Soũ 9 - Bòó Bibeli Luayãtaala

Lua sáaukpaa kɛ́ ì yãkɛkɛ gbɛ̃́ↄnɛ yã́i

¹ Davidi lɛ.

² Dii, má n táasilɛ ń nↄ̀sɛmɛndoo, má n yãbↄnsaɛkɛaↄ kpàwakɛnɛ́.

³ Má pↄnakɛ, má yáalↄ n yã́ musu, Musude, má n tↄbↄ ń lɛsiao.

⁴ Ma ibɛɛↄ ì kpɛkpa, aaì gɛ̃mbↄlɛ aa gaga n aɛ.

⁵ Asa n zɛmanↄ, n yãnakpàa, zↄ̃lɛa n gĩ́naa n yãgↄ̃̀gↄ̃ a zɛ́wa.

⁶ N buipãleↄ lèle, n gbɛ̃vãipiↄ míↄnzↄ̃, n ń tↄ́ dɛ̀ míↄmiↄ.

⁷ N músi láasai kpà ma wɛ̀lɛↄzi, n ń wɛ̃́lɛↄ kwɛ̀, an yã́ dↄ gbɛ̃egu lↄo.

⁸ Dii ì kible gↄↄpii, à a kpala dìlɛ yã́kpalɛkɛa yã́i.

⁹ A yã́kpalɛkɛ ń dṹnia gbɛ̃́ↄ súsu, a kible buiↄwa a zɛ́wa.

¹⁰ Dii mɛ́ ulɛkĩi ũ gbɛ̃́ pↄ́ wàlɛ gbãamↄnɛ́ↄnɛ, a dɛnɛ́ aafia'ekĩi ũ taasikɛgↄↄ.

¹¹ Dii, gbɛ̃́ pↄ́ n tↄ́ dↄ̃ↄ n náai vĩ, nili n aɛyanaↄ vũaao.

¹² À lɛsi Diiɛ, àlɛ kible Siↄna, à aà yãkɛaↄ kpàwakɛ bui píiɛ.

¹³ Asa yã́ lí sã́aàguo, ì tↄsi gbɛ̃dɛnawa, ì taasideↄ wiilɛa yãda.

¹⁴ Gwa lá ma ibɛɛↄ lɛ́ ĩadaa, Dii, wɛ̃nadↄ̃mɛɛ, ní ma bↄ ga lɛ́zĩ,

¹⁵ mí lɛ́mama Siↄna bĩ́ibↄlɛu, mí pↄnakɛ kɛ́ n ma suabà yã́i.

¹⁶ Buiↄ sì ɛ pↄ́ aa yↄ̃̀u, an gbá zù ba pↄ́ aa kpàu.

¹⁷ Wa Dii dↄ̃ ń yã́kpalɛkɛa a zɛ́waoɛ, ì to gbɛ̃vãi yãkɛa labadaaàla.

¹⁸ Gbɛ̃vãiↄ ì ta bɛdau, bui pↄ́ aali Lua yãdaopiↄ.

¹⁹ Wɛ̃nadeↄ yã́ a sãaàgu bauo, taaside wɛdↄaaàzi láaa vĩo.

²⁰ Fɛlɛ Dii, ńsu to gbɛ̃nazĩna n gã fĩo, bui píi kãaa, ní yã́kpalɛkɛńnↄ.

²¹ Dii, to vĩa buiↄ kṹ, kɛ́ aa e dↄ̃ wa dɛ gbɛ̃nazĩnaↄ ũ.

Lean sinn:

Ceanglaichean taic

Sanasan