Yobu 39 - Bòó Bibeli Luayãtaala

¹ Ń tue nɛ'igↄↄ dↄ̃e? N bana è gↄↄ pↄ́ àlɛ nɛ'ia?

² Ni ń nↄ mↄ dↄdↄe? Ni ń nɛ'igↄↄ dↄ̃e?

³ Aaì kúlɛ aa nɛ'iɛ, ↄ̃ an nɛ'iwãwã ì kpálɛ.

⁴ An nɛ́ↄ ì gbãakũ sɛ̃u, aaì pɛ́lɛ, aaì gɛ̃zɛa, aali su ń daↄwa lↄo.

⁵ Dé mɛ́ tò sɛ̃̀a zàa'ĩna gↄ̃̀ azĩaɛi? Dé mɛ́ aà pòlo gbàɛi?

⁶ Ma sɛ̃sao dìlɛɛ̀ aà bɛ ũɛ, ma tↄↄlɛ wiside kɛ̀ɛ̀ aà kúkĩi ũ.

⁷ Ì wɛ̃́lɛ súu kɛ pↄ́ↄpↄↄɛ, ìli gbãamↄnɛdeↄ zↄa mao.

⁸ Ìↄ sĩ̀sĩↄ kɛɛlɛ àↄ sɛ̃ wɛɛlɛ, ìↄ kpálɛkɛ pↄ́ ísinaↄi píi.

⁹ Zùsɛ̃lɛ a we zĩkɛnɛe? A we i n tàaakalɛkĩie?

¹⁰ Ńyↄ̃ ba dↄwà aà sa panɛe? Ńyↄ̃ zuu daɛ̀ aà kpase kɛ̃nɛe?

¹¹ Ńyↄ̃ aà náaikɛ aà gbãa zↄ̃ↄ yã́ie? Ńyↄ̃ wei ǹ n zĩ toɛ̀e?

¹² Ńyↄ̃ aà náaikɛ, aà n pↄ́wɛna sɛ́sɛ suonɛ zɛue?

¹³ Taataa ì a gã̀sĩa poo ń pↄnao, a muaa ń wàaliana gã̀sĩa kã́oo.

¹⁴ Ì gbeda zĩ́lɛ, ì to ũfãa gbepiↄ wã à pipi.

¹⁵ Kɛ́ wa su kɛ̀sɛpɛlɛwà à wíwi, ge sɛ̃̀anↄbↄↄ ↄ̃zↄ̃wà líↄ dↄaàguo.

¹⁶ Ìↄ pãsĩ ń a nɛ́ↄ, ńyↄ̃ↄ dↄ̃ seaàzĩa nɛ́ↄ no, zĩ pã kɛa lí kɛɛ̀ yãe ũo.

¹⁷ Asa mi aà gba ↄ̃nↄo, mi aà baa da faadeↄ guuo.

¹⁸ Ãma tó à pòo à bↄ̀ ń bao, ì sↄ̃́ kɛ̃́ɛ, ↄ̃ ì sↄ̃́pi dikpɛna yáalↄ.

¹⁹ Ḿmɛ ni to sↄ̃́ àↄ gbãaa? Ḿmɛ n bã́ngasa pɛ̀pɛɛ̀ aà waawaa?

²⁰ Ḿmɛ ni to aàↄ vĩvĩ lán kwawaa? Aà pↄbↄa a níu kↄ̃fĩ ì to vĩa ń kṹ.

²¹ Ì a gbá pã́lɛpãlɛ guzulɛu, ì pↄnakɛ a gbãa yã́ musu, ↄ̃ ì gɛ́ dai zĩgↄ̃ↄlɛ.

²² Ì pↄ́ pↄ́ wì vĩakɛɛ̀ yáalↄɛ, sↄ̃ lí kɛ̃aàguo, ìli pↄ̀ↄbↄzã kɛ fɛ̃ndaɛo.

²³ Ka ìↄ kↄ̃fĩkɛ gbàlau aà musu, sↄ̃mpɛpɛɛ ń sↄ̃n gésedeo ì tɛkɛ.

²⁴ Tó wà zĩ̀mↄ pɛ̀, ìliↄ azĩa dakĩi dↄ̃o, ìↄ tↄↄlɛ gbɛ̃ ìↄ vĩvĩ, ìↄ kɛ sɛ̀ɛsɛɛsɛɛ.

²⁵ Tó wà kuupɛ̀, ì pↄbↄ a níu à mɛ̀ ɛ̃hɛ̃ɛ! Ìↄ zĩ̀ ĩ́ana sɛ́sɛ za zã̀zã ń dↄaanaↄ kↄ̃fĩ gbãao ń kúkuakɛao.

²⁶ N ↄ̃nↄ mɛ́ tò bleaa ì vua à a gã̀sĩa poo à gɛ́ gɛↄmidↄkĩi oia?

²⁷ Ḿmɛ ń dìlɛ yãamusuɛ aàli yàakpa, i a sakpɛ da musua?

²⁸ Ìↄ ku gbɛ musu, we ì iu, ì pɛ gbɛ̀ misonawa a aafia'ekĩi ũ.

²⁹ Za we ìↄ pↄblea gwagwau, ì pↄ́ↄ wɛ́ pá kãaa.

³⁰ Au mɛ́ aà nɛ́ↄ pↄblea ũ, gu pↄ́ pↄgɛ kuu, ìↄ ku weɛ.

Lean sinn:

Ceanglaichean taic

Sanasan