Soũ 86 - Bòó Bibeli Luayãtaala

Kowɛkɛa Luaɛ
Davidi lɛ.

¹ Dii, swã́kpa ma yã́i, ní wea, asa taaside wɛ̃naden ma ũ.

² Ma wɛ̃ni dↄ̃́a, asa má n yã́ↄ kũaɛ. Ǹ n zↄ̀blena suaba, ḿmɛ ń ma Lua ũ, málɛ n náaikɛ.

³ Sùuukɛmanↄ, Dii, asa miↄ lɛzunzi kↄↄ ń oosioɛ.

⁴ Ǹ n zↄ̀blena pↄ kɛ na, asa ma laai tà n kĩ́i, Dii.

⁵ Ń maa mɛ́ ń sùuu vĩ, Dii, n gbɛ̃kɛ zↄ̃ↄ n sìsinaↄnɛ.

⁶ Dii, swã́kpa ma wabikɛai, laaidↄ ma wɛ̃na wiiwa.

⁷ Má lɛzunzi ma taasikɛgↄↄzĩ, asa ni wea.

⁸ Tã́ae muaannↄo, Dii, gbɛ̃e lí fↄ̃ n kɛa kɛ̀o.

⁹ Bui pↄ́ ń kɛ̀ↄ mↄ́ kúlɛnɛ, aa n tↄbↄ ḿpii.

¹⁰ Asa ń zↄ̃ↄ mɛ́ ni dabudabuↄ kɛ, ḿmɛ ń Lua ũ ndo.

¹¹ Ǹ n zɛ́ ↄlↄmɛɛ Dii, míↄ bɛ n sĩana guu. Ma sↄ̃ damɛɛ doũ, míↄ n vĩa vĩ.

¹² Má n sáaukpa ń nↄ̀sɛmɛndoo, Dii ma Lua, máↄ n tↄbↄ gↄↄpiiɛ.

¹³ Asa gbɛ̃kɛ pↄ́ ń kɛ̀mɛɛ zↄ̃ↄ, n ma wɛ̃ni sì bɛda ɛ̀ títiwa.

¹⁴ Lua, kàamaideↄ lɛ́ fɛlɛmanↄ, gbɛ̃́ pãsĩↄ lɛ́ ma wɛ, aali n yãdao.

¹⁵ Mpi Dii, Lua sósobiden n ũ, ń sùuu vĩ mɛ́ n pↄ lí pa kpaao, ń gbɛ̃kɛ ń náaio vĩ zↄ̃ↄ.

¹⁶ Ma wɛ́ gwa, wɛ̃nadↄ̃mɛɛ. Ǹ n zↄ̀blena gba gbãa, mapi n nↄɛ zĩkɛna nɛ́ suaba.

¹⁷ Maakɛamɛɛ seela kɛ, ma wɛ̀lɛↄ i e, wí i ń kṹ, asa Dii, n dↄmalɛ, n ma nↄ̀sɛ nìnimɛɛ.

Lean sinn:

Ceanglaichean taic

Sanasan