Soũ 132 - Bòó Bibeli Luayãtaala

Davidi buiↄ zↄ̃lɛa báawa Siↄna

Gɛa Yelusalɛũ lɛ.

¹ Dii, ńsu to Davidi yã́ sãngu ń taasi pↄ́ a kɛ̀o píi.

² À lɛkɛ̀ Yakↄbu Lua gbãadewa, à lɛgbɛ̃̀ Diiɛ à mɛ̀,

³ á tá kpɛ́uo, á wúlɛ a liiwao,

⁴ á we i a wɛ́baa gbiakũo, á tó i na a wɛ́uo,

⁵ e à gɛ uakpaò Diiɛ, i kpɛdↄ Yakↄbu Lua gbãadepiɛ.

⁶ Wá mà a ku Ɛflata bùsuu, wá è Kiliayaaliũdeↄ bua.

⁷ Wà gɛ́ aà kúkĩi, wà kúlɛ aà gbadibↄ aɛ.

⁸ Dii, fɛlɛ su n pilakĩi, mpi ń n kpagolo ikodeo.

⁹ N gbàgbanaↄ gbɛ̃suabaa da ula ũ, n yãmanaↄ gula iↄ dↄ.

¹⁰ Ńsu mikpɛdↄ kía pↄ́ ń kpàɛo n zↄ̀blena Davidi yã́i.

¹¹ Dii lɛgbɛ̃̀ Davidiɛ, a náai vĩ, a lɛ́ lilɛo, à mɛ̀: Má n bui zↄ̃lɛ n kpalabaawa.

¹² Tó n buiↄ ma bàakuańnↄ yãdà, mɛ́ aa yã́ pↄ́ má dànɛ́ↄ kũa, an buiↄ aaↄ zↄ̃lɛ n kpalabaawa gↄↄpiiɛ.

¹³ Asa Dii Siↄna sɛ̀, a ye àↄ dɛ a zↄ̃lɛkĩi ũ à mɛ̀:

¹⁴ Guɛ bee máↄ kuu gↄↄpii, la máↄ zↄ̃lɛau, asa à ma pↄ́ gbàɛ.

¹⁵ Má báaadau, mí kũ̀sũa diɛ̀, má blɛ kpa a wɛ̃nadeↄwa aa kã́.

¹⁶ Má gbɛ̃suabaa da sa'onaↄnɛ ula ũ, ma yãmanaↄ lɛtɛ̃ iↄ dↄ ń pↄnao.

¹⁷ We má Davidi bui kía gbãade bↄu, we kía pↄ́ má kpà filia aↄ dↄu.

¹⁸ Má wida aà ibɛɛↄwa, aà kíafua iↄ pipi aà musu.