Soũ 103 - Bòó Bibeli Luayãtaala

Lua gbɛ̃kɛ
Davidi lɛ.

¹ Má Dii sáaukpa, má aà tↄ́ pↄ́ kú adoa bↄ ń nↄ̀sɛmɛndoo.

² Má Dii sáaukpa, aà maakɛae a sãmaguo.

³ Ì sùuukɛmanↄ ń ma tàaeↄ píi, ì ma gbã́gbã ń ma gyãↄ píi.

⁴ Ì ma bↄ ga lɛ́zĩ, ì maakɛmɛɛ a gbɛ̃kɛ guu.

⁵ Ì to pↄmaaↄ mↄa, mí ɛa su ɛ̀waaso ũ lán kúuwa.

⁶ Dii ì yãkɛ a zɛ́wa, ì to yã́ bↄ ń gbɛ̃́ pↄ́ wàlɛ gbãamↄnɛ́ↄnɛ na.

⁷ A tò Mↄizi a pↄeã dↄ̃̀, à a yãkɛaↄ ↄ̀lↄ Isailiↄnɛ.

⁸ Dii sùuu vĩ ń sósobio, aà pↄ́ lí pa kpaao, a gbɛ̃kɛ vĩ maamaaɛ.

⁹ Ìliↄ zↄadↄmá láasaio, aà pↄ líↄ fɛ̃a gↄↄpiio.

¹⁰ Ìli yãkɛwɛ̃ɛ wá duunawao, ìli ĩadawá wá vãikɛawao.

¹¹ Lá luabɛ lɛsĩ dɛ ń tↄↄlɛo, màa a gbɛ̃kɛ vĩ zↄ̃ↄ ń a vĩakɛnaↄ.

¹² Lá gukpɛ zã̀ kↄ̃ɛ ń bɛ'aɛo, màa ì wá tàaeↄ kɛ̃́wá.

¹³ Lá mae ì a nɛ́ↄ wɛ̃nagwa, màa Dii ì wɛ̃nadↄ̃ a vĩakɛnaↄnɛ,

¹⁴ asa a wá kɛbↄ dↄ̃, wá dɛa bùsuti ũ dↄaàgu.

¹⁵ Gbɛ̃nazĩna wɛ̃ni dɛ lán sɛ̃waɛ, ìↄ gawi vĩ gↄↄpla lán lávuwaɛ.

¹⁶ Tó ĩ́anapɛ̀wà, ì gɛ̃lɛɛ, a kúkĩi líↄ dↄ gbɛ̃egu lↄo.

¹⁷ Dii ìↄ gbɛ̃kɛ vĩ ń a vĩakɛnaↄ za asĩnizĩ e gↄↄpii, ì maakɛ ń nɛ́ↄnɛ ń ń tↄũnaↄ,

¹⁸ gbɛ̃́ pↄ́ zɛ̀ ń aà bàakuańnↄ yã́o aa yã́ pↄ́ a dìlɛↄ kũaↄ.

¹⁹ Dii a kpalabaa kpàlɛ musu, a iko vĩ gbɛ̃́piiwa.

²⁰ À Dii sáaukpa aà malaikaↄ, ikode pↄ́ i aà yã'onɛ ma à zĩkɛwàↄ.

²¹ À Dii sáaukpa, aà ìwaↄ píi, aà zĩkɛna pↄ́ i aà pↄeã kɛↄ.

²² À Dii sáaukpa, aà pↄkɛaↄ píi gu pↄ́ àlɛ kibleuↄ píi. Má Dii sáaukpa.

Lean sinn:

Ceanglaichean taic

Sanasan