1 Timoteo 1 - Apam Foforɔ

Nkyea

¹ Paulo, Kristo Yesu somafoɔ, sɛnea yɛ Agyenkwa Nyankopɔn ne Awurade Kristo Yesu a ɔyɛ yɛ anidasoɔ he ahyɛ he,

² twerɛ krataa yi de kɔma Timoteo, me gyidie mu ba kann: Adom, mmɔborɔhunu ne asomdwie a ofiri Agya Nyankopɔn ne Kristo Yesu, yɛ Awurade nkyɛne nka wo.

Timoteo adwuma titire ya Efeso

³ Sɛdeɛ meekɔ Makedonia a mesrɛɛ wo sɛ tena Efeso na woatu nnipa bi fo, sɛ bɛnkyerɛ nkyerɛkyerɛ foforɔ he, saa ara nso ne,

⁴ kyerɛkyerɛ bɛ sɛ ɔnsɛ sɛ bɛsɛe bɛ mmerɛ anansesɛm ne anatoɔ a onni awieeɛ a ɔde tekakyerɛ ba he ho; na saa nnoɔma yi mfa honhom mu nteteɛ a ofiri gyidie mu mma.

⁵ Na afutusɛm he botae ne dɔ a ofiri akoma pa, ahonim pa ne nɔkorɛ gyidie mu ba.

⁶ Nnipa bi amane afiri yeinom ho kɔ nsɛm huhuo ho,

⁷ na pɛ sɛ bɛyɛ mmarakyerɛfoɔ, nso bɛnnte nsɛm a bɛka he ne nea bɛgye gyinam dendene he ase.

⁸ Afei, yenim sɛ mmara he, sɛ bi de di dwuma ne kwane so a, ɔyɛ.

⁹ Yei kyerɛ sɛ mmara he nna hɔ mma teneneeni, na mmom ɔda hɔ mmaratofoɔ ne asoɔdenfoɔ, nea onsuro Nyankopɔn ne debɔnyɛni, nea ne ho nte ne kasafi-kafoɔ, bɛ a beku bɛ na anaa bɛ agya, awudifoɔ,

¹⁰ nnwamamfoɔ, mmeema a bɛ ne mmeema da, nnipatɔnfoɔ, atorɔfoɔ, ntantofoɔ ɔne bibiaa a ɔne nkyerɛkyerɛ pa bɔ abira biaa.

¹¹ Sɛnea ɔne nhyira Nyankopɔn he animuonyam asɛmpa a ɔde hyɛɛ me nsa he teɛ he.

Adom a beyi kyerɛ Paulo

¹² Meda Kristo Yesu yɛ Awurade a waahyɛ me dene he ase, sɛ waabu me nɔkwafoɔ na waayi me ama ne som adwuma,

¹³ ɔyam sɛ akane he, na meyɛ abususɛnkafoɔ, taafoɔ ne bi a ommu hwee, nso menyaa adom, efiri sɛ, na mennim deɛ meeyɔ, ɔnam gyidie a na menni nti.

¹⁴ Na yɛ Awurade adom boroo so maa me gyidie ne dɔ Kristo Yesu mu.

¹⁵ Asɛm he yɛ nɔkorɛ, na ɔsɛ sɛ bɛgye tom sɛ Kristo Yesu baa wiase bɛgyee nnebɔnyɛfoɔ a medi mu kane.

¹⁶ Na ɔno nso nti ne menyaa mmɔborɔhunu, sɛnea Yesu Kristo bɛfa me a medi kane nnebɔnyɛfoɔ mu ada abodwokyɛre adi, ayɛ nhwɛsoɔ ama bɛ a bɛbɛgye no adi anya daa nkwa.

¹⁷ Anidie ne animuonyam nka Nyankopɔn daa daa, mekyerɛ daa mmeresantene Hene a onnwu da, na bennhu no a ɔno nkoaa ne Nyankopɔn trodoo he. Amen!

Paulo tuu Timoteo fo

¹⁸ Me ba Timoteo, mede saa ahyɛdeɛ yeinom ɔɔhyɛ wo nsa, sɛnea nkɔmhyɛ a ɔfa wo ho pɛɛ he kyerɛ he, na woadi akyire atumi ako ko pa he,

¹⁹ berɛ a wokura gyidie ne ahonim pa a binom apia ato nkyɛne nti, nnipa binom ahwe ase gyidie mu he;

²⁰ bi ne Hemeneo ne Aleksandro a maagya bɛ ama Satan, na bɛasua sɛ bɛbɛtwe bɛ ho afiri abususɛnka ho.