Soũ 77 - Bòó Bibeli Luayãtaala

Lua dↄnlɛ bɛɛkɛa taasi guu

¹ Asafa lɛ.

² Ma lɛzù Luazi, ma wiilɛ̀wà, ma lɛzù Luazi aà ma yãma.

³ Kua taasi guu ma Dii kĩ́i wɛ̀ɛlɛ, ma ↄ dↄa Luazi gwã́ kpasasai, ma nↄ̀sɛ i nínio.

⁴ Kɛ́ ma làasoo tà Lua kĩ́i, ↄ̃ málɛ kãsãn kɛ, kɛ́ ma aà wàaipà, ma nisĩna vùa.

⁵ Ń ma wɛ́ kũa, mi e i'òo, ma gↄ̃ bíli guu, mi dↄ̃ lá má oo.

⁶ Ma làasookɛ̀ yãawa ń wɛ̃̀ zizi pↄ́ gɛ̃̀ↄ yã́o.

⁷ Lɛ pↄ́ má dà yãa dↄ̀magu gwã́, ma làasookɛ̀wà mà wɛɛlɛ dↄ̃.

⁸ Ma mɛ̀: Dii wá vũaa gↄↄpii yã̀? Wá yã́ a kaaàgu lↄoa?

⁹ Aà gbɛ̃kɛ mìdɛ míↄmiↄ yã̀? Aà yã́ aↄ gbooa gↄↄpii yã̀?

¹⁰ Wá wɛ̃nagwaa yã́ sã̀ Luagu yã̀? Aà pↄ pàwázi, a wá wɛgwa lↄoa?

¹¹ Ɔ̃ ma mɛ̀: Yã́ pↄ́ má kũan kɛ: Musude ↄzɛɛ dↄ̀wɛ̃ɛɛ.

¹² Má làasookɛ Dii yãbↄnsaɛↄwa, mí aà yã́ pↄ́ a kɛ̀ yãaↄ dↄ gbɛ̃́ↄgu.

¹³ Má n dabudabukɛaↄ wàaipa píi, mí n yãzↄ̃ↄkɛaↄ onɛ́.

¹⁴ Lua, n zɛ́ gbãsĩ vĩo. Dii kpele mɛ́ zↄ̃ↄ lán Luawai?

¹⁵ Ḿmɛ ń Lua dabudabukɛna ũ, n n gbãa ↄ̀lↄ buiↄnɛ.

¹⁶ N n gbɛ̃́ↄ mìsi ń n gã̀sa gbãao, wá Yakↄbu ń Yosɛfuo buiↄ.

¹⁷ Ísia wɛsìnlɛ Lua, ísia wɛsìnlɛ ↄ̃ à kↄ̃dɛ̀, à lùalua za a ɛu.

¹⁸ Lou kwɛ̀, a pũnaa kↄ̃fĩ dↄ̀ luabɛ, n kà tɛdeↄ kpa loupilɛa ũ.

¹⁹ N pũnaa kↄ̃fĩ dↄ zàa'ĩana guu, loupilɛa dṹnia pù píi. Tↄↄlɛ gbãlɛ à lùalua.

²⁰ N zɛ́ dà ísiau, n gɛ̃kĩi bↄ̀ í zↄ̃ↄ guu, wi n kɛ̀sɛgbɛ eo.

²¹ N dↄaa n gbɛ̃́ↄnɛ lán sã waiwa Mↄizi ń Aalonao sabai.

Lean sinn:

Ceanglaichean taic

Sanasan