Yáasiↄ 2 - Bòó Bibeli Luayãtaala

Tɛa ↄ̃nↄi ài

¹ Ma nɛ́, tó n ma yã́ sì, mɛ́ n ma yãdilɛaↄ kũa n sↄ̃u,

² tó ńlɛ swãdↄ ↄ̃nↄyãi, mɛ́ n sↄ̃ kpà a dadaawa,

³ tó n lɛzù laaizi, mɛ́ n wiilɛ̀ yãdadaai,

⁴ tó n kpálɛkɛ̀i ã́nusu ũ, mɛ́ n wɛ̀ɛlɛ àizɛɛ ulɛa ũ,

⁵ ńyↄ̃ vĩakɛa Diiɛ mi dↄ̃ sa, ní Lua dↄ̃a e.

⁶ Asa Dii mɛ́ ì ń gba ↄ̃nↄ, dadaa ń dↄ̃ao ì bↄ aà kĩ́iɛ.

⁷ A kã́fĩa zɛ́ kũa gbɛ̃maaↄnɛ, a dɛ sɛ̀ngbao ũ tàaesaideↄnɛ.

⁸ Ì ↄlia gbɛ̃maaↄzi ń táa'oau, ì a yãmanaↄ dↄ̃́a ń yã́ píi kɛa guu.

⁹ Ńyↄ̃ yã́zɛde dↄ̃ sa ń yã́ dↄ̀ↄdeo ń yã́ pↄ́ zɛ́ vĩo ń maa píi zɛ́o.

¹⁰ Asa ↄ̃nↄ a mↄma, mɛ́ dↄ̃a a n kã́si.

¹¹ Kua ń laaio a n dↄ̃́a, yã́zɛdↄ̃a a ↄlianzi.

¹² A n bↄ gbɛ̃vãiↄ zɛ́u ń yãbɛ̃ɛkɛnaↄ ↄzĩo.

¹³ Gbɛ̃́piↄ pã̀alɛ yãmaa zɛ́ɛ, aa gusia zɛ́ sɛ̀.

¹⁴ Aaì pↄnakɛ ń vãikɛao, aaì vĩ aaↄ kɛ̃aa ń yãbɛ̃ɛ faasaio.

¹⁵ An kɛkɛá faa vĩo, aaìↄ yãkɛ ń kↄ̃nioɛ.

¹⁶ Ɔ̃nↄpi a n bↄ káalua ↄzĩ, a n si nↄɛ pãle yã́ nana oanɛwa.

¹⁷ Nↄɛpi pãkpà a nɛnↄn gↄ̃i, à a Lua bàa kuaanↄ yã́ gbòo.

¹⁸ Aà bɛ ì mipɛńnↄ gawaɛ, aà kpɛ́ zɛ́ ì táńnↄ bɛdau.

¹⁹ Gbɛ̃́ pↄ́ gɛ̃̀aàzi lí nↄ̀sɛlilɛo, ìli wɛ̃ni zɛ́ le lↄo.

²⁰ Ɔ̃nↄpi a n da gbɛ̃maaↄ zɛ́wa, níↄ dↄ̀ↄdeↄ zɛ́ kũa.

²¹ Asa nↄ̀sɛpuadeↄ mɛ́ aa gↄ̃ bùsu vĩ, tàaesaideↄ mɛ́ aaↄ ku a guu.

²² Vãikɛnaↄ sↄ̃, wa ń yá ń bↄlɛuɛ, wa náaisaideↄ kpoɛuɛ.

Lean sinn:

Ceanglaichean taic

Sanasan