Soũ 102 - Bòó Bibeli Luayãtaala

Yɛ̃̀ɛɛsaide wabikɛa

¹ Wɛ̃nade yɛ̃̀ɛɛsaide pↄ́ lɛ́ a yã'ↄ̃maↄ bↄlɛ Diiɛ wabikɛa.

² Dii, ma wabikɛa ma, to ma wiilɛama ká.

³ Ńsu bↄ ma kpɛ ma taasikɛgↄↄo, swã́kpamazi. Tó ma lɛzùnzi, wea kpakpa,

⁴ asa ma gↄↄ lɛ́ gɛ̃ lán súɛlɛwaɛ, ma mɛ lɛ́ pusu bↄ lán tɛyↄ̃wa.

⁵ Ma sↄ̃ lɛ́ wo, málɛ ibaba lán sɛ̃wa, blɛblea yã́ lí dↄmagu mà bleo.

⁶ Ma aaukɛa mɛ́ tò ma gↄ̃ wákambaau ũ.

⁷ Ma gↄ̃ lán gbáa gbaonawa, lán bɛzia koowa.

⁸ I lí gɛ̃ ma wɛ́uo lán bã mɛ̀ndona pↄ́ pɛ́ kpɛ́ musuwa.

⁹ Ma ibɛɛↄ ìↄ ma sↄ̃sↄ̃ gↄↄpiiɛ, ma láanikɛnaↄ ì gbɛ̃́ ká ń ma tↄ́o.

¹⁰ Túfu mi ble blɛ ũ, ma wɛ́'i ì ka ma imia guu

¹¹ n pↄkũma ń n kpɛ̃nɛo yã́i, asa n ma sɛ n ma pãlɛɛ.

¹² Ma wɛ̃ni lɛ́ gɛ̃zɛa lán uenawa, ↄ̃ málɛ giigaga lán sɛ̃wa.

¹³ Mpi Dii, ń zↄ̃lɛa báawa gↄↄpii, ńyↄ̃ↄ dɛ tↄde ũɛ e wá buiwa.

¹⁴ Ńyↄ̃ fɛlɛ wɛ̃nadↄ̃ Siↄnaɛ, asa n sùuukɛaaànↄ gↄↄ kà sa.

¹⁵ Aà gbɛↄ kɛ̀ n zↄ̀blenaↄnɛ maa, aà daaĩa ìↄ kɛwɛ̃ɛ wɛ̃naɛ.

¹⁶ Bui píi a vĩakɛnɛ, Dii, dṹnia kíaↄ gawi dↄ̃nɛ ḿpii.

¹⁷ Asa Dii a ɛa Siↄna kálɛ lↄ, i bↄ mↄ́má we ń gawio.

¹⁸ A gbɛ̃́ pↄ́ gↄ̃̀ yↄ́ↄyↄↄↄ wabikɛa sí, a ń wiilɛawa kpa swã́ao.

¹⁹ Wa yã́pi kɛ̃ ziadeↄ yã́iɛ, gbɛ̃́ pↄ́ kúopiↄ i Dii táasilɛ.

²⁰ Dii wɛkpàlɛ zĩ́lɛ za a kúkĩi, kua za musu à wɛzù tↄↄlɛ,

²¹ kɛ́ à e gbɛ̃́ↄ zↄblewii ma, i ń bↄ ga lɛ́zĩ yã́i,

²² wi Dii tↄbↄ Siↄna, wi aà táasilɛ Yelusalɛũ.

²³ Gↄↄ bee bùsu píi gbɛ̃́ↄ kãaa we, bùsu píi gbɛ̃́ↄ mↄ misiilɛiɛ̀.

²⁴ Kua ma sápaagↄↄ à ma busa, à ma wɛ̃ni kulun kṹ.

²⁵ Ɔ̃ ma mɛ̀: Ma Lua, ńsu ma sɛ kpóoo, n gbɛ̃́ bee, n wɛ̃ni láaa vĩo.

²⁶ N tↄↄlɛ kàlɛ za asĩnizĩ, musuá n ↄzĩkɛaɛ.

²⁷ Ampii a gɛ̃, ãma ńyↄ̃ↄ kuɛ. Aa zikũ lán pↄkasawa píiɛ, ńyↄ̃ ń lilɛ lán ulawa aa gɛ̃lɛ.

²⁸ Mpi sↄ̃ ńyↄ̃ↄ doũ gↄↄpiiɛ, n gↄↄ láaa vĩo.

²⁹ N zↄ̀blenaↄ nɛ́ↄ zɛdↄ, an buiↄ aaↄ ku n aɛ.

Lean sinn:

Ceanglaichean taic

Sanasan