Soũ 32 - Bòó Bibeli Luayãtaala

Duuna'oa Luaɛ
Davidi lɛ.

¹ Báaaden gbɛ̃́ pↄ́ Dii aà tàae wòlowà à aà duuna kɛ̃̀wà ũ.

² Báaaden gbɛ̃́ pↄ́ Dii lí aà tàae yãda lↄo mɛ́ mↄafili kú aà nↄ̀sɛ guuo ũ.

³ Kɛ́ má nílɛ ń ma duunao, ma ibàba, ma wii ìↄ dↄ za kↄↄ e oosi.

⁴ N ↄtↄ̃ↄlɛaa fãanɛ ń gwãasĩnao, ma yɛ̃̀ɛɛ làa lá guantɛ̃na ĩatɛ̃ ma gbɛ̃wa.

⁵ Ɔ̃ ma wenɛ ma duunai, mi a yãvãi ulɛnɛ lↄo. Ma mɛ̀ má a tàaeↄ onɛ Dii, ↄ̃ n ma duuna kɛ̃̀a.

⁶ N náaikɛna wabikɛma a gↄↄwa, tó yã'ĩa lɛ́ mↄ́, a aà le lↄo.

⁷ Ma ulɛkĩin n ũ, ni ma bↄ wɛ́tɛ̃a guu, ni liamazi ǹ ma suaba.

⁸ Dii òmɛɛ à mɛ̀: Má yãdanɛ, mí n da zɛ́ pↄ́ dɛ ǹ sɛwa, má lɛdama, míↄ wɛ́tɛnzi.

⁹ Ńsu ǹyↄ̃ ku làasoosai lán sↄ̃́ ge sↄ̃baonawao. Tó ni ã̀asĩna kánɛ́ ge kpío, aali n dↄ̀ↄ sɛo.

¹⁰ Yã'ↄ̃ma ì li gbɛ̃vãiↄla, Dii gbɛ̃kɛ ì li aà náaikɛnaↄla.

¹¹ Gbɛ̃maaↄ, à pↄnakɛ ń Diio, nↄ̀sɛpuadeↄ, à gulakɛ, í yáalↄ.

Lean sinn:

Ceanglaichean taic

Sanasan