Yáasiↄ 6 - Bòó Bibeli Luayãtaala

Fĩa ń màao ń gbɛ̃nazĩn pão yã́

¹ Ma nɛ́, tó n n gbɛ̃do fĩa dì n miwa, tó n kpɛgaausì gbɛ̃́ɛ,

² tó n lɛ́ n kalikɛ̃̀, tó n yã'oa n dayãu,

³ lá ńyↄ̃ kɛn la ma nɛ́: Lɛ́ bↄ yã́piu, asa n na n gbɛ̃do ↄzĩɛ. Gɛ ǹyↄ̃ zɛzɛ n gbɛ̃dopizi, awakpaɛ̀.

⁴ Ńsu to i gɛ̃ n wɛ́uo, ńsu to n wɛ́baa gbiakũo,

⁵ ǹ nzĩa siwà lá tue ì ń kɛ̃́wa, lá bã ì bↄ fíikpana ↄuwa.

⁶ Zígbiade, gɛ́ bↄↄna gwai, ní aà yãkɛa tàasika, ńyↄ̃ ↄ̃nↄkũ.

⁷ A dↄaana vĩo, a gbɛ̃zↄ̃ↄ ge dii vĩo.

⁸ Ì blɛ kũ̀sũa di saɛ, ì a pↄblea kãaa pↄkɛkɛgↄↄ.

⁹ Màade, ńyↄ̃ↄ wúlɛa e bↄɛ ni? Bↄɛ ńyↄ̃ vu ń ioi?

¹⁰ Ni kã́mabo yↄↄ, ni i'o yↄↄ, ni wúlɛ yↄↄ ↄkpaa n kùɛ.

¹¹ Pↄ́ taasi a gɛ̃nzi lán kpã́iwɛliwɛwa, nↄana a mↄma lán gbɛ̃́ pↄ́ gↄ̃kɛbↄ kũawa.

¹² Gbɛ̃nazĩn pãá gbɛ̃vãiɛ, ìↄ bɛbɛ ń ɛɛo dↄ a lɛ́u.

¹³ ì yã'o ń wɛ́o ń ↄo, ì seelakɛnɛ́ ń gbáo.

¹⁴ Mↄafili mɛ́ aà nↄ̀sɛ pà, vãi wàai ↄ̃ ìↄ pa gↄↄpii.

¹⁵ Bee yã́i músi a mↄwà lɛzasai, kaaũ a gɛ̃aàzi kã́ndo, aↄ fɛlɛa vĩo.

¹⁶ Yã́ mɛ̀n soolo ku kɛ́ Dii zau, à kà se sopla kɛ́ a ye a gĩyãio.

¹⁷ Káakua, ɛɛtoa, yãesaidedɛa,

¹⁸ yãpãsĩ wàaipaa, wãa ń vãio,

¹⁹ seelade ɛɛtoa ń daɛↄ pɛãaao.

Laaikaa gbãsĩkɛai

²⁰ Ma nɛ́, ǹyↄ̃ n mae yãdilɛaↄ kũa, ńsu pãkpa n da yãdanɛio.

²¹ Ǹyↄ̃ kũa n sↄ̃u gↄↄpii, ǹyↄ̃ daa yàbaa ũ.

²² A dↄaanɛ n táa'oa guu, a n dↄ̃́a n wúlɛa guu. Tó n vu, ali lɛdama.

²³ Asa yãdilɛapiↄá filiaɛ, yãdanɛpiá gupuaɛ, lɛdama ń leleaoá zɛ́ wɛ̃nideɛ.

²⁴ A n si nↄɛ vãiwa, a n bↄ nↄɛ pãle yã́ nana oanɛu.

²⁵ Ńsu ǹ aà kɛfɛnkɛ nidɛo, ńsu to aà gↄ̃gwawɛ n kũo.

²⁶ Káalua ì ń gↄ̃ gii, gbɛ̃pãle nↄ yã́ sↄ̃ ì ń bɛɛɛ midɛ.

²⁷ Tó gbɛ̃́ tɛsɛ dà a pↄlɛu, aà pↄkasa a gí tɛ́kũie?

²⁸ Tó gbɛ̃́ kɛ̀sɛpɛ̀lɛ tɛyↄ̃wa, a na aà gbáwao lé?

²⁹ Màaɛ ń gbɛ̃́ pↄ́ gɛ̃̀ a gbɛ̃́dee nↄ yã́uo, asa tó à ↄnàwà, a bↄ pão.

³⁰ Tó nↄa lɛ́ gbɛ̃dɛ, tó à kpã́i'ò, wì a yã́ dilɛ pãe?

³¹ Tó wà aà kũ̀, a fĩabo lɛɛ sopla, i pↄ́ pↄ́ a vĩ a ua kpa píi.

³² Gbɛ̃́ pↄ́ ì wúlɛ ń pãle nↄo làasoo vĩo, gbɛ̃́ pↄ́ ì bee kɛ lɛ́ azĩa ↄ̃̀ↄkpaɛ.

³³ Gbɛ̃a gbãa ń kpɛbↄao mɛ́ aà baa ũ, aà tↄ́ ĩ́i a kɛ̃wào.

³⁴ Asa íbɛlɛ a aà zã́ nↄ̀sɛ fɛlɛ, i tↄsiwà aà wɛ̃nagwasai.

³⁵ A awakpabↄe sio, baa tó à gba zↄ̃ↄ dàɛ̀, a weio.

Lean sinn:

Ceanglaichean taic

Sanasan