Soũ 79 - Bòó Bibeli Luayãtaala

Yelusalɛũ dɛɛlɛa wii
Asafa lɛ.

¹ Lua, buipãleↄ sì ń bùsuu, aa n kpɛ́ pↄ́ a kua adoa ↄ̃̀ↄkpà, aa Yelusalɛũ dɛ̀ɛlɛ.

² Aa n zↄ̀blenaↄ dɛ̀dɛ aa ń gɛ kpà bãↄwa, aa n yãmanaↄ gɛ tò wàiↄnɛ blɛ ũ.

³ An au bàalɛ̀ lán íwa Yelusalɛũ bĩ́i kpɛ, gbɛ̃e ku à ń vĩo.

⁴ Wa gↄ̃ pↄ́ yáalↄaↄ ũ wá saɛdeↄnɛ, láanipↄ ũ gbɛ̃́ pↄ́ liaawáziↄnɛ.

⁵ Dii, n pↄ aↄ paawázi e bↄɛ ni? n kpɛ̃nɛ tɛ́ aↄ kũ gↄↄpii yã̀?

⁶ Pↄkũma bↄbↄ bui pↄ́ aa n dↄ̃oↄwa, gbɛ̃́ pↄ́ aali ń sísioↄ bùsuↄwa.

⁷ Asa aa Yakↄbu buiↄ blè, aa ń bùsu ↄ̃̀ↄkpàɛ.

⁸ Ńsu wá maeↄ duuna wi wá musuo. Wɛ̃nadↄ̃wɛ̃ɛ kpakpa, asa wa busa dúuduuɛ.

⁹ Dↄwálɛ, Lua wá Suabana. Wá misi, kɛ́ ǹ tↄbↄ, wá duuna kɛ̃́wá n tↄ́ yã́i.

¹⁰ Bↄ́yãi ńyↄ̃ to buipãleↄ wá lá: Wá Lua ku máɛ la? To buipãleↄ dↄ̃ wá aɛ, kɛ́ ni n zↄ̀blenaↄ dɛdɛa tↄsimá.

¹¹ To zĩ̀zↄↄ ↄↄlↄ gɛ̃ n swã́u, gbɛ̃́ pↄ́ kú ga lɛ́zĩpiↄ bↄ ń n gã̀sa gbãao.

¹² Láani pↄ́ wá saɛdeↄ zĩ̀ma, fĩabonɛ́ gɛ̃n sopla, Dii.

¹³ Wápiↄ n gbɛ̃́ↄ, n kpàsa sãↄ, wíↄ n sáaukpa gↄↄpii, wíↄ n tↄ́ galikɛ e wá buiwa.

Lean sinn:

Ceanglaichean taic

Sanasan