2 Timoteo 3 - Apam Foforɔ

Amanehunu berɛ

¹ Nso hu yei sɛ, nna a odi akyire he, mmerɛ a mu ɔdene bɛba;

² efiri sɛ nnipa bɛyɛ ahopɛfoɔ, sikapɛfoɔ, ahohoahoafoɔ, ahantanfoɔ, abususɛnkafoɔ, awofoɔ ho asoɔdenfoɔ, boniayɛfoɔ, bɛ a benni nyamesuro,

³ nnipa a benni tema, apamsɛefoɔ, nsekubɔfoɔ, nnipa a bɛnhyɛ bɛ akɔnnɔ so, nnipa a bɛyɛ werɛmfoɔ, nnipa a bɛmpɛ papa,

⁴ afatwafoɔ, akakabenfoɔ, nnipa a bɛyɛ ahomasoɔ kɛseɛ, nnipa a bɛdɔ anigyedeɛ sene Nyankopɔn;

⁵ bɛde nyamesompa adura bɛ anim nso bɛamfa tumi a ɔyam he nni dwuma. Twe wo ho mfiri saa nnipa yi ho.

⁶ Na yeinom mu bi ne bɛ a bɛkɔ afie mu na bɛfa mmaa adwenemharefoɔ na bɔne ahyɛ bɛ ma, na akɔnnɔ ahodoɔ afa bɛ nommum,

⁷ bɛ a betie nkyerɛkyerɛ daa nso benhu nɔkorɛ he da.

⁸ Sɛnea Yane ne Yambrɛ ko tiaa Mose he, saa ara ne yeinom nso ne nɔkorɛ he di asie. Bɛyɛ nnipa a bɛ adwene aporɔ na bɛ gyidie nyɛ papa.

⁹ Nso bennya nkɔsoɔ, efiri sɛ sɛnea bɛyɔeɛ he, bɛ gyimii bɛda adi nnipa nyinaa anim, sɛnea nnipa mmienu he deɛ daa adi he.

Paulo amanehunu

¹⁰ Afei wo ankasa woahu me nkyerɛkyerɛ, me bra, me botaeɛ, me gyidie, me boasetɔ, me dɔ, m’abodwokyɛre,

¹¹ taa a bɛtaa me, ne amanehunu a mefaa mu Antiokia, Ikonium ne Listra. Saa taa yi ne megyinaa mu! Nso Awurade gyee me firi ne nyinaa mu.

¹² Ampa, bɛ a bɛpɛ sɛ bɛde nyamesom pa tena Kristo Yesu mu nyinaa, bɛbɛtaa bɛ.

¹³ Na nnipa bɔne sisifoɔ deɛ bɛkɔ bɛ anim bɔne mu, bɛbɛdaadaa binom na binom adaadaa bɛ nso.

¹⁴ Na wo deɛ kɔ so tena nea woasua na woagye adi he mu, na hu sɛ wosua firii yɛ nkyɛne

¹⁵ ne sɛnea wofiri wo mmɔfrase nim atwerɛ kronkron he a, obetumi ama woahu nyansa afa Kristo Yesu mu akɔ nkwagyeɛ mu.

¹⁶ Atwerɛ nyinaa firi Nyankopɔn homee mu na ɔyɛ ma nkyerɛkyerɛ, atenyie, atenetene ne tenenee mu nteteɛ,

¹⁷ na Nyankopɔn nipa nam so ayɛ pɛ a bɛasiesie no koraa ama nnwuma pa nyinaa.