Yáasiↄ 26 - Bòó Bibeli Luayãtaala

¹ Lá lougbɛkwɛa saɛ ge loumaa pↄkɛkɛgↄↄ lí zɛkɛo, màa gawi lí kↄ̃si ń sↄũoo.

² Lá gòlegolena ń luakitɛlɛnao ìↄ vuavua, ìↄ gɛ́ la, ìↄ ta le, màa ↄlɛlɛa gbɛ̃́ɛ pã a pↄe zↄ̃wào.

³ Flãá sↄ̃́ pↄ́ɛ, kpíá zàa'ĩna pↄ́ɛ, sↄũ pↄ́ mɛ́ go ũ a kpɛsɛa.

⁴ Ńsu yã́zãsi sↄũwa a faasaikɛwao, kɛ́ ńsu gↄ̃aàwao yã́i.

⁵ Yã́zãsi sↄũwa a faasaikɛwa, kɛ́ asu azĩa gwa ↄ̃nↄna ũo yã́i.

⁶ Tó n lɛdì sↄũɛ, n nzĩa ↄ̃̀ↄkpàɛ, n yã'ì nzĩaɛɛ.

⁷ Yáasi pↄ́ dↄ sↄũ lɛ́u dɛ lán ɛɛ gbá pↄ́ lɛ́ gbãɛwaɛ.

⁸ Sↄũ kpɛlaa dɛ lán gbɛdaa gbɛmauwaɛ.

⁹ Yáasi pↄ́ dↄ sↄũ lɛ́u dɛ lán lɛ naa wɛ̃dɛna ↄzĩwaɛ.

¹⁰ Sↄũ ge gbɛ̃pãpã daazĩu dɛ lán toekana pↄ́pii gbã́awaɛ.

¹¹ Sↄũ ɛaa a yãfaasaikɛawa lↄ dɛ lán gbɛ̃ pↄ́ ɛ̀a a pisi blèwaɛ.

¹² N gbɛ̃́ pↄ́ azĩa dìlɛ ↄ̃nↄna ũ èa? Sↄũ sã̀ↄwà.

¹³ Màade ì mɛ: Nↄ̀ↄmusu ku zɛ́uɛ, wài pãsĩ bɛ zɛau.

¹⁴ Lá gba ìↄ lili a lilibↄu, màa màade ìↄ lilɛlilɛ a wúlɛkĩi.

¹⁵ Màade ì ↄsi tau, aà blɛ li gɛ́ò a lɛ́ kĩ́i ì kɛwà ĩa.

¹⁶ Màade ìↄ e a ↄ̃nↄ dɛ yãwendↄ̃na gbɛ̃ↄn soplaↄla.

¹⁷ Vĩ pɛ́lɛa dãↄ lɛkpaau dɛ bàasi gbɛ̃ kũa a vlã́wa ũɛ.

^18-19 Gbɛ̃́ pↄ́ a gbɛ̃́dee sã̀sã ↄ̃ à gbàsa oɛ̀: Málɛ faaiboɛ dɛ lán wɛkɛyiode pↄ́ lɛ́ kà tɛde ń kagbao fã́ńguwaɛ.

²⁰ Tó yàa kuo, tɛ́ ì gaɛ, tó gbɛ̃pena kuo, sòle ì láaɛ.

²¹ Lá sĩsĩ ì kɛ tɛyↄ̃ɛ, lá yàa ì kɛ tɛ́ɛ, màa lɛkpaade ì sòle da.

²² Gbɛ̃pena yã́ ì kɛnɛ́ lán zↄ́wa, ì gɛ̃ lɛ́u dↄ̃̀ↄ e nↄ̀sɛkpɛau.

²³ Nↄ̀sɛpãsĩde pↄ́ ì yã́ nana onɛ́ dɛ lán lo pↄ́ wà ã́nusu'i lɛ̀wàwaɛ.

²⁴ Gbɛ̃́ pↄ́ ìↄ zańgu ì azĩa kɛkɛ ń lɛ́oɛ, gbɛ̃́sãsãa làasoo mɛ́ kú aà sↄ̃u.

²⁵ Tó yã́ nana bↄ̀ aà lɛ́u, ńsu sio, asa yãvãi mɛ̀n sopla mɛ́ kú aà sↄ̃u.

²⁶ Tó à a zaa gbɛ̃́ↄu ùlɛ mↄafili guu, aà vãi ì bↄ gupuau bíla wáa.

²⁷ Gbɛ̃́ pↄ́ ɛyↄ̃̀nɛ́ a zu a guuɛ, gbɛ̃́ pↄ́ gbɛ gbeembò, gbɛpi a si adewa.

²⁸ Ɛɛde za gbɛ̃́ pↄ́ ì ń ↄ̃̀ↄkpaↄgu, kↄ̃nide ì gbɛ̃́ kpá lɛ́lɛai.

Lean sinn:

Ceanglaichean taic

Sanasan