Soũ 140 - Bòó Bibeli Luayãtaala

Wabikɛa gbɛ̃vãiↄ yã́ musu

¹ Davidi lɛ.

² Dii, ma si gbɛ̃vãiↄwa, ma dↄ̃́a gbɛ̃́ pãsĩpiↄ yã́i.

³ Aaì yãvãi wàaipa ń sↄ̃ guu, sòle lɛ́ ↄ̃ aaìↄ wɛ́ gↄↄpii.

⁴ Aaì ń lɛ́ kɛkɛ lán mlɛ̃wa, an lɛgbɛ'iá sↄ̀gbala sɛwɛɛ.

⁵ Dii, ńsu to gbɛ̃vãiↄ ↄkãao, ma si gbɛ̃́ pãsĩpiↄwa, aaì ↄzↄ̃amazi lɛkpaaĩ.

⁶ Waladepiↄ ɛyↄ̃̀mɛɛ, aa filifilimbakpàmɛɛ, aa baikpàmɛɛ zɛ́u.

⁷ Má ò Diiɛ: Ma Luan n ũ, swã́kpa ma wɛ̃na wiii, Dii.

⁸ Dii Lua, ma suabana gbãa, ni ↄkumala zĩ guu.

⁹ Ńsu to gbɛ̃vãiↄ pↄeã zɛkɛo, Dii, ńsu to an lɛkpaaĩ kↄ̃sɛo.

¹⁰ To gbɛ̃́ pↄ́ liaamaziↄ midɛ, to vãi pↄ́ aalɛ o wí ń musu.

¹¹ To tɛyↄ̃ wãa ɛ́lɛmá, to aa si ɛ pↄ́ aa fↄ̃ bↄuo guu.

¹² Ńsu to yã́siade zɛkĩi e dṹniauo, to vãi aↄ gbɛ̃́ pãsĩ wɛ zɛsaiɛ.

¹³ Má dↄ̃ Dii ì yãnakpa wɛ̃nadeↄwa, ì yãkɛkɛ taasideↄnɛ a zɛ́wa.

¹⁴ Gbɛ̃maaↄ mɛ́ aa n tↄbↄ, nↄ̀sɛpuadeↄ mɛ́ aaↄ ku n kĩ́i.