Soũ 74 - Bòó Bibeli Luayãtaala

Wiilɛa Luai aà kpɛ́ wia yã́ musu
Asafa lɛ.

¹ Lua, bↄ́yãi n giwázi e gↄↄpiii? Àkɛa ńlɛ pↄbↄ n níu n kpàsa sãↄ yã́ musui?

² Gbɛ̃́ pↄ́ n ń sí za ziↄ yã́ dↄngu, bui pↄ́ ń bò aa gↄ̃̀ ń pↄ́ ũↄ ń Siↄna gbɛ̀sĩsĩ pↄ́ ń kɛ̀ n kúkĩi ũo.

³ N ibɛɛↄ n kúkĩi dàaĩ míↄmiↄ. Dɛdɛ ń laaio, à ↄ̃̀ↄkpà píi.

⁴ N wɛ̀lɛↄ kã̀aa gu pↄ́ ni dauwálɛ, aa ńzĩa seelaↄ pɛ̀lɛ we.

⁵ Wá è, an mↄona dↄ musu, aalɛ kɛ lá wìↄ dào gbɛ̃wa.

⁶ Lí yↄↄa kɛfɛna pↄ́ wa kpà a gĩwa, aa gbɛ̃̀ wa gbòo ń mↄoo ń fɛ̃nkĩnio.

⁷ Aa tɛsↄ̃̀ n kúkĩiwa, à kwɛ̀, aa tò kpɛ́ pↄ́ n tↄ́ kuwàpi gbãlɛ̀.

⁸ Aa ò ń nↄ̀sɛu: Wà ↄtↄ̃má míↄmiↄ. Aa tɛsↄ̃̀ wá bùsu lousisikpɛↄwa.

⁹ N kpɛ́ lousisibↄↄ gɛ̃̀zɛa, ãnabie ku lↄo. Wáↄ ku màa e bↄɛn yã̀? Wá gbɛ̃e dↄ̃o.

¹⁰ Lua, ńyↄ̃ to n ibɛɛↄ aaↄ n yáalↄ e bↄɛ ni? n wɛ̀lɛↄ aaↄ sakangu láasai yã̀?

¹¹ Bↄ́yãi n ↄ kpaaũai? Ɔgo n kùɛ, ní ń dɛdɛ.

¹² Lua mɛ́ ma kía ũ za asĩnizĩ, ↄ̃mɛ ì gbɛ̃́ suaba dṹniau.

¹³ Ḿmɛ n ísia zↄ̃̀ɛ ń n gbãao, n kwãsa mi wì í guu.

¹⁴ N Egipiↄ mìdɛ we, n ń gɛↄ kpà wàiↄwa pↄblea ũ.

¹⁵ N swaↄ bↄ̀, n zɛwɛ̃̀ nibↄnaↄnɛ, n swa pↄ́ a í baa vĩo zↄ̃̀ɛ.

¹⁶ Fãanɛ ń gwãasĩnao dɛ n pↄ́ ũɛ, n mↄvua ń ĩatɛ̃o kúkĩi dìlɛnɛ́.

¹⁷ Ḿmɛ n kↄↄ dàda bùsu píiu, n saɛ ń buziɛo gↄↄ dìlɛ.

¹⁸ Yá pↄ́ n ibɛɛↄ dↄ̀ yã́ dↄngu Dii, mìsaidepiↄ sakà n tↄ́uɛ.

¹⁹ Ńsu ǹ n felena kpá wàiↄwao, n wɛ̃nadeↄ yã́ su sãnguo.

²⁰ Laaidↄ n bàakuawanↄwa, asa wá bùsu gbɛ̀'ɛↄ pãsĩkũ̀ píiɛ.

²¹ Wá gbɛ̃́ pↄ́ wàlɛ gbãamↄwɛ̃ɛↄ, ńsu to wà kpɛkpa ń wíoo. To wɛ̃nadeↄ ń taasideↄ n táasilɛ.

²² Lua, fɛlɛ gí ń nzĩao. N yá pↄ́ mìsaideↄ lɛ́ dↄ zɛsai màé!

²³ Ńsu zↄa pↄ́ n ibɛɛↄ lɛ́ kánzi kpa swã́ao, n wɛ̀lɛpiↄ kↄ̃fĩ dↄ gↄↄpiiɛ.

Lean sinn:

Ceanglaichean taic

Sanasan