Zelemii 30 - Bòó Bibeli Luayãtaala

Isailiↄ sua ń pá ziu

¹ Dii yã'ò Zelemiiɛ à mɛ̀:

² Ma Dii Isailiↄ Lua ma mɛ̀, yã́ pↄ́ má ònɛ píi kɛ̃́ lá guu.

³ Ma Dii ma mɛ̀, gwa, gↄↄe a mↄ́ kɛ́ má a gbɛ̃́ Isailiↄ ń Yudaↄ bↄ zĩ̀zↄkɛu, mí suńnↄ bùsu pↄ́ má kpà ń deziↄwa aa gↄ̃ vĩ guu. Ma Dii mámɛ má ò.

⁴ Yã́ pↄ́ Dii ò Isailiↄ ń Yudaↄ musun kɛ, à mɛ̀:

⁵ Ma Dii ma mɛ̀, à vĩa wii ma dↄ! Sↄ̃kɛ̃ngu wiiɛ, aafia wii no.

⁶ À gbɛ̃e la à ma, gↄ̃ɛ mɛ́ ì kúlɛ nɛ'ia? Àkɛa ma nɛgↄ̃naↄ è, an oa fɛ̃́nkpaa píi, aalɛ ↄ fĩfĩ ń gbɛɛwa lán nↄɛ pↄ́ lɛ́ nɛ'iwai?

⁷ Waiyoo, asa gↄↄpi taasi vĩ zↄ̃ↄ, gↄↄe aↄ muaaòo. Yakↄbu buiↄ taasigↄↄɛ, ãma aa bↄu.

⁸ Ma Dii Zĩgↄ̃de ma mɛ̀, gↄↄ bee má zuu ɛ́'ɛnɛ́ ń nↄɛ, mí ń mↄdaonaↄ kɛ̃́kɛ̃nɛ́. Aa zↄble bui zĩ̀loↄnɛ lↄo,

⁹ ma Dii ń Lua, mámɛ aa zↄblemɛɛ, ń ń kí Davidi bui pↄ́ má dilɛnɛ́o.

¹⁰ Á Yakↄbu bui ma zↄ̀blenaↄ, ásu to vĩa á kṹo, á Isailiↄ, ásu bílikɛo. Ma Dii mámɛ má ò. Asa mapi má á bↄlɛ za guzãzãuɛ, mí á buiↄ bↄlɛ ń zↄblebusuu. Yakↄbu buiↄ ɛa aaↄ ku dↄdↄa nana, gbɛ̃e a to vĩa ń kṹ lↄo.

¹¹ Ma Dii ma mɛ̀, má kúánↄ á suabaa yã́iɛ. Bui pↄ́ málɛ á fãaa ń guuↄ, baa tó ma ń mìdɛ píi, má á midɛ míↄmiↄo. Má á toto a zɛ́waɛ, má we à bↄ swã́gagasaio.

¹² Asa ma Dii ma mɛ̀, á bↄá bↄ̀kↄↄɛ, á kɛa'ĩa uusikɛ̀.

¹³ Gbɛ̃e ku à kulɛkɛmɛɛ á yã́ musuo, á bↄ a ɛsɛ mao, a láaa vĩo.

¹⁴ Á yã́ sã̀ á yenzideↄgu, aa yeázi lↄo, asa ma á lɛ́ lán á ibɛɛwaɛ, ma á toto lán gbɛ̃́ pãsĩwaɛ, asa á tàaeↄ zↄ̃ↄɛ, á duuna tìisi.

¹⁵ Ásu wiilɛ á bↄ̀kↄↄ wãwã yã́ musuo. Á tàae zↄ̃ↄ ń á duuna tìisio yã́i ma yã́ beeↄ kɛ̀iɛ́.

¹⁶ Wa á tàitainaↄ taitai píiɛ, wi tá ń á ibɛɛↄ zĩ̀zↄↄ ũ píi. Gbɛ̃́ pↄ́ aa á pↄ́ↄ nàaaↄ gↄ̃ pↄ́ naaaaↄ ũ sↄ̃ɛ, gbɛ̃́ pↄ́ aa á pↄ́ↄ sɛ̀lɛↄ gↄ̃ pↄ́ sɛ́lɛaↄ ũɛ.

¹⁷ Má ɛa á gba aafia, má tó á bↄ láa, kɛ́ wìↄ oɛ́ pↄ́ vũaaaↄ, Siↄnade pↄ́ gbɛ̃e yeńzioↄ yã́i. Ma Dii mámɛ má ò.

¹⁸ Má su ń Yakↄbu buiↄ ń pá ziu, má ń wɛ̃nagwa aa su ń gbɛu. Aa ń mɛɛwia zia vu, aai ɛa kibɛ kpá lá a ziwa.

¹⁹ Wa sáaukpaa mamá ń pↄna súuo. Má tó aa dasikũɛ, aa lao lↄo, má ń kpɛlaɛ, wa ń kpɛbↄ lↄo.

²⁰ Aaↄ dɛ lán káauwa, aaↄ zɛdↄamɛɛ ḿpiiɛ, mí ĩada gbɛ̃́ pↄ́ gbãamↄ̀nɛ́ↄwa.

²¹ An gbɛ̃e mɛ́ aↄ dɛ ń dↄaana ũ, gbɛ̃́ pↄ́ nɛblè ń guu mɛ́ aↄ dɛ ń kía ũ. Má tó aà sↄ̃mazi aàↄ kumanↄ kãi. Tó màa no, dé mɛ́ a fↄ̃ gi a wɛ̃nii à sↄ̃mazii? Ma Dii mámɛ má ò.

²² Aa gↄ̃ ma gbɛ̃́ↄ ũ, mí gↄ̃ ń Lua ũ.

²³ Ma pↄfɛ̃ a fɛlɛ lán zàa'ĩanawaɛ, i su vãikɛnaↄ miwa lán zàalolowa.

²⁴ Ma pↄkũma pãsĩ a weeo, sema ma yã́ pↄ́ ma zɛò ma sↄ̃u kɛ̀. Gↄↄgbɛzãzĩ á yã́pi gbadↄ̃.