Yobu 18 - Bòó Bibeli Luayãtaala

Bai ì vãikɛna kṹ

¹ Ɔ̃ Sua gbɛ̃́ Bilidada yã́zãsìwà à mɛ̀:

² Ńyↄ̃ n yã́ midɛ bↄɛ ni? Su n laaiwa, wí gbasa faaibo.

³ Bↄ́yãi ńlɛ wá gwa lán pↄtuoↄwai? N wá dílɛ sↄũↄ ũ yã̀?

⁴ N gbɛ̃́ pↄ́ ni to n pↄfɛ̃ nzĩa taitaiɛ, dṹnia a gↄ̃ bɛzia ũ n yã́i nɛe? Gbɛsi a sↄ̃ n yã́ musu nɛe?

⁵ Gbɛ̃vãi gupua ì láa, aà tɛ́vua ì midɛ.

⁶ Aà kpɛ́ gupua ì li gusia ũ, filia pↄ́ kú aà saɛ ì ga.

⁷ Aà táa'oa ń sↄ̃o dilɛa ì gↄ̃ sea tá ũ, aà yã́zɛkalɛa ì aà fuangba.

⁸ Aà tá ì aà kpa baia, aà gbá ì si balɛtãu.

⁹ Mↄ ì aà kũ a kɛ̀sɛwoũ lɛ́u, baipi ì kúlɛwà búlu.

¹⁰ Ba kpaa aà aɛ tↄↄlɛu, kúsɛ lɛ́ aà dã a táa'ozɛu.

¹¹ Kìsia ì koezↄ̃aàzi, àlɛ aà gbɛ sɛ́lɛ.

¹² Nↄana ì aà gbãa kↄ ɛ́, músi ìↄ aà kpaa gua dã́.

¹³ Ì aà mɛ̀ gueↄ ble, gagyã ì aà mɛguↄ yↄ́.

¹⁴ Wì aà ga wà bↄ kpɛ́ pↄ́ a kuu aafiau, wì aà gálɛ gɛ́ò pↄ́ pↄ́ ì to vĩa ń kṹↄ mideɛ.

¹⁵ Aà kpɛ́ gↄ̃̀ gii, ĩatɛ̃gbↄ̃ lì aà uaa.

¹⁶ Aà zĩ́naↄ i giigaga tíu, aà gↄ̃naↄ i imi musu.

¹⁷ Aà yã́ i sã́ńgu dṹniau, aà tↄ́ i midɛ tↄↄlɛ.

¹⁸ Wi aà ya gupuau wà aà kpa gusiau, wi ↄzↄ̃aàzi aà ã́nuato.

¹⁹ A nɛ́ ge buie to a gbɛ̃́ↄ guuo, aà bɛ gbɛ̃e a bↄo.

²⁰ Yã́ pↄ́ aà lè dì bɛ'aɛdeↄwa, gukpɛdeↄ kãsì aà yã́ musu.

²¹ Yã́ pↄ́ ì faasaide ua len we, luadↄ̃nsai gwean we.

Lean sinn:

Ceanglaichean taic

Sanasan