Soũ 41 - Bòó Bibeli Luayãtaala

Gyãe wabikɛa

¹ Davidi lɛ.

² Báaaden gbɛ̃́ pↄ́ ì yɛ̃̀ɛɛsaide yãda ũ, Dii ì aà bↄ taasikɛgↄↄ.

³ Dii a aà dↄ̃́a, a aà gba wɛ̃ni, a báaadaaàgu aà bùsuu, a aà kpa aà ibɛɛↄwa aa ń pↄeã daɛ̀o.

⁴ Dii a zɛaànↄ aà gyãkɛa guu, a to aà gyãpi ble.

⁵ Ma mɛ̀: Dii, ma duunakɛ̀nɛ, ma wɛ̃nagwa, ní ma gbã́gbã.

⁶ Ma ibɛɛↄ lɛ́ ga kpaaĩmanↄ aa mɛ̀: A ga bↄɛ ni? Bↄɛ aà tↄ́ a midɛi?

⁷ Tó aa mↄ̀ ma gwai, yã́ yàaa aaì bↄlɛmɛɛ, aaì bao vãi wɛɛlɛ ma yã́ musu, ↄ̃ aaì fɛlɛ gɛ fãaa bàasi.

⁸ Ma zangudeↄ ì vãi kpaaĩmanↄ, aaì àsi bɛ̃̀ɛ dↄa aaì mɛ:

⁹ Gagyã mɛ́ aà lè, a fɛlɛ a wúlɛkĩi beeu lↄo.

¹⁰ Baa ma kpàasia pↄ́ má aà náai vĩ wi pↄble sãnu bↄ̀ ma kpɛ.

¹¹ Mpi sↄ̃ Dii, ma wɛ̃nagwa, ma gbã́gbã, mí fĩabonɛ́.

¹² Tó ma ibɛɛↄ i kúkua dↄao, máↄ dↄ̃ sa kɛ́ ma yã́ kàngu.

¹³ Ń ma kũa ma nↄ̀sɛmaa yã́i, n aɛ ìↄ dↄa gↄↄpii.

¹⁴ Báaade Dii, Isailiↄ Lua za asĩnizĩ e gↄↄpii! Ãmi! Ãmi!

Lean sinn:

Ceanglaichean taic

Sanasan