1 Korintofoɔ 11 - Apam Foforɔ

¹ Sɛnea mesua Kristo he, homma ɔnyɛ nhwɛsoɔ mma ho.

Abrabɔ a ɔsɛ sɛ mma da no adi asafo he mu

² Na meyi ho ayɛ sɛ hokae me nnoɔma nyinaa mu na hokura amammerɛ he mu sɛdeɛ mede gyaa ho he.

³ Nso mepɛ sɛ hote aseɛ sɛ Kristo ne beema biaa ti, na baa ti ne ne kunu, na Nyankopɔn ne Kristo ti.

⁴ Beema biaa ɔɔbɔ mpaeɛ anaa ɔɔhyɛ nkɔm na waakata ne ti so he hyɛ ne ti aniwuo,

⁵ na baa biaa a ɔbɔ mpaeɛ anaa ɔhyɛ nkɔm, na ɔnkata ne ti so he hyɛ ne ti aniwuo; ɔte sɛ wabɔ tikwa.

⁶ Na sɛ baa ankata ne ti so a, hedeɛ ma no mmɔ tikwa; na sɛ ɔyɛ aniwuo ma baa sɛ ɔbɛbɔ tikwa a, hedeɛ ɔnkata ne ti so.

⁷ Na beema deɛ, ɔmfata sɛ ɔkata ne ti so, efiri sɛ ɔyɛ Nyankopɔn subane ne n’animuonyam; na baa nso yɛ beema animuonyam.

⁸ (Nɔkwasɛm ne sɛ, bɛanyi beema amfiri baa mu, na mmom beema mu ne beyii baa firiiɛ.)

⁹ Na ɔnyɛ baa nti ne bɛbɔɔ beema, na mmom beema nti ne bɛbɔɔ baa.

¹⁰ Ne saa nti ɔsɛ sɛ baa kata ne ti so ma no yɛ tumi ho nsɛnkyerɛnne, ɔnam abɔfoɔ he nti.

¹¹ Nso Awurade mu he, baa nne ne ho mfiri beema ho na beema nso nne ne ho mfiri baa ho.

¹² Na sɛnea baa firi beema mu baeɛ he, saa ara nso ne beema nso nam baa so baeɛ; nso adeɛ nyinaa firi Awurade.

¹³ Hoaa hommu atɛne ho mu: Ɔyɛ sɛ baa bɔ mpaeɛ kyerɛ Nyankopɔn berɛ a ɔnkataa ne ti so anaa?

¹⁴ Nti bra su nkyerɛ ho sɛ sɛ beema gyina ne ti kusuu a, ɔnhyɛ no animuonyam,

¹⁵ na mmom baa deɛ ogyina ne ti kusuu a, ɔhyɛ no animuonyam? Efiri sɛ bɛde nwi he ama baa he sɛ nkatasoɔ.

¹⁶ Na sɛ bi pɛ sɛ ɔgye yei ho akyinnye a, me deɛ nea mewɔ ka ne sɛ, yɛ deɛ yemmu saa bra he, na Nyankopɔn asafo ahodoɔ he nso nyɔ saa.

Asɔre mu mpaepaemu

¹⁷ Nso, berɛ a meema ho ahyɛdeɛ yi he, ɔnyɛ kamfo ne meekamfo ho, efiri sɛ, sɛ hohyiam a ɔnyɛ adepa ne ho yɔ, na mmom adebɔne

¹⁸ Na deɛ odi kane he, sɛ hohyia sɛ asafo a, mete sɛ mpaepaemu ya ho mu, na megye di kwane bi so.

¹⁹ Ɔkame ayɛ sɛ, ɔsɛ sɛ nkyekyemu ba ho mu, na ama bɛ a bɛyɛ agyidifoɔ mapa he ada adi ho mu.

Awurade adidie asekɔ mu basabasayɔ

²⁰ Nti sɛ hobehyiam sɛ hooba Awurade adidie a, nea hoyɔ he nyɛ Awurade adidie koraa,

²¹ efiri sɛ binom di kane di bɛ aduane mee berɛ a kɔm de binom nso, na binom nso abro nsa.

²² Mmɛ nti ne hoyɔ saa! Honni fie a hodidi na honom ya mu? Anaa hoaba sɛ hoobebu Nyankopɔn asafo animtia, na hoahyɛ bɛ a benni hwee he aniwuo? Ɛɛne ne hopɛ sɛ meka kyerɛ ho? Menkamfo ho? Asɛm yei ho deɛ, menkamfo ho da!

Awurade Adidie

²³ Na me deɛ, nea menya firii Awurade hɔ heaa ne mede maa ho, sɛ Awurade Yesu anadwo a beyii no maeɛ he ɔfaa paanoo,

²⁴ na ɔdaa ase he, obuu mu ka sɛ, “Me nnipadua a beebubu ama ho di. Honyɔ yei mfa nkae me.”

²⁵ Saa ara nso ne adidie he akyi he, ɔfaa kuruwaa he nso; na ɔkaa sɛ, “Kuruwaa yi yɛ Apam foforɔ a ɔnam me mogyaa so he. Honyɔ yei, da biaa a hobɛnom he, homfa nkae me.”

²⁶ Na da biaa a hobedi paanoo he na hobɛnom kuruwaa yi ano he, hopae mu ka Awurade wuo he kosi sɛ ɔbɛba.

Awurade adidie asekyerɛ

²⁷ Ne saa nti, deɛ onni paanoo he na ɔnnom Awurade kruwaa he ano kwanpa so he, obedi Awurade nipadua ne ne mogyaa he ho fɔ.

²⁸ Ɔsɛ sɛ biaa sɔ ne ho nhwɛ ansa na wadi paanoo he, na wanom kuruwaa he ano bi.

²⁹ Na biaa a onni na ɔnnom no kwanpa so he, odi nom de atemmuo ba ɔnoaa ne so, efiri sɛ wammu Awurade nipadua he yie.

³⁰ Yei nti ne ho mu bebree ayɛ mmerɛ, na binom yare, na binom nso awuwu he.

³¹ Na sɛ yetumi hu nipa ko a yɛyɛ a, hedeɛ nka bemmu yɛ atɛne.

³² Nso sɛ Awurade bu yɛ atɛne a, ɔtwe yɛaso sɛdeɛ yɛ ne wiase ɔɔnsɛe.

³³ Nti me nuanom, hohyiam sɛ hoobedidi a, hontwɛne ho nuanom.

³⁴ Sɛ kɔm de wo a, didi fie, sɛdeɛ ɔbɛyɔ a sɛ hohyia mu a, hoammenya afobuo. Na nnoɔma a aka he, me ba a, metoto no pɛpɛɛpɛ.