Soũ 34 - Bòó Bibeli Luayãtaala

Dii maakɛa

¹ Lɛ pↄ́ Davidi dà gↄↄ pↄ́ à azĩa dìlɛ ĩ́ande ũ Abimɛlɛki aɛ, ↄ̃ Abimɛlɛki aà yà, à tà.

² Máↄ Dii sáaukpa gↄↄpiiɛ, míↄ aà táasilɛ lá gu lɛ́ dↄ.

³ Máↄ ĩ́anadã Dii yã́ musu, taasideↄ i ma, aai pↄnakɛ.

⁴ À zↄ̃ↄkɛ dↄ̃ Diiɛmanↄ, wí aà tↄbↄ sãnu.

⁵ Ma Dii kĩ́i wɛ̀ɛlɛ ↄ̃ a wèa, à ma bↄ ma sↄ̃̀deedee guu.

⁶ Gbɛ̃́ pↄ́ aà wɛ́ dↄaàzi a yáalↄ, aà gɛɛ a gↄ̃ kpa aà wɛ́i bauo.

⁷ Ma taasidekɛ guu ma lɛzù Diizi, ↄ̃ à ma yãmà à ma bↄ ma yooyea píi guu.

⁸ Dii Malaika ìↄ ku a vĩakɛnaↄ saɛ, ì ń bↄ.

⁹ À iɛ àↄ dↄ̃ lá Dii maa, báaaden gbɛ̃́ pↄ́ nàaàzi ũ.

¹⁰ Dii gbɛ̃́ↄ, à vĩakɛɛ̀, pↄe lí kɛ̃́sã aà vĩakɛnaↄwao.

¹¹ Nↄana ì nↄ̀ↄmusu dɛ, pↄblea ì kɛ̃́sãwà, ãma pↄmaae lí kɛ̃́sã Dii kĩ́i wɛ̀ɛlɛnaↄwao.

¹² Gbɛ̃́ↄ, à mↄ ma yãma, mí vĩakɛa Diiɛ dadaɛ́.

¹³ Gbɛ̃́ pↄ́ ye a wɛ̃ni àↄ maa, mɛ́ a ye a kua àↄ na,

¹⁴ aà a lɛ́ fↄ̃́ ń yãvãi oao, asu to ɛɛ bↄ a lɛ́uo.

¹⁵ Aà mikɛ̃ vãiwa, i maakɛ, aà aafia zɛ́ wɛɛlɛ, iↄ tɛi.

¹⁶ Dii ìↄ wɛ́tɛ gbɛ̃maaↄzi, ì swã́kpa ń wiilɛai.

¹⁷ Dii ì mikpɛdↄ vãikɛnaↄnɛ, kɛ́ an yã́ su dↄ gbɛ̃egu lↄo yã́i.

¹⁸ Tó wà lɛzù Diizi, ì ma, ì ń bↄ ń yooyea píi guu.

¹⁹ Dii kãi ń gbɛ̃́ pↄ́ an pↄ yàↄ, ì dↄ gbɛ̃́ pↄ́ an kã́ gàↄlɛ.

²⁰ Taasi ìↄ gbɛ̃maa le mↄ̀ↄmↄↄ, ãma Dii ì aà bↄ a guu píi.

²¹ Ì aa wáↄ dↄ̃́aɛ̀ píi, ìli ɛ́o, baa mɛ̀ndo.

²² Kìsia a gbɛ̃vãiↄ dɛdɛ, yã́ a zↄ̃lɛ gbɛ̃maa ibɛɛↄwa.

²³ Dii ì a zↄ̀blenaↄ suaba, yã́ a zↄ̃lɛ gbɛ̃́ pↄ́ nàaàziwao.

Lean sinn:

Ceanglaichean taic

Sanasan