1 Yohane 4 - Apam Foforɔ

Honsɔ ahonhom he nhwɛ

¹ Adɔfo, honnye ahonhom nyinaa nnni, na mmom honsɔ ahonhom he nhwɛ sɛ befiri Nyankopɔn anaa; efiri sɛ, atorɔ adiyifoɔ bebree aba wiase.

² Kwane a hobefa so ahu Nyankopɔn honhom di: Honhom biaa a ɔpae mu ka sɛ Yesu Kristo aba honam mu he firi Nyankopɔn.

³ Na honhom a ɔnka saa mfa Yesu ho he mfiri Nyankopɔn. Saa honhom he yɛ Kristo-kotiafoɔ a hotee sɛ ɔbɛba he, na afei wanya aba wiase he.

⁴ Mma nkumaa, hoyɛ Nyankopɔn deɛ, na hoadi bɛ so nkunim, efiri sɛ, deɛ ɔya ho mu he wɔ tumi sene deɛ ɔya wiase mu.

⁵ Bɛkasa sɛ wiasefoɔ; wiase tie bɛ efiri sɛ, bɛyɛ wiase deɛ.

⁶ Nso yɛ deɛ, yefiri Nyankopɔn. Biaa a onim Nyankopɔn he tie yɛ. Na biaa a onnim Nyankopɔn he ntie yɛ. Yei mu ne yehu nɔkorɛ honhom ne atorɔ honhom.

Nyankopɔn yɛ dɔ

⁷ Anuanom, homma yɛnnodɔ yɛ ho yɛ ho, efiri sɛ, dɔ firi Nyankopɔn. Nipa biaa a ɔwɔ dɔ he yɛ Nyankopɔn ba na onim Nyankopɔn nso.

⁸ Na nipa biaa a onni dɔ he nnim Nyankopɔn; efiri sɛ, Nyankopɔn yɛ dɔ.

⁹ Kwane a Nyankopɔn nam so daa ne dɔ adi kyerɛɛ yɛ ne sɛ: Ɔsomaa ne Ba koro he baa wiase, sɛnea yɛbɛfa ne so anya nkwa.

¹⁰ Yei mu ne dɔ he ya, ɔnyɛ sɛ yɛ ne yɛdɔɔ Nyankopɔn, na mmom ɔno ne dɔɔ yɛ na ɔnam so somaa ne Ba sɛ ɔmmɛyɛ yɛ bɔne ho mpatadeɛ.

¹¹ Adɔfonom, sɛ saa ne Nyankopɔn dɔ yɛ deɛ a, hedeɛ ɔsɛ sɛ yɛ nso yɛdodɔ yɛ ho yɛ ho.

¹² Biaa nhuu Nyankopɔn da. Sɛ yɛdodɔ yɛ ho yɛ ho a, na Nyankopɔn te yɛ mu, na ne dɔ he awie pɛyɛ yɛ mu nso.

¹³ Nea ɔma yehu sɛ yɛte Nyankopɔn mu, na ɔno nso te yɛ mu ne sɛ, waama yɛ ne Honhom.

¹⁴ Yɛahu, na yedi adanseɛ sɛ Agya he somaa ne Ba ma ɔbɛyɛɛ wiase Agyenkwa.

¹⁵ Biaa a ɔpae mu ka sɛ Yesu yɛ Nyankopɔn Ba he Nyankopɔn te ne mu, na ɔno nso te Nyankopɔn mu.

¹⁶ Na yɛ ankasa yenim na yɛgye Nyankopɔn dɔ a ɔde dɔ yɛ he di. Nyankopɔn yɛ dɔ, na biaa a ɔte dɔ mu he te Nyankopɔn mu na Nyankopɔn nso te ne mu.

¹⁷ Saa kwane yi so ne dɔ wie pɛyɛ yɛ mu, na ama yɛatumi akasa akokoɔduro mu atemmuda he, efiri sɛ sɛnea ɔteɛ he, saa nso ne yɛteɛ wiase yi mu.

¹⁸ Hu biaa nni dɔ mu, na mmom dɔ a odi mu he pam hu nyinaa, efiri sɛ, hu ne atemmuo ne nam, na deɛ osuro atemmuo he nwie pɛyɛ ya dɔ mu.

¹⁹ Yɛdɔ, efiri sɛ, Nyankopɔn ne dii kane dɔɔ yɛ.

²⁰ Sɛ bi ka sɛ, “Medɔ Nyankopɔn” na ɔtane ne nua a, ɔyɛ torɔfoɔ, efiri sɛ, bi ntumi nnɔ Nyankopɔn a onhuu no, berɛ a ɔtane ne nua a ohu no he.

²¹ Yei ne ahyɛdeɛ a yɛanya no ne nkyɛne: nea ɔdɔ Nyankopɔn he, ɔsɛ sɛ ɔdɔ ne nua nso.