Soũ 44 - Bòó Bibeli Luayãtaala

Isailiↄ wɛ̃nakɛa

¹ Kole buiↄ lɛ.

² Lua, yã́ pↄ́ ń kɛ̀ wá deziↄ gↄↄ, aa òwɛ̃ɛ wá swã́ mà.

³ N ↄpɛ̀ buipãleↄwa n ĩadàmá, n wá deziↄ kàlɛ ń gbɛu aa ↄtàu.

⁴ An fɛ̃nda mɛ́ ń ká bùsupiwao, an gã̀sa gbãa ↄ̃ aa zĩblèòo. N zĩa gã̀sa gbãa mɛ́ kɛ̀, n kuańnↄ gupùnɛ́, kɛ́ ń yeńzi yã́i.

⁵ Ḿmɛ ń ma kía ũ ma Lua, ni to Yakↄbu buiↄ zĩble.

⁶ Ń n báaao wi ↄpɛ wá ibɛɛↄwa, ń n tↄ́o wi ↄ̃zↄ̃ wá wɛ̀lɛpiↄwa.

⁷ I kɛ ma sá málɛ a náaikɛo, i kɛ ma fɛ̃nda mɛ́ ì ma bↄo.

⁸ Asa ḿmɛ ni wá sí wá ibɛɛↄwa, ni wida wá zangudeↄwa.

⁹ Lua, wiↄ n táasilɛ gↄↄpii, wiↄ n tↄbↄ láasai.

¹⁰ Ń beeo n ↄpɛ̀wá ń tò wí wá kṹ, nili bↄ ń wá zĩgↄ̃ↄ lↄo.

¹¹ Ń tò wa pↄ̀ↄbↄzã kɛ̀ wá ibɛɛↄnɛ, ń tò wá zangudepiↄ wá pↄ́ↄ nàaa.

¹² N ń gbá zɛ́ aa wá dɛdɛ lán sãↄwa, n wá fãaa buipãleↄ guu.

¹³ N n gbɛ̃́ↄ yìa àa'aa, ni ài'e ń yíaa yã́ musuo.

¹⁴ Ń tò wá saɛdeↄ wá sↄ̃sↄ̃, gbɛ̃́ pↄ́ liaawáziↄ wá láanikɛ̀.

¹⁵ Ń tò wa gↄ̃ yãa ũ buipãleↄnɛ, gbɛ̃́ↄ ìↄ midɛwɛ̃ɛ.

¹⁶ Miↄ kú ń wío gↄↄpiiɛ, ma gɛɛ gↄ̃̀ kpa ma wɛ́i,

¹⁷ ma láanikɛnaↄ ń ma sↄ̃̀sↄ̃naↄ yã́i ń ma ibɛɛ pↄ́ aa ye tↄsiaↄ yã́o.

¹⁸ Bee wá lé píi, baa kɛ́ n yã́ i sã́wáguo, mɛ́ wi ń bàakuawanↄ yã́ gbooo.

¹⁹ Wá nↄ̀sɛ i liaamao, wi kɛ̃ n zɛ́wao.

²⁰ N wá wiwi n wá ká gu gbɛ̃gbondeu, n gusia zↄ̃ↄ kũ̀aawá.

²¹ Tó wá Lua tↄ́ sã̀wágu, ge tó wa wɛdↄ̀ dii zĩ̀lozi yãaɛ,

²² Lua a gí eie? Asa ↄ̃mɛ wá nↄ̀sɛ yã́ dↄ̃ píi.

²³ N yã́i wá kú ga lɛ́zĩ gↄↄpii, wì wá dilɛ lán sã pↄ́ wa ń kòlokpaↄwa.

²⁴ Vu, Dii! Àkɛa ńlɛ i'oi? Fɛlɛ! Ńsu wá vũaa gↄↄpiio.

²⁵ Àkɛa n mikpɛlìwɛ̃ɛi? Wá wɛ̃nakɛa ń wá wɛtãao sã̀ngu yã̀?

²⁶ Wa gↄ̃ ye bùsutiu, wa gↄ̃ wúlɛa tↄↄlɛ.

²⁷ Fɛlɛ dↄwálɛ! Mↄ ǹ wá misi n gbɛ̃kɛ yã́i.

Lean sinn:

Ceanglaichean taic

Sanasan