memmu me kra sɛ adehia sɛ wie a mewie me som ne adwuma a Awurade Yesu de ahyɛ me nsa sɛ menka asɛmpa a ɔfa Nyankopɔn adom he ho he.

²⁵ “Na afei menim sɛ ho a me ne ho tenaeɛ na mebɔɔ ahennie he ho dawuro he mu biaa onhu me bio.

²⁶ Nti meeka akyerɛ ho nnɛ da yi sɛ, menni ho mu biaa mogyaa ho fɔ,

²⁷ efiri sɛ mamfa Nyankopɔn nhyehyɛeɛ biaa ansie ho.

²⁸ Honhwɛ ho ho so yie, na honhwɛ nnipa a Honhom Kronkron he de ho ayɛ bɛ so nhwɛsofoɔ he, na honhwɛ Nyankopɔn asafo a ɔde ɔnoaa ne Ba mogyaa atɔ he so.

²⁹ Menim sɛ mekɔ akyi he, mpataku bɔne bɛhyɛne ho mu a bɛɛnyɛ nwankuo he brɛbrɛ.

³⁰ Hoaa ho mu mmeema bɛsɔre akasa adane nɔkorɛ he de atwe asafo he adi bɛ akyi.

³¹ Nti honwɛne na honkae sɛ mfie mmeɛnsa di, awia ne anadwo, mannyae sɛ mede nisuo betu ho mu biaa fo.

³² Na afei mede ho hyɛ Nyankopɔn ne asɛm a ɔfa n’adom he ho, asɛm a obetumi ahyɛ ho dene na ama hoanya agyapadeɛ bɛ a bɛate bɛ ho nyinaa mu.

³³ M’ani mmere biaa dwetɛ, sikakɔkɔɔ anaa bi ntoma.

³⁴ Ho ankasa honim sɛ mede me nsa ayɔ adwuma ahwɛ me ho ne bɛ a bɛka me ho he.

³⁵ Yei nyinaa mu he mede ayɔ nhwɛsoɔ ama ho sɛ ɔsɛ sɛ yɛyɔ adwuma de boa bɛ a bɛayɛ mmerɛ, na yɛkae Awurade Yesu nsɛm a ɔkaa sɛ, ‘Nhyira ya ma mu sene gyeɛ.’ ”

³⁶ Paulo kasa wieeɛ he, ɔne bɛ nyinaa buu nkotodwe bɔɔ mpaeɛ.

³⁷ Na bɛ nyinaa suu pii. Bɛyɔɔ Paulo atuu de bɛ nsa to ne nsa yam kyeakyea no,

³⁸ dii awerɛhoɔ ne titire ka a ɔkaa sɛ benhu no bio he ho. Na afei bɛde no kɔɔ kodoɔ he ho.