Yáasiↄ 11 - Bòó Bibeli Luayãtaala

¹ Dii za pↄ́yↄ̃a ń mↄafiliogu, kiloolɛa a zɛ́wa ì kaaàgu.

² Zĩa sɛa lɛsĩ ì mↄ́ ń wío, zĩabusaa mɛ́ ↄ̃nↄyã ũ.

³ Gbɛ̃maa nↄ̀sɛpua ì aà dazɛwa, náaisaide nↄ̀sɛ bɛ̃̀ɛ ì aà ↄ̃̀ↄkpa.

⁴ Àizɛɛ ài vĩ yã́kpalɛkɛgↄↄzĩo, yãkɛa a zɛ́wa mɛ́ ì ń sí gawa.

⁵ Tàaesaide maakɛa ì zɛpooɛ̀, vãikɛna yãvãikɛa ì aà nɛ́.

⁶ Nↄ̀sɛpuade maakɛa ì aà bↄ, náaisaide pↄnidɛa ì aà kṹ.

⁷ Tó gbɛ̃vãi gà, aà tãmaa ì midɛ, pↄ́ pↄ́ à wɛdↄ̀i a wɛ̃nigↄↄ ì láa.

⁸ Gbɛ̃maa ì bↄ taasiu, ↄ̃ gbɛ̃vãi ì gɛ̃u aà gɛ̃ɛ ũ.

⁹ Luayãdansai lɛ́ ì aà gbɛ̃́dee ↄ̃̀ↄkpa, ãma dↄ̃a ì gbɛ̃maa bↄu.

¹⁰ Tó gbɛ̃maaↄ ku namau, wɛ̃́lɛ ìↄ naɛ, tó gbɛ̃vãiↄ gàga, wì gulakɛ.

¹¹ Wɛ̃́lɛ ì kã́fĩ nↄ̀sɛpuadeↄ sabai, gbɛ̃vãiↄ lɛ́ ì wɛ̃́lɛ dɛ.

¹² Ɔ̃nↄkɛ̃sãmade ì saka a gbɛ̃́deegu, laaide ì a lɛ́ fↄ̃́.

¹³ Gbɛ̃pena ì bↄ ń dãↄ asiio gupuau, gbɛ̃́ náaide ì pↄ́ kúlɛwà.

¹⁴ Dↄaanasaikɛ ì to gbɛ̃́ↄ fu, yãkɛkɛn dasiↄ ì to wà zĩble.

¹⁵ Tó n gbɛ̃pãle fĩa dì ń miwa, taasi n kaɛ, gbɛ̃́ pↄ́ mibↄ̀lɛu ì gↄ̃ a laaiwa.

¹⁶ Gbãamↄnɛde ìↄ àizɛɛ vĩ, ãma nↄɛ nↄ̀sɛmaade ìↄ gbianɛ́.

¹⁷ Sùuude ì maa i azĩaɛ, gbɛ̃́ pãsĩ ì azĩa kpa ĩai.

¹⁸ Gbɛ̃vãi zĩ ài líↄ báaa vĩo, yãmaatↄ̃na ì ài sĩana e.

¹⁹ Kua maa sĩana ì ń ká wɛ̃niwa, tɛ́a vãizi ì mↄ́ ń gao.

²⁰ Dii ye nↄ̀sɛvãide gĩyãio, tàaesaide yã́ ì kaaàgu.

²¹ Sĩana guu gbɛ̃vãiↄ bↄ pão, gbɛ̃maaↄ mɛ́ aa bↄ aafia.

²² Lá vua tãana dɛ sàwakusana níu, màa nↄ kɛfɛn ↄ̃nↄsaide dɛ.

²³ Gbɛ̃maaↄ pↄeã ì ń ká namawa, gbɛ̃vãiↄ tãmaa ì ń nɛ́.

²⁴ Gbɛ̃́ pↄ́ ↄ pòo ì kã́fĩa e dɛ a zia, gbɛ̃́ pↄ́ gì pↄ́ pↄ́ dɛ à kpa kpái, pↄ́ ì kɛ̃́sãwà.

²⁵ Gbɛ̃nazĩn báaade àↄ ku namau, gbɛ̃́ pↄ́ ì ń gba niɛ a niɛ e sↄ̃.

²⁶ Wì gbɛ̃́ pↄ́ ì pↄ́wɛna ↄ̃a na dã kaɛ, wì sa na o gbɛ̃́ pↄ́ ì yíamáɛ.

²⁷ Gbɛ̃́ pↄ́ ì maa wɛɛlɛ aↄ na ń gbɛ̃́ↄ, gbɛ̃́ pↄ́ ì vãi wɛɛlɛ, vãi a aà le.

²⁸ Gbɛ̃́ pↄ́ ì a àizɛɛ náaikɛ a lɛ́lɛ, gbɛ̃maa a bↄlↄbↄ lán lí láwa.

²⁹ Gbɛ̃́ pↄ́ yã'ì a uaɛ a gↄ̃ gii, sↄũ a gↄ̃ ↄ̃nↄna zↄ ũ.

³⁰ Gbɛ̃maa yãkɛa gbɛá lí wɛ̃nideɛ, ↄ̃nↄna ì gbɛ̃́ e.

³¹ Lá Lua ì fĩabo gbɛ̃maaɛ dṹniau, wa vãikɛna ń duunkɛnao pↄ́ o lↄe?

Lean sinn:

Ceanglaichean taic

Sanasan