Bìoball air-loidhne

Isaia 65 - Bòó Bibeli Luayãtaala

Yã́kpalɛkɛa ń Isailiↄ

¹ Ma sↄu mà mà wemá, ↄ̃ gbɛ̃e i ma gbɛao, má kɛ̀ wà ma e, ↄ̃ gbɛ̃e i ma kĩ́i wɛɛlɛo. Má ò bui pↄ́ lɛ́ ma sisioↄnɛ: Má kɛ́! Má kɛ́!

² Ma ↄ ìↄ dↄa bui swã́gbãadeↄzi, kási aa bɛ zɛ́ vãi guu tɛa ńzĩa pↄeãi.

³ Bui pↄ́ ìↄ ma lɛ́ wɛ gↄↄpiin ń ũ, aaìↄ sa'o swaluu, aaì tulaletikatɛa tàasoↄu.

⁴ Aaì zↄ̃lɛ miai, aaì i bàalikpɛu, aaì sa'osawa nↄ̀ↄ só, aaì pↄ́ bɛ̃̀ɛↄ yãma dɛ ń dou.

⁵ Aaì mɛ: Ɛa, ńsu sↄ̃mazio, asa má ye mà gↄ̃ gbãlɛao! Gbɛ̃́ beeↄ dɛ tɛ́ pↄ́ ìↄ kũ gↄↄpii súɛlɛ ũ ma nízĩɛ.

⁶ Dii mɛ̀: Gwa! A kɛ̃a láu ma aɛ, máↄ nílɛo, má fĩabonɛ́ à gɛ̃ ń kṹ,

⁷ má fĩabonɛ́ ń duuna ń ń deziↄ duunao yã́ musu píi, asa aa tulaletikàtɛa gbɛ̀sĩsĩↄwa, aa lɛ'ɛ̀a sĩ̀sĩↄ musu. Má yã́ pↄ́ aa kɛ̀ yãaↄ fĩabonɛ́ a lɛ́u à gɛ̃ ń kṹ.

⁸ Ma Dii ma mɛ̀: Baa tó vɛ̃ɛbɛↄ í vĩ yↄↄnnↄ, wì mɛ wasu a ↄ̃̀ↄkpao, asa a kã́fĩa vĩɛ. Màa má kɛ ma zↄ̀blenaↄ yã́i, má gbɛ̃́ↄ midɛ píio.

⁹ Má bui sɛ Yakↄbu buiↄ guu, Yudaeↄ gↄ̃ ma gbɛ̀sĩsĩↄ vĩ. Gbɛ̃́ pↄ́ má sɛ̀ↄ mɛ́ aa gↄ̃ vĩ, wekĩi ma zↄ̀blenaↄ aaↄ kuu.

¹⁰ Salↄna a gↄ̃ dã́dãkɛkĩi ũ, Akoo guzulɛ a gↄ̃ zuↄ kálɛkĩi ũ ma gbɛ̃́ pↄ́ aaì ma kĩ́i wɛɛlɛↄnɛ.

¹¹ Á gbɛ̃́ pↄ́ a pãkpàmaziↄ sↄ̃, ma gbɛ̀sĩsĩ pↄ́ a kua adoa yã́ sã̀águ, i blɛ kálɛ tã́a pↄ́ ì mↄ́ ń minaoɛ, i í gbãa yãalɛ tↄ̃́lɛ tã́a pↄ́ ì ń baa kpámáwa.

¹² Má á baa kpáwá fɛ̃nda ũ, í kúlɛ wà á dɛdɛ, asa ma lɛzù, i weao, ma yã'ò, i swã́sɛio, a yã́ pↄ́ má yeio kɛ̀, a zɛ ń yã́ pↄ́ i kamaguoo.

¹³ A yã́i tò ma Dii Zĩgↄ̃de ma mɛ̀ ma zↄ̀blenaↄ pↄble, nↄana i á dɛ. Ma zↄ̀blenaↄ imi, imi i á dɛ. Ma zↄ̀blenaↄ pↄnakɛ, wí i á kṹ.

¹⁴ Ma zↄ̀blenaↄ gulakɛ ń nↄ̀sɛnao, ápiↄ sↄ̃ á wiilɛ ń yã'ↄ̃mao, í búbuapɛ ń pↄsiao.

¹⁵ Á tↄ́ a gↄ̃ gbɛ̃́ pↄ́ má sɛ̀ↄnɛ gbɛ̃́kabↄ ũ. Ma Dii Lua má á dɛdɛ, ãma má tↄ́ dafu kpá ma zↄ̀blenaↄnɛ.

¹⁶ Gbɛ̃́ pↄ́ lɛ́ sa'olɛkɛnɛ́ bùsupiu a kɛ ń Lua sĩande tↄ́o. Gbɛ̃́ pↄ́ lɛ́ lada bùsupiu, a da ń Lua sĩande tↄ́o. Asa taasi pↄ́ aa kɛ̀ yãa a sã́ńgu, i sãalɛ ma wɛ́u.

Musu dafu ń zĩ́lɛ dafuo

¹⁷ Málɛ musu dafu ń zĩ́lɛ dafuo kɛ. Yã́ ziↄ dↄ gbɛ̃́ↄgu lↄo, a gɛ̃ ń làasoo guuo.

¹⁸ À pↄnakɛ, àↄ yáalↄ pↄ́ pↄ́ málɛ kɛwa gↄↄpii, asa málɛ Yelusalɛũ kɛ wà yáalↄu, aà gbɛ̃́ↄ i pↄnakɛu.

¹⁹ Má yáalↄ Yelusalɛũwa, ma pↄ a kɛ ma gbɛ̃́ↄwa na. Wa ↄↄlↄ ń búbuapɛao súu ma a guu bau lↄo.

²⁰ Wa nɛ'iulitɛ̃n kpɛ́ɛ bau lↄo. Mae zↄ̃ↄe a ga we a gↄↄ lesaio. Tó gbɛ̃́ kà wɛ̃̀ basↄo mɛ́ à gà, wa mɛ ɛ̀waasoɛ. Tó gbɛ̃́ i ka wɛ̃̀ basↄoo, mɛ́ à gà, wa mɛ Lua lɛkɛ̀ɛ̀ɛ.

²¹ Aa kpɛdↄdↄ, aaiↄ kuu, aa vɛ̃ɛliↄ pɛ́pɛ, aaiↄ a bɛ ble.

²² Aa kpɛdↄdↄ buipãleↄnɛo, aali pɛ́pɛ, dãↄ a bɛ bleo, asa ma gbɛ̃́ↄ wɛ̃ni kɛ lán líwa, gbɛ̃́ pↄ́ ma ń sɛ́piↄ ń zĩ ài ble.

²³ Aa isima ga kpa pão, aa nɛ'i à ɛɛ ń tó weo, asa aaↄ dɛ ma báaadangudeↄ ũ, ampiↄ ń ń nɛ́ↄ sãnu.

²⁴ E aaↄ gɛ́ lɛzui, má wemá, e aaↄ yã'o aaↄ gɛ́ láai, má swã́sɛi.

²⁵ Àwalɛwana ń são a sɛ̃ ble sãnu, nↄ̀ↄmusu a tàaable lán zuwa, mlɛ̃ↄ pↄblea aↄ dɛ bùsu ũ. Aa pↄe kɛ'ĩa ge aa pↄe ↄ̃̀ↄkpa ma gbɛ̀sĩsĩ pↄ́ a kua adoa musuo. Ma Dii mámɛ má ò.

« Roimhe

Air adhart »

Lean sinn:

Ceanglaichean taic

Sanasan