Yobu 28 - Bòó Bibeli Luayãtaala

Ɔ̃nↄ sáaukpaa

¹ Ãnusuyↄ̃kĩi kú, vuabaasakĩi kú lↄ.

² Wì mↄsi bↄ tↄↄlɛu, wì mↄgotɛ̃ bↄ gbɛu.

³ Gbɛ̃nazĩna ì gusia yá, ì tↄↄlɛ yↄɛ e a lɛ́ lɛ́u, ì gbɛ pↄ́ kú gusia níiniiu wɛɛlɛ.

⁴ Wì ɛyↄ̃ tↄↄlɛ nↄnau wà zɛ́ bↄ we, gu pↄ́ gbɛ̃e lí bɛbɛ à kauo. Ba wì loowà wà gɛ̃ò ɛpiu.

⁵ Blɛ ì bↄlɛ tↄↄlɛwaɛ, ↄ̃ gbɛ̃nazĩna ì tↄↄlɛ títiu lilɛ lá tɛ́ ì pↄ́ lilɛwa.

⁶ Safii ku a gbɛↄ guu, vua ku a bùsuti guu.

⁷ Bã nↄ̀ↄsonaↄ a zɛ́ dↄ̃o, bleaa lí wɛsi zɛ́pilɛo.

⁸ Sɛ̃̀a nↄ̀bↄ tↄdeↄ lí zɛ́pi sɛo, nↄ̀ↄmusuↄ lí bɛbɛuo.

⁹ Gbɛ̃nazĩna ì gbɛkão wíwi we, ì gbɛ̀sĩsĩↄ zĩ́lɛ sↄ.

¹⁰ Ì zɛ́ da gbɛu we, ì wɛsi gupi pↄ́ bɛɛɛdeↄlɛ píi.

¹¹ Ì zɛzↄ̃ swa'iɛ, ì bↄ ń pↄ́ pↄ́ ulɛaↄ gupuau.

¹² Ɔ̃nↄ sↄ̃, wì e má ni? Dↄ̃a kúkĩin mái?

¹³ Gbɛ̃nazĩna a bɛɛɛ dↄ̃o, wìli e dṹnia guuo.

¹⁴ Ísi ì mɛ á vĩo, ísia ì mɛ a ku a kĩ́io.

¹⁵ Wa fↄ̃ lú ń vua maaoo, wa fↄ̃ a lɛũkpakɛ ń ã́nusuoo.

¹⁶ A bɛɛɛ dɛ Ofii bùsu vuaa ge safii gbɛ bɛɛɛde ge onisi.

¹⁷ Wa fↄ̃ lɛɛũ ń vuao ge bĩsãgbɛo, wa fↄ̃ a fĩabo ń vua tɛ̃ɛtɛ̃ɛ pↄ́oo.

¹⁸ Wa ↄpua ge gbɛdii yã'o lↄe? Ɔ̃nↄkũa bɛɛɛ dɛ òsowɛɛlɛaa.

¹⁹ Wa fↄ̃ lɛɛũ ń Etiopi bùsu topazaoo, wa fↄ̃ lú ń vua maaoo.

²⁰ Ɔ̃nↄ ì bↄ má ni? wɛzɛ̃ kúkĩin mái?

²¹ A ulɛa pↄ́piiɛ, baa bã pↄ́ ì vua musu lí a wɛ́ páo.

²² Kaalɛ ń gao ì mɛ, wá swã́ a feena màɛ.

²³ Lua mɛ́ a zɛ́ dↄ̃, aàpi mɛ́ a kúkĩi dↄ̃.

²⁴ Asa ì gugwa e dṹnia lɛ́waɛ, ì pↄ́ pↄ́ kú zĩ́lɛ e píi.

²⁵ Kɛ́ Lua gbãa dìlɛ ĩ́anaɛ, mɛ́ à ísia í lɛ́ dàɛ̀,

²⁶ kɛ́ à lou ikoyã dìlɛ, mɛ́ à zɛ́ bↄ̀ loupilɛaɛ,

²⁷ zĩbeezĩ à ↄ̃nↄ laai gwà à a maabò, a dìlɛ, ↄ̃ à a sáaukpà.

²⁸ Ɔ̃ a ò gbɛ̃nazĩnaↄnɛ: Vĩakɛa Diiɛ mɛ́ ì mↄ́ ń ↄ̃nↄo, mikɛ̃a yãvãiwa mɛ́ ì ń wɛ́ kɛ̃́.

Lean sinn:

Ceanglaichean taic

Sanasan