Yobu 33 - Bòó Bibeli Luayãtaala

Lua ì gbɛ̃nazĩna gba laai

¹ Ma yãma sa Yobu, swã́kpa ma yã'oai.

² Gwa, ma bↄ ń yã́o sa, a dↄ ma lɛ́u.

³ Ma yã́ↄ lɛ́ bↄ ma nↄ̀sɛmaa guuɛ, málɛ yã́ pↄ́ má dↄ̃ o ń nↄ̀sɛmɛndoo.

⁴ Lua Nisĩna ma kɛ, Gbãapiide lɛ́'ĩanapi ma gba wɛ̃ni.

⁵ Tó ńyↄ̃ fↄ̃́, yãwea, sↄukɛ, ní yã́zãsia.

⁶ Má kɛ́, má doũnnↄ Luaɛɛ, à gĩtↄ̀ à ma kɛò sↄ̃ɛ.

⁷ Ńsu vĩakɛmɛɛo, má ↄtↄ̃ma gbãao.

⁸ Ń ò ma swã́ mà, má mà n yã'ò n mɛ̀,

⁹ ń tàae vĩo, ń zɛ̃a, ń kú gbãsĩsai, ń yãvãi vĩo.

¹⁰ Ɔ̃ Lua íbɛlɛsɛ̀nnↄ, à n dilɛ a wɛ̀lɛ ũ.

¹¹ Ì galakpanɛ, ìↄ n tàasika n yãkɛa píi guu.

¹² Málɛ onɛ, n yã́ bee nao, asa Lua zↄ̃ↄ dɛ gbɛ̃nazĩnaa.

¹³ Bↄ́yãi ńlɛ zↄadↄ Luawa kɛ́ ìli yã́zãsi gbɛ̃nazĩnawao ni?

¹⁴ Lua ì yã'o gɛ̃n doɛ, ìli a gbɛsisio.

¹⁵ Ì yã'onɛ́ wɛ́pungu'ea ge nana guu gwã́, gↄↄ pↄ́ i niazĩde kpà gbɛ̃́ↄla, aalɛ ipi o ń wúlɛkĩi.

¹⁶ Ɔ̃ ì yã'o ń swã́u, ì to vĩa ń kṹ ń ĩadama yã́o,

¹⁷ kɛ́ gbɛ̃́ↄ e mikɛ̃ yãvãiwa, mɛ́ aasu ĩ́anadão.

¹⁸ Ì gínɛ́ màa aa ta miau, ì kpánɛ́ wà ń dɛdɛ ń fɛ̃ndao.

¹⁹ Ì gbɛ̃́ toto ń wawãwão aà wúlɛkĩi, ì ĩakpaaàzi kã́mabosai,

²⁰ ↄ̃ pↄblea ì kɛɛ̀ bↄlↄ ũ, ìliↄ ye a pↄeã blɛi seo.

²¹ Aà mɛ ì ibaba, aà wá pↄ́ ulɛa yãa ì bↄ gupuau sa,

²² e aà wɛ̃ni kãikũ ń miao, àlɛ sↄ̃ malaika gbɛ̃dɛnaↄzi.

²³ Ń beeo tó a malaika vĩ kↄ́ↄ ũ, gbɛ̃́ pↄ́ dɛ gbɛ̃ↄn ↄ̀aa sↄoↄla, a yã́ pↄ́ zɛ́ vĩ ↄlↄɛ̀,

²⁴ i sùuukɛaànↄ à onɛ́: Ásu to aà ta miauo, ma aà misia zɛ́ è.

²⁵ Aà mɛ i dafukũ lán nɛ́tɛ̃nawa, iↄ tɛkɛ lán ɛ̀waasowa,

²⁶ i wabikɛ Luawa, i kɛaànↄ na. Tó a è Lua a wɛ́ gwà, a kúkuakɛ, Lua i ɛa to aàↄ naanↄ.

²⁷ A gɛ́ gbɛ̃́ↄ kĩ́i, i mɛ: Ma duunakɛ̀ ma yã́zɛde fuangbà, ↄ̃ Lua i a fĩabomɛɛo.

²⁸ À ma mìsi, mi ta miauo, málɛ pↄnakɛ aà gupuau sa.

²⁹ Ń èa? Lua ì yã́ beeↄ kɛ píi, ì kɛ gbɛ̃́ɛ gɛ̃n pla, baa gɛ̃n àaↄ̃.

³⁰ Ì aà si gawa, kɛ́ gupua wɛ̃nide e biiwà.

³¹ Swã́kpa ǹ ma yãma, Yobu, ǹyↄ̃ n lɛ́ kpaaũ, mapi má yã'o.

³² Tó ń yã'oa vĩ sↄ̃, o, asa má ye mà yãnakpama.

³³ Tó ń vĩ sↄ̃o, ma yãma. Nílɛ mà ↄ̃nↄ danɛ.

Lean sinn:

Ceanglaichean taic

Sanasan