Yáasiↄ 3 - Bòó Bibeli Luayãtaala

Dii náaikɛa ì ↄ̃nↄ inɛ́

¹ Ma nɛ́, ńsu to ma yãdanɛ sã́nguo, ǹyↄ̃ yã́ pↄ́ má dìlɛnɛↄ kũa n sↄ̃u.

² Asa a n ka wɛ̃ni gbã̀awa, a aafia kã́fĩnɛ.

³ Gbɛ̃kɛ ń náaio su kɛ̃mao, ǹyↄ̃ daa yàbaa ũ, kɛ̃ n sↄ̃wa lá wì kɛ̃ lákɛ̃kĩiwawa,

⁴ n tↄ́ iↄ na, níↄ maa Luaɛ ń gbɛ̃nazĩnaↄ.

⁵ Dii náaikɛ ń nↄ̀sɛmɛndoo, ńsu gbãa'e nzĩa ↄ̃nↄwao.

⁶ Ǹyↄ̃ aà dↄ̃ n yã́ píi kɛa guu, i zɛpoonɛ.

⁷ Ńsu ǹ nzĩa gwa ↄ̃nↄna ũo, ǹyↄ̃ Dii vĩa vĩ, ní kɛ̃́ vãiwa.

⁸ Bee aↄ dɛ n mɛ aafia ɛsɛ ũ, a n wá gba gbãa.

⁹ Dii kpɛla ń n àizɛɛo ń n bua pↄ́ káauↄ píi,

¹⁰ pↄ́wɛnaↄ i bi bↄ n dↄ̃u, n selaↄ i pa yɛlɛlɛ ń vɛ̃ɛ dafuo.

¹¹ Ma nɛ́, tó Dii n toto, ńsu dilɛ pão, tó à n gba laai, ńsu to à kɛnɛ ĩ́io.

¹² Asa gbɛ̃́ pↄ́ Dii yei ↄ̃ ì dazɛwa, lá mae ì kɛ a nɛ́ pↄ́ kɛ̀ɛ maaɛwawa.

Ɔ̃nↄ ài

¹³ Báaaden gbɛ̃́ pↄ́ ↄ̃nↄ le kũ̀ mɛ́ dↄ̃a pàɛ̀ ũ.

¹⁴ Asa a ài vĩ dɛ ã́nusua, ì kã́fĩakɛnɛ́ dɛ vuaa.

¹⁵ A bɛɛɛ vĩ dɛ òsoa, pↄ́ pↄ́ a ni kumaↄ kee i kawào.

¹⁶ Wɛ̃ni gbã̀a ku aà ↄplaau, àizɛɛ ń gawio ku aà ↄzɛɛu.

¹⁷ Aà yã́ↄ kɛkɛá na, aà zɛ́ píi aafia vĩ.

¹⁸ A dɛ lí wɛ̃nide ũ gbɛ̃́ pↄ́ kũaↄnɛ, báaadeↄn gbɛ̃́ pↄ́ sìↄ ũ.

¹⁹ Dii gↄ̃ikɛ guu à tↄↄlɛ kàlɛ, aà ↄ̃nↄ guu à musu kɛ̀.

²⁰ À ísia ɛ bↄ̀ a dↄ̃a guu, a tò luabɛpuana mↄ̀sɛ vĩ.

²¹ Ma nɛ́, ǹyↄ̃ wɛzɛ̃ ń ↄ̃nↄo vĩ, ńsu ǹ wɛvĩao.

²² Aↄ dɛ n nisĩna wɛ̃ni ũ, aↄ dɛ yàbaa ũ n nↄɛ.

²³ Ńyↄ̃ↄ bɛ n laaiwa, pↄe a kpàli kpanɛo.

²⁴ Tó n wulɛ, vĩa a n kũo, ńyↄ̃ wúlɛ i'o na.

²⁵ Ńyↄ̃ kai vĩakɛo, ge músi pↄ́ ì vãikɛnaↄ le kã́ndo.

²⁶ Asa Dii aↄ dɛ n mikpakĩi ũ, a n gbá vĩ kaia.

²⁷ Tó n ↄ lɛ́ n kpɛ le, ńsu gí maakɛi gbɛ̃́ pↄ́ kũ̀ ǹ kɛɛ̀ɛo.

²⁸ Tó n dↄnlɛ zɛ́ vĩ, ńsu o n gbɛ̃́deeɛ aà gɛ́ e ziao.

²⁹ N gbɛ̃́dee pↄ́ kú n saɛ dↄdↄa, ńsu lɛkpaaĩaàzi ń gbɛ̃eoo.

³⁰ Tó gbɛ̃́ i yãe kɛnɛo, ńsu lɛkpaakɛaànↄ pão.

³¹ Ńsu gbãamↄnɛdeↄ kua nidɛo, ńsu ǹ ń kɛae kɛo.

³² Asa Dii ye kↄ̃nideↄ gĩyãio, nↄ̀sɛpuadeↄ ↄ̃ ì kɛ a kpàasiaↄ ũ.

³³ Dii ì láaizĩ gbɛ̃vãiↄ uawa, ì báaada gbɛ̃maaↄ bɛu.

³⁴ Ì gbɛ̃́laanikɛnaↄ láanikɛ, a gbɛ̃kɛ vĩ ń zĩabusanaↄ.

³⁵ Ɔ̃nↄde a bɛɛɛ e, sↄũ sↄ̃ ì wida azĩawa.

Lean sinn:

Ceanglaichean taic

Sanasan