Soũ 55 - Bòó Bibeli Luayãtaala

Wabikɛa Luawa kua ĩadama guu

¹ Davidi lɛ. Wì sí ń kúuↄɛ.

² Lua, ma wabikɛama ma, ńsu láka ma yã́ao.

³ Swã́sɛ ma yã́i, ní wea, ma làasoo lìaa ma gↄ̃ bíli guu,

⁴ ma ibɛɛↄ yã'oa ń gbɛ̃vãiↄ wɛbiiaao yã́i. Asa aalɛ taasi daaɛ, aa ma kũa ń kpɛ̃nɛo.

⁵ Sↄ̃ kɛ̃̀magu, ga tòlobi zùmagu.

⁶ Vĩa ma kũ ń lualuaao, iwãa pãsĩ kà ma pↄa.

⁷ Tó má gã̀sĩa vĩ lán felenawa, má vua gɛ́ kã́maboiɛ.

⁸ Má bàalɛ gɛ́ zã̀zãɛ, mí gɛ zↄ̃lɛ guwaiwaiu.

⁹ Má wã gɛ ulɛkĩi wɛɛlɛ, kɛ́ zàa'ĩan gbãa su ma leo yã́i.

¹⁰ Ǹ ń fu Dii, ǹ ń yã́ yãalɛnɛ́, asa má è zↄa ń sòleo kú wá wɛ̃́lɛuɛ.

¹¹ Aaì kpálɛkɛ bĩ́i musu fãanɛ ń gwãasĩnao, yãvãi ń yã́ gbãao di wɛ̃́lɛpiuɛ.

¹² Gbɛ̃dɛdɛa yã́ mɛ́ wɛ̃́lɛpi pà, gbãamↄanɛ́ ń mↄafilio lí kɛ̃́lɛ a gãaɛo.

¹³ Tó ibɛɛ mɛ́ lɛ́ ma wɛ yãa, a sã̀ↄ, tó ma wɛ̀lɛ mɛ́ fɛ̀lɛmanↄ, má ulɛɛ̀ɛ.

¹⁴ É'e mpi! N gbɛ̃́ pↄ́ wá sáa, ma gbɛ̃do pↄ́ dɛ ma gbɛ̃na ũɛa?

¹⁵ Wi faaibo ń kↄ̃o yãa nana, wiↄ tɛkↄ̃i dasi guu Lua uaa?

¹⁶ Ga a zãmakɛ ma ibɛɛↄnɛ, aai si bɛdau ń gbãagↄↄ, asa vãi zↄ̃lɛkĩi è ń guuɛ.

¹⁷ Mapi sↄ̃ mi lɛzu Luazi, ↄ̃ Dii ì ma suaba.

¹⁸ Kↄↄ, fãanɛ ń oosio miↄ a yã'ↄ̃maↄ bↄlɛɛ̀ ń aauo, ↄ̃ ì ma yãma.

¹⁹ Baa kɛ́ ma ibɛɛↄ dasi, aali ma leo, Lua ì ma bↄ sòleu aafia.

²⁰ Luapi ìↄ zↄ̃lɛa báawa gↄↄpiiɛ, a ma yãma, i widamá. Aali nↄ̀sɛlilɛo, aaliↄ aà vĩa vĩo.

²¹ Gbɛ̃́pi ↄ wãa ń a gbɛ̃́ↄ, à bↄ̀ lɛdoũ pↄ́ aa kɛ̀ ń kↄ̃o kpɛ.

²² Ì na o ń wáa lán zↄ́wa, ãma sòle làasoo mɛ́ kú aà sↄ̃u. Ì lɛnakasanɛ́ páipai, ãma yaalↄma ba da bↄ̀ↄuɛ.

²³ Ɔzↄ̃ Diiɛ n yã'ↄ̃maↄi, iↄ n kũa, ìli tó gbɛ̃maa fù bauo.

²⁴ Gbɛ̃dɛna náaisaidepiↄ ń gↄↄ guo leo. Lua, ńyↄ̃ to aa si bɛda gbã́ou. Mapi sↄ̃ máↄ n náai vĩ.

Lean sinn:

Ceanglaichean taic

Sanasan