Soũ 148 - Bòó Bibeli Luayãtaala

Dii pↄkɛaↄ aà táasilɛa

¹ Àleluya! À Dii táasilɛ aà bɛdeↄ! À aà táasilɛ za musu!

² À aà táasilɛ aà malaikaↄ píi! À aà táasilɛ aà ìwaↄ píi!

³ À aà táasilɛ ĩatɛ̃ ń mↄvuao! À aà táasilɛ saan'inaↄ píi!

⁴ Bàluma kpɛle pↄ́ↄ ń í pↄ́ kú luabɛpuanaaↄ, à aà táasilɛ.

⁵ Aa Dii tↄbↄ, asa ↄ̃mɛ yã'ò, ↄ̃ aa kɛ̀.

⁶ À ń pɛpɛ ń pɛ́pɛkĩi, aaↄ ku we gↄↄpii, à kↄↄ dànɛ́, aa fↄ̃ vĩao.

⁷ Pↄ́ pↄ́ kú tↄↄlɛↄ, à Dii táasilɛ, ń kpↄ̀ gbɛ̃̀nɛↄ ń ísia í títiuↄ

⁸ ń loupilɛao ń lousisiao ń lou'io ń a gbɛo ń zàa'ĩana pↄ́ ì misiilɛ aà yã́ɛo

⁹ ń gbɛ̀sĩsĩↄ ń sĩ̀sĩↄnaↄ píi ń lí nɛ'inaↄ ń sɛdɛ líↄ píi

¹⁰ ń sɛ̃̀anↄbↄↄ ń pↄtuoↄ píi ń pↄ́taa'onkuawaↄ ń bãↄ

¹¹ ń dṹnia kíaↄ ń buiↄ píi ń kíaↄ ń bùsu gbãadeↄ píi

¹² ń ɛ̀waasoↄ ń wɛ̃́ndiaↄ píi ń gbɛ̃zↄ̃ↄↄ ń nɛ́fɛ̃nɛnaↄ.

¹³ À Dii tↄbↄ, asa aà tↄ́ mɛ́ dɛńla, aà zↄ̃ↄkɛ dɛ musu ń zĩ́lɛo pↄ́a.

¹⁴ À kía gbãade kpà a gbɛ̃́ↄnɛ gbɛ̃́ pↄ́ Isailiↄ ì aà táasilɛ ũ, aà yãmana pↄ́ kãiaànↄpiↄ. Àleluya!

Lean sinn:

Ceanglaichean taic

Sanasan