Yáasiↄ 16 - Bòó Bibeli Luayãtaala

¹ Gbɛ̃nazĩna ì yã́sɛ, ãma a midɛa ì bↄ Dii lɛ́uɛ.

² Baade ì a yãkɛa e maaɛ, ãma Dii mɛ́ ìↄ ń pↄeã dↄ̃.

³ Ǹ n yã́ kpálɛ Dii gɛ̃zĩ, n pↄeã i zɛkɛ.

⁴ Dii pↄ́pii kɛ̀ a pↄeã yã́iɛ, baa vãikɛnaↄ dɛ ĩadamagↄↄ pↄ́ ũɛ.

⁵ Dii ye ĩ́andãnaↄ gĩyãio, sĩana guu aa bↄ pão.

⁶ Gbɛ̃kɛ ń náaio ì láka tàaea, vĩakɛa Diiɛ ì ń ɛ̃ vãiɛ.

⁷ Tó gbɛ̃́ yãkɛaↄ kà Diigu, ì to se aà ibɛɛↄ kɛaànↄ na.

⁸ Pↄ́ yↄↄna ea maakɛa guu maa dɛ ↄvãi'ea zↄ̃ↄla.

⁹ Gbɛ̃nazĩna ì zɛ́ pↄ́ á sɛ́ làasookɛ, ãma Dii mɛ́ ì aà kɛ̀sɛ dↄdↄɛ̀.

¹⁰ Lá kía mɛ́ ì yãdilɛ Lua gɛ̃ɛ ũ, a maa aà yã́ bↄ yã́zɛde kpɛo.

¹¹ Zaa maa ń kiloo lɛa súsuoá Dii pↄ́ɛ, a zã nɛ́na ń a gbɛ̃̀nɛo píi aà pↄkɛaɛ.

¹² Wìliↄ ye kía vãikɛna gĩyãio, wì kpala zĩ́napɛlɛ yã́zɛde musuɛ.

¹³ Yã́zɛde'ona ì ka kíagu, ìↄ ye sĩan'onai.

¹⁴ Kía pↄkũmaá ga zĩnaɛ, ãma ↄ̃nↄna ì a tɛdɛ.

¹⁵ Kía oa weea ìↄ aafia vĩ, aà nakɛnɛá káabuan louɛ.

¹⁶ Ɔ̃nↄkũa maa dɛ vuala zã̀, gↄ̃a laaide ũ bɛɛɛ dɛ ã́nusu maaa.

¹⁷ Gbɛ̃maa ì zɛ́ pↄ́ ì ɛ̃ vãiɛ sɛ́, zĩakũadↄ̃na ì a wɛ̃ni dↄ̃́a.

¹⁸ Ĩandãa ì mↄ́ ń lɛ́lɛao, zĩasɛa lɛsĩ ì mↄ́ ń ɛɛao.

¹⁹ Zĩabusaa taasideↄ guu maa dɛ baadaaa ń ĩ́andãnaↄla.

²⁰ Gbɛ̃́ pↄ́ ì laaidↄ yã́wa ì maa e, Dii náaikɛna mɛ́ ìↄ pↄna vĩ.

²¹ Gbɛ̃́ pↄ́ nↄ̀sɛ pàɛ ↄ̃ wì mɛɛ̀ wɛzɛ̃na, gbɛ̃́ pↄ́ a lɛ́ na, wì aà yãdↄ̃a zɛ́ e.

²² Laai dɛ wɛ̃ni mi ũ gbɛ̃́ pↄ́ vĩↄnɛ, faasaideↄ yãfaasai ì ń gbɛ̃.

²³ Ɔ̃nↄna làasoo ì pisi aà lɛ́wa, aà lɛ́ ì to wà aà yãdↄ̃a zɛ́ e.

²⁴ Yã́ na oaá zↄsapunaɛ, a na nↄ̀sɛu, mɛ́ ì mɛ gba aafia.

²⁵ Zɛ́ kú ì kɛ gbɛ̃́ↄnɛ maa, ãma a midɛkĩiá gaɛ.

²⁶ Sɛ̃̀wana nↄ̀sɛ ì aà dazĩu, asa nↄana ì tɛ́kpaaàguɛ.

²⁷ Gbɛ̃́ pã ì vãi kpaaĩńnↄ, yãvãi ìↄ dↄ aà lɛ́u.

²⁸ Gbɛ̃́ dↄ̀ↄsai ì sòle da, gbɛ̃pena ì gbɛ̃naↄ kɛ̃aa.

²⁹ Gbɛ̃́ pãsĩ ì kↄ̃nikɛ a gbɛ̃́deeɛ, ì aà da zɛ́ vãiwa.

³⁰ Gbɛ̃́ pↄ́ lɛ́ wɛ'i'o làasoo vãi vĩ, gbɛ̃́ pↄ́ lɛ́ lɛsuikɛ zɛ̀ ń vãioɛ.

³¹ Mikã puaá fùa í gbiaɛ, maakɛa mɛ́ ì ń káwà.

³² Nↄ̀sɛniɛde maa dɛ zĩgↄ̃a, zĩakũadↄ̃na maa dɛ wɛ̃́lɛsinala.

³³ Wì yãkɛkɛa gbɛa ń gbɛo, ãma a bↄↄlɛ ì bↄ Dii kĩ́iɛ.

Lean sinn:

Ceanglaichean taic

Sanasan