Soũ 66 - Bòó Bibeli Luayãtaala

Lua sáaukpaa

¹ Dṹnia gbɛ̃́pii, à guladↄ Diiwa,

² à lɛsi aà tↄ́ gawi yã́ musu, à aà táasilɛ à aà tↄbↄ.

³ À o Luaɛ: N yãkɛaↄ ì dimá, n gbãa zↄ̃ↄ ì to n ibɛɛↄ vlãnau.

⁴ Dṹnia gbɛ̃́pii ì kúlɛnɛ, aaì n táasilɛ aa n tↄbↄ.

⁵ À mↄ Lua yãkɛaↄ gwa, yã́ pↄ́ a kɛ̀ gbɛ̃nazĩnaↄnɛ i diwá.

⁶ À ísia lì gugii ũ aa bùa swawa kɛ̀sɛ. Wà pↄnakɛ aà yã́ musu.

⁷ Ìↄ kible ń a gbãao gↄↄpii, aà wɛ́ ìↄ ku bui píiwa. Swã́gbãadeↄ su dↄ́ɛaànↄo.

⁸ Buipãleↄ, à wá Lua sáaukpa, aà táasilɛa àↄ dↄ á lɛ́u.

⁹ Ìↄ wá wɛ̃ni dↄ̃́awɛ̃ɛ, ìli tó wa kpaguao.

¹⁰ Lua, asa n wá yↄ̃́, n wá baasa lán ã́nusuwa.

¹¹ N gɛwanↄ gukpaoloonau, n wá wó wì ń aso gbiao.

¹² Ń tò wà ↄzↄ̃̀zↄ̃ wá mikpɛi, wà tɛ́ dìwɛ̃ɛ, í wá kṹ wá nↄɛ, ↄ̃ n mↄwanↄ gu namadeɛ beeu.

¹³ Má mↄ́ n ua ń sa pↄ́ wì a pↄ́ kátɛu à tɛ́kũ obↄo, má lɛ́ pↄ́ má kɛ̀maↄ fĩabo,

¹⁴ yã́ pↄ́ bↄ̀ ma lɛ́u ma taasikɛgↄↄ.

¹⁵ Má sa'oma ń pↄ́ mɛkpaaↄ, má sãsakaoↄ kpasanɛ, mí n gbagba ń zuswanaↄ ń blesanaↄ.

¹⁶ Á gbɛ̃́ pↄ́ á Lua vĩa vĩↄ, à mↄ ma, mí yã́ pↄ́ a kɛ̀mɛɛ oɛ́.

¹⁷ Ma wiilɛ̀wà, aà táasilɛa dↄ ma lɛ́u.

¹⁸ Tó má yãvãi kũa ma sↄ̃u, dↄ̃ Dii gì ma yãmai.

¹⁹ Ãma à ma yãmà, ↄ̃ à ma wabikɛa sì.

²⁰ Má Lua sáaukpa, i gí ma wabikɛa maio, i gí gbɛ̃kɛkɛimɛɛo.

Lean sinn:

Ceanglaichean taic

Sanasan